youssefshabana

احدث المشاراكات

• 2015-06-03 (09:17:28PM) Samsung Galaxy S6

  شيء طبيعي ان الجهاز اول ما ينزل سعره يكون غالي وبعد فترة قصيرة سعره يفضل ينزل لحد ما يستقر عند سعر معين زي اي flagship

---

• 2015-06-03 (08:42:20PM) Samsung Galaxy S6

  بسم الله الرحمن الرحيم
  
  ده تقييمي لجهاز Samsung Galaxy S6 ، في البداية احب اوضح حاجة وهي ان الجهاز ده من افضل اجهزة سامسونج حتي الان من وجهة نظري من حيث الشاشة والخامات والتصميم والكاميرا والسرعة والاداء
  
  والتقرير ده للناس اللي عاوزة تشتري الجهاز بس مترددة
  
  اولا التصميم والخامات :-
  
  الجلاكسي اس 6 زي ما قلت من افضل اجهزة سامسونج من حيث التصميم والخامات وتصميمه يعتبر قريب جدا من تصميم سلسلة هواتف Sony Xperia Z
  
  وبيتميز ان ظهره من الزجاج وعليه حماية من الخدوش Corning Gorilla Glass 4 من الامام والخلف والفريم بتاعه من المعدن مش البلاستك كعادة اجهزة سامسونج لكن لازم اللي يشتريه يجيبله جراب لحماية الظهر بالذات خصوصا ان الكاميرا الخلفية بارزة شوية ومن السهل انها تتكسر من اخف الوقعات وكمان بيتميز انه نحيف جدا ووزنه خفيف ومتوفر بالوان جميلة وهي الذهبي والاسود والابيض والازرق واديله في التصميم والخامات 8/10
  
  ثانياً الشاشة :-
  
  بإختصار شاشة الاس 6 من افضل الشاشات في اي سمارت لغاية دلوقتي وبتتميز بالسطوع العالي حتي مع تخفيف السطوع علي اقل درجة بردو الشاشة بتكون واضحة والوانها جميلة وبتميل للواقعية علي عكس اجهزة سامسونج السابقة وحجم الشاشة ممتاز جدا ومريحة في الجيمز ومشاهدة الافلام واديلة في الشاشة 10/10
  
  ثالثاً السرعة :-
  
  ودي من اهم مميزات الاس 6 وهي السرعة اللي تحسنت بشكل رهيب عن كل اجهزة سامسونج اللي فاتت وطبعا الكل عارف ان البطيء والتهنيج كانت من اكتر المشاكل اللي بتواجه مستخدمي اجهزة سامسونج لكن في الاس 6 المشكلة دي اتحلت بنسبة 95% الجهاز استجابته للاوامر سريعة جدا والتاتش سلس جدا وبيفتح التطبيقات والالعاب في لحظتها والتهنيج تقريباً منعدم وفعلاً الجهاز ده بقي منافس قوي للاجهزة التانية في السرعة زي iphone 6 و HTC One M9 و Sony Xperia Z3 Plus واديله في السرعة 9.5/10
  
  رابعاً اداء الجهاز في الالعاب :-
  
  الاس 6 بيشغل جميع الالعاب من غير تهنيج او بطئ لكن في بعض الالعاب زي GTA San Andreas بيكون في تأخير بسيط احيانا لما بتكون ظابط اعدادات اللعبة كلها علي Max وده في كل اجهزة الاندرويد لكن غير كدة الجهاز ما شاء الله اداءه رائع في الالعاب وده يرجع للبروسيسور القوي وكارت الشاشة والرامات + ازالة 95% من الحركات اللي كانت موجودة في الاجهزة السابقة زي Galaxy S4, S5 واللي كانت بتأثر بالسلب علي اداء وسرعة الجهاز بشكل عام واديله 9.5/10
  
  خامساً البطارية :-
  
  طبعاً لان الجهاز مكنش معايا لفترة طويلة مقدرتش اقيم البطارية تقييم كامل لكن عن تجربتي البسيطة للجهاز لقيت ان البطارية جيدة الي حد كبير لكن مقدرش اقول عليها قوية وبردو مقدرش اقول عليها ضعيفة لكن يعتبر ادائها متوسط لكن طبعاً في خصائص لتوفير الطاقة في الجهاز وبتحسن من اداء البطارية بشكل واضح وبتخليها تدوم لفترات اطول من الطبيعي وطبعاً من اهم مميزات الجهاز خاصية الشحن السريع واللي بتخلي الجهاز يشحن من 0 الي 100% في ساعة واحدة تقريباً واديله في البطارية 7.5/10
  
  سادساً الكاميرا :-
  
  كاميرا الاس 6 من افضل الكاميرات حتي الان من حيث واقعية الالوان والتفاصيل والزووم وسرعة التصوير والكاميرا الامامية ممتازة جداً واديله في الكاميرا 9.5/10
  
  سابعاً الصوت :-
  
  صوت الجهاز قوي ونقي لكن طبعاً صوته لايرقي لجهاز HTC One M8, M9 لكن صوته مرضي جدا واديله 8/10
  
  ثامناً خاصية البصمة :-
  
  اللي