سعر و مواصفات Apple iPhone 6 Plus

كل جهاز وليه مميزاته وعيوبه وكل واحد بيختار الجهاز اللي شايفه افضل لأحتياجاته ،،
بس رجاء بعد كده اكتب بالعربي عشان القراءه تبقى اسهل شويه :)

لأ مش شغال في مصر

السلام عليكم انا جديد لسه في عالم الاي فوون وكنت عاوز اعرف برنامج ال facetime شغال في مصر ولا لاء ؟ لاني سمعت انه مقفول .

مراجعه قيمه لمواصفات الجهاز ، وفي انتظار مراجعه اخرى بتجربه فعليه له انشاء الله

وطبعا الاسعار دي احنا ملناش دعوه بيها :) لأنها في امريكا فقط وبعقود

لم يفيق عشان ابل من لحظه إبهارهم بكشف النقاب عن المنتظر I phone6 حتى فاجئتهم بما يذيد حيره امرهم فى ايهما يرغبو بأقتناءه بكشفها عن اخيه الاكبر iPhone 6 Plus

ابل التى صرحت مرارا انها لن تنتج هواتف تتعدى شاشتها الـ4 إنش تفاجئ وتبهر محبيها حول العالم بإصدارها هاتفين يحملا شاشتين مختلفتين الحجم .
الأولى 4.7 انش والثانية محط نظرنا 5.5 انش

الهاتف iPhone 6 Plus يخطف الانظار بشاشته الكبيره ذات الـ5.5 انش بتقنية الـ lcd صاحبه الألوان الرائعة والواقعية .
تأتى الشاشه بدرجة وضوح عالية قدرها بدرجة وضوح 1920×1080 بكسل وبكثافة بيكسلات تصل الى 400 بيكسل .
وتم تطوير نظام ios بالكامل ليتناسب مع دقة الشاشه العالية ويدعم ابعاد الشاشه لتناسب عرض التطبيقات

بخصوص التصميم العام للهاتف .

يأتى بتصميم مشابه لآخيه الاصغر iPhone 6 حيث انهم مصنوعين من معدن الألمونيوم بشكل كامل وبتصميم منحنى جذاب وشعار ابل الخلفي مصنوع من الفولاذ المقاوم للصدء
وتم تحديث الواجهة الرئيسيه للهاتف لسهولة الاستخدام وايضا يقدم الهاتف وضعيه تقسيم الشاشه لسهولة الاستخدام بيد واحدة .
الهاتف iPhone 6 Plus مذود بنفس معالج اخيه الاصغير apple a8 ذو المعمارية 64 bit ومصنع بأستخدام 20 نانوميتر الذى يتيح اكبر قدر من التوفير فى طاقة البطاريه بنسبة 50 المئه .
الهاتف يدعم شبكات الجيل الثالث والرابع بمعظم تردداته لتوفير تغطية كاملة للهاتف
واحد اهم المميزات الموجوده فى كلا النسختين ميزة Wi-Fi Calling التى يستفيد منها عملاء شركات الإتصالات T-Mobile في الولايات المتحدة وعملاء EE في المملكة المتحدة.

بخصوص الكامبرا .

اهم مايجذب مقتنى ومحبي هواتف ابل هى الكاميرا التى فى الغالب ماتبهرهم حتى وهي لازالت على نفس عدد بيكسلاتها التى لم تتغير وهى 8 ميجا بيكسل لكن الابهار لايرتبط بعدد البيكسلات .

يأتى الهاتف iPhone 6 بكاميرا خلفية 8 ميجا بيكسل مع فلاش True Toneمذدوج لكفاءه اعلى واضاءه اقوي
وحجم البيكسل فى الهاتف اكبر قليلا من iPhone 5S
ويأتى الهاتف بفتحة عدسة f/2.2 مناسبا جدا لآلتقاط صور بدقة عالية ومشبعه بالتفاصيل
الهاتف يأتى بمثبت بصرى المعروف بــois لمنع الاهتزاز وتم تعديل ميزه التثبيت التلقائي وجعلها اسرع بمرتين عما سبق .
يغلف جودة الصور ومدى اشباعها بالألوان المعالج القوى من ابل خاصة المعالج الخاص بالصور الذى جعل تجربة التصوير مع الهاتف تصل لمستوى الابهار
كاميرا الهاتف iPhone 6 قادره على تصوير الفيديو بدقة 1080 بسرعه 30 اطار فى الثانيه او 60 اطار وايضا خاصيه تصوير الفيديو البطئ المعروفه بأسم Slow Motion والمتواجدة فى العديد من الهواتف الحديثه
لا ننسي ان الهاتف اخيرا اصبح يدعم خاصية الـnfc التى تتيح الدفع الالكترونى
وايضا كأخيه الاصغير يدعم التصوير البانورامى بدقة 43 ميجا بيكسل وخاصية الـhdr المحسنه التى تتيح صورة مشبعه الالوان والتفاصيل
تتفوق كاميرا الهاتف وهى 8 ميجا على مثيلاتها رغم وصولهم الى 16 ميجا بفضل المستشعر الجديد كليا فى الهاتف

الهاتف يأتى بسعر 299 دولار للنسخه 16 جيجا
وبسعر 399 دولار لنسخه الـ64 جيجا

وتستقبل الشركه طلبات الشراء يوم 12 سبتمبر و يوم وصول الهاتف فى 19 سبتمبر

اهلا برائد ابل الجديد وسط المنافسة الشرسة التى فى بدايتها حتى بعد اصدار سامسونج رائدها الجديد note 4

فــ ابل ستظل ابل

بالاضافه لموضوع الاستاذ zman2yahob

كل هاتف وليه مميزاته وعيوبه ، والايفون ميزته في سرعته وقوه وثبات نظامه و والمواد المصنع منها الهاتف داخليه وخارجيه ، مختصر الكلام انه هاتف عملي بيلبي احتياجاتك الاساسيه بشكل مثالي ، المفروض حضرتك تحدد اولوياتك ايه في الاستخدام وتشتري على اساسها

شوف الموضوع الى انا لسا عامله اخى الكريم .. هتعرف كل تفصيلة عن الهاتف الرائع

وجهة نظر صحيحه جدا ، بس في ناس بتهتم بالارقام في ورقه المواصفات اكتر ما بتهتم بالتجربه الفعليه ،، وانا عن نفسي لغايه دلوقتي مش هحكم على النوت 4 مثلا الا لما اجربه واشوفه ، حتى لو واثق انه مش هيختلف كتير عن اللي قبله وعمره ما هيوصل لأداء الايفون طبعا ، بس لازم برده الواحد يحكم عليه لما ينزل ويتجرب عشان منظلمش الجهاز

شكرا يارجاله ع التوضيح :D

تفسيط و ال200 دولار دول زي ما تقول كده المقدم :D
امريكا كان مينفعش فيها انك تشتري تليفون زي عندنا كد مش تبع شركه معينه زي انك تشتري تليفون من موبينيل ملا و ميكنش بيشغل غير شريحه موبنيل بس انا كنت شوفت خبر من فتره علي موقع phonearena ان هيتاح بعد كده انك تشتري التليفون unlocked
لو انا قولت حاجه غلط ياريت الاعضاء تصحللي خلينا نستفيد :D

هو ده شكله برده جامد ، ولما تمسك الموبايل على الطبيعه برده هتفرق

ياريت إن شاء الله عشان انا كان أملى فى الموبايل ده

لا هو مش تجاهل ولا كسوف مش للدرجه دي ، ولو كانوا مكسوفين منه مكانوش عملوه ، وهو اصلا ضهره من ورا واخد نفس فكره تصميم الايفون 5s انه يبقى متقسم ل ٣ اجزاء بس بدل ما كانت ازاز من فوق ومن تحت عملوا خطوط بنفس الشكل وكلها المونيوم ، والتصميم ده من قبل الاتش تي سي اصلا ، وانشاء الله على الطبيعه هيفرق

بس مش حضرتك ملاحظ أن التركيز الاكبر من إعلانات الشركة و المؤتمر كان على سماكة الهاتف و الشاشة من الأمام و واضح التجاهل وعدم التركيز على خلفية الهاتف فى المؤتمر او إعلانات الشركة زى مايكونوا مكسوفين يظهروا ظهر الموبايل :D فأنا حاسه ان من الخلف يشبه إلى حد كبير ال htc ؟

لا مش تافه ولا حاجه :) ، الايفون 6 شكله وخاماته جامدين جدا طبعا بس انا برده عاجبني ضهر ال 5s اكتر ، بس قولت استنى لما ينزل وامسكه في ايدي الاول ممكن اغير رأيي ، الصور برده غير الطبيعه

فعلا أنا شوفت فى موقع أبل و مالقتهمش كاتبين حاجة عن الرام بس بجد أنا أكتر حاجة عجبتى فى الايفون 6 انهم كبروا حجمه لأن أنا كنت هموت و أشترى الايفون 5s بس اللى كان مانعنى ان حجمه صغير بس أنا شايفة إن شكل الأيفون 5s من الخلف أحلى لكن مش عاجبنى إنهم يخلوا لون الظهر بتاع الأيفون 6 كله space grey لكن ال 5s فيه إسود من فوق و من تحت و الخطوط اللى فى ظهر الايفون 6 مش حلوة فأنا رأيى إن الأيفون 6 أحلى فى الحجم و السمك أقل و كده أحسن لكن شكل ظهر ال 5s أشيك بكتير و ده اللى مضايقنى جدا لأنى كنت متشوقة للأيفون 6 خصوصا لما عرفت إن حجمه هيبقى أكبر بس شكل ال 5s احسن ............. جايز يكون الأمر اللى بتكلم فيه تافه بس مهم بالنسبة ......... لي تقبلوا مرورى :D

انا معايا 5s اصلا واداءه جبار ومستعملتش جهاز قبل كده بسرعته ، فما بالك بالاحدث والاسرع !

طبعا بالنسبه للايفون مش هيفرق لان هو شغال ب 64 بت يعنى البروسوسر بتاعه يفوق نوت 4 ..والمواصفات دى بتشغل اجدعها لعبه فى المتجر وبكفائه عاليه ..

بص هو في موقع جي اس ام اتعدلت واتكتبت رامات 2 جيجا ، لكن في موقع ابل نفسه مش مكتوب الموضوع ده ،، بس اكيد هيبان بعد كده ، وصدقني الحاجات دي مش هتفرق لأن ان واثق ان اداء الجهازين هيبقى خرافه ، سواء كانت الرامات 1 او 2

والله مش عارف اقولك ايه بس معلش بقى عوضك على الله ،، انا في الايفون ياما عملت جيلبريك للتليفون وكنت بشقلبه بغير فيه كل حاجه في السوفت وكان كبيره اوي يوم ما الغبط الدنيا على الاخر الموبايل يسقط سوفت وكنت بوصله بالكمبيوتر ببرنامج الايتيونز واحمله سوفت من اول وجديد ويرجع كأنه زيرو ،
لكن كده بجد سامسونج مش مجرد ضعيفه في خاماتها الخارجيه فقط لأ والمكونات الداخليه كمان ، والبطاريه اللي بتضعف من الاستخدام بعد اقل من سنه ،، عشان الناس تعرف بقى يعني ايه الجوده في التصنيع

والله يا استاذ jecko كل الحكاية اني حطيت روم من xda وانا مش اول ولا اخر واحد يحط روم من xda ده في ملاين وبعد الريستارت التليفون بدأ يستهبل الصوت مش شغال ولا الفيديوهات ولا الخط مع اني جربته على تليفونات تانية قلت اوديه التوكيل بس طبعا بعد ما رجعت الروم الرسمية قالولي البوردة اتحرقت والتليفون بوردة وان استعمالي زبالة واني لا اصلح ان استعمل تليفون من سامسونج طب دول اقولهم ايه حضرتك بس لو كتبت note 3 custom roms شوف كميه الفيديوهات وبالظبط مغيرتش حاجة من الي بتتعمل بس تقول ايه

3500 !! ليه هو ايه اللي حصل في الموبايل

انا كنت بقول زيك كده لغاية ما اشتريت النوت 3 وبعدها اكتشفت ان ابل مبتشتغلش بالارقام ابل بتشتغل بالاداء ومن ساعتها وانا ندمان اني مجبتش الايفون 5s ومع اول عطل وبما اني معايا نسخة ال 4g هات 3500. تصليح ده كفر بصراحه وطلعوني فالاخر شخصية مينفعش تمسك تليفون من تليفونات سامسونج المقدسه العظيمه

ابل تقاااااارن بالاستخدام والتجربه الفعليه ، مش المواصفات اللي على الورق ، راجع التعليقات في الاسفل

ده انت حاجه ............................................................ يا jecko

aligamal99 في ناس مش قادره تقتنع بالكلام ده ، ومش قادرين حتى يستنوا لغاية ما ينزل ويجربوه ويقيموه ، لأ بيقولوا عليه تليفون مش حلو كده وخلاص ، يلا ربنا يهدي

والله فعلا زي ما قولت يا جيكو الايفون مش بالكلام والموصفات ده ال 5s مفيش موبايل زيو و سرييع جدا اومال ال ايفون 6 هيبقا ايه وفي ناس بتقول الكاميرا وحشه عشان عرفوا انه 8 ميجا بكسل لازم يمسكوا الوبايل و هما هيعرفوا انهم مسكيين موبيلات لعبة انا مش بتريق انا بقول وجه نظري الكاميرا و البروسيسور ملهومش حل و انا واثق ان الموبايل هيبقا احلي موبايل

مانت لو كنت فهمت الكلام كويس مكنتش قولت كده لكن انت داخل تهاجم وخلاص ، انا بتكلم عن اجهزه ابل عموما على فكره مش الايفون 6 ، وبحكم اني مستهلك لأجهزه ابل من سنوات وبقى عندي الحمد لله خبره الي حدا ما فيها فعشان كده بتكلم ،، وحتى لما اتكلمت عن الايفون 6 قولت اتوقع انه هيبقى حاجه قويه وده لأن انا معايا اصلا دلوقتي 5s واسرع من اي هاتف اخر فبالتأكيد الجيل الجديد احدث واقوى

وفر كلامك لنفسك لحد ما تجربه احسن
لان المفروض التعليقات ديه معموله عشان الناس تقول تجربتها مع الجهزه و يفيدوا الباقيين مش ناس تنفخ في حاجه من غير متشوفها ...

لا طبعا مش عايز اطلع الصوره بيضا ولا حاجه واجهزه زي اجهزه ابل مش مستنياني انا عشان ابيض صورتها ، بس انت مينفعش تحكم على حاجه من غير ما تجربها الاول ، جربتها ومعجبتكش ادخل قول تجربتك لكن هتقول وحشه كده وخلاص يبقى وفر كلامك لنفسك احسن ، لأن المفروض التعليقات دي معموله عشان الناس تقول تجربتها مع الاجهزه ويفيدوا الباقيين ، مش ناس تفتري على حاجه من غير ما تجربها ،،

وياريت تنهي الحوار على كده عشان ده مش مكان للخناقات ده مكان للنقاش بأسلوب ( متحضر )

لا طبعا المفروض اقول اول رائي حلو او وحش و الناس يا تقتنع بكلامي يا بكلام غيري لان الموقع مش عشان تقول الميزات بس ان انت عايز تطلع الصوره كلها بيضه بس ده غلط مش فاهم انت بتقول كده ازاي و ملاك ايه بس هو لسه حد مسك ال iphone 6 -_- انت بتهزر صح :D

على فكره انا بديك مثال فقط عشان افهمك وجهة نظري لما بقولك ان موتور 1600 مرسيدس اقوى من موتور 2400 هيونداي ، كان قصدي ان تكنولوجيا صناعه البروسيسور ثنائي النواه من ابل مخلياه اقوى من بروسيسورات اخرى رباعيه وثمانيه ،
المهم يعني من كل الكلام ده لو الموبايل شايفه مش عاجبك وميستاهلش ودي وجهة نظرك طبعا وانت حر فيها يبقى بلاش تعلق عليه من اصله عشان متديش عنه انطباع لناس تانيه ممكن تكون متعرفش كويس في الموبايلات انه جهاز سئ وده طبعا مش حقيقي
وانا واحد من الناس في اجهزه بكرها من ساعت ما نزلت وشايفها ملهاش لازمه من وجهة نظري ، لكن مبدخلش على صفحتها وافضل اعيب فيها عشان مضايقش ملاكها اللي هما شايفينها اجهزه قويه جدا
كل واحد حر في رأيه والاهم من ده كله ان الواحد ميتكلمش على حاجه مجربهاش اصلا ، انا لما بدخل في قسم ابل وبحاول اساعد الناس ده لأني مجرب معظم اجهزتها ومن سنين مبتكلمش على الفاضي يعني
وبرده ربنا يوفقك وتختار الجهاز اللي يريحك

برده انت مش فاهمني
انا مش عشان بقولك ان نظام ios سريع يبقي التانيين سحلفه :D لا الويندز فون سرع و علي رائيك مفهوش حاجات كتير ملهاش لزمه و زحمه في الموبيل بس عيبه لهوش دعم و الاندرويد مش بطئ بس ده عشان في خصائص اكتر من الانظمه التانيه بكتير و كل شركه بتنزل خصائص جديده
و بما ان انت بتقول مرسيسدس فمرسيدس مبتخطش في العربيه رقم واحد عندها موتور 1600 بتحط مثلا في Mercedes E 350 2014 موتور 3500 حصان اما لو ابل مكانها هتحط موتور 1000 cc و هتشل كل الكماليات من العربيه :D و تبعيه بسعر ال 3500
phonearena كان كاتب ان انت لو هتشتري iphone و عايز نسخه بمساحه اعلي الفرق هيكون 100 دولار مع ان ده بيكلف ابل 10 دولار بس ابل عايز تعمل فلوس
ده كان تعليقهم :D بس بالانجليزي طبعا :D
انا وحهه نظري زي ما قلت انا مش هشتري تليفون بمواصفات متوسطه و سعره اغلي من اي موبيل تاني في السوق عشان سوفته سريع
المهم انا اتمني انك متاخدش النقاش شخصي :)
كل واحد ليه الحريه انه يجيب او يحب الي انت عايزه و يفضل النظام الي يريحه
و زي ما قالي الاخ هارد قبل كده
ربنا يوفقك لما تحبه و ترضاه :D

لا والله انا معنديش مشكله خالص وعارف افرق كويس اوي ما بين السوفت وير والهارد وير ، وكون ان ابل السوفت بتاعها سريع يبقى دي مشكله في الانظمه الاخري هي اللي بطيئه ،
ومين قال ان تليفون ابل مواصفاته متوسطه ؟؟ ماهي دي المشكله ان انت بتبص على الارقام بس وسايب الاداء والتجربه الفعليه ،، انت مثلا عندك في العربيات مرسيدس سي كلاس موتور 1600 و هيونداي سوناتا موتور 2400 لكن مرسيدس اداءها اقوى والاتنين بنفس السعر ، يا فرحتي انا لما ابقى راكب 2400 سي سي وموتور 1600 تاني اسرع مني ،، نفس النظام في الموبايلات لأني بعتبر ابل دي مرسيدس الموبايلات ، يافرحتي انا وانا ماسك موبايل ثماني النواه ولا خمسين نواه و600 جيجا رام والاقي في الاخر موبايل ثنائي النواه اسرع مني ،،
المشكله عندك انت صدقني انت اللي فاهم الموضوع غلط لأن الارقام دي كلها مبتفرقش المهم التجربه الفعليه ، وانا بدور على موبايل ببقى عايز امسك اسرع موبايل في السوق انشالله يبقى البروسيسور نص نواه والرامات ربع جيجا المهم يبقى اسرع موبايل ، انا مش همشي لازق مواصفات الجهاز في دهر التليفون عشان افرجها للناس ، ولما الموبايل يتقل ويهنج مش هتنفعني بحاجه كل الارقام دي

jecko
انت عندك مشكله في التفرق بين الهارد و السوفت مش عشان سوفت ابل سريع و بيتغشل علي امكانيات اقل اقوم انا ادفع ثمن اكبر علي هاردوير اقل يعني انت مثلا لو جييت تشتري جهاز كمبيوتر و طلع مظام جديد سريع و بيشتغل بامكانيات جهاز بنتيم 4 اسرع الاجهزه الجديد و مثلا ب 9000 هتقوم تروح تشتري الجهاز ابو نظام سريع و مواصفاات تعبانه كده انت بتشتري سوقت اما انا باخد جهاز بواصفات عاليه و السوفت بعد كده يتعدل
ديه وجهه نظري :D انا مدفعش في تليفون مثلا 7000 او اكتر عشان تليفون مواصفاته متوسطه بالنسبه لمنافسينه و بسعر اعلي عشان سوفته سريع -_-

يا جماااعه قولنا الكلام ده كتير قبل كده اجهزه ابل متقارنهاش من حيث المواصفات بالورقه والقلم ، اجهزه ابل قارنها في الاستخدام ، البروسيسور الثنائي النواه ورامات ١ جيجا في اجهزة ابل اقوى من بروسيسور رباعي او ثماني النواه ورامات ٣ جيجا في اجهزه اخرى ،،

وشركه ابل كانت بتنتقد حجم الهواتف الكبيره واشياء اخرى ، وعملتها تلبيه لرغبات المستهلكين وسوق الهواتف المحموله ، حتى لو هي مش مقتنعه بالحجم مثلا بس انتجته نتيجه لأبحاث اثبتت ان شريحه كبيره من المستخدمين تتجه الي الهواتف ذات الشاشات الكبيره فأصبح من الضروري انتاج هذه الاحجام لأرضاء كافه الازواق ، وكل خاصيه اضافتها في الهاتف اضافتها بعد معرفه ان هناك طلب عليها ،
ودي حاجه الشركه تحترم عليها انها بتلبي احتياجات ورغبات مستهلكيها
وبالنسبه للكاميرا ،، عشان يعملوا هاتف بسمك 6.9 مللي !! لازم تكون الكاميرا بارزه لبرا

حقيقه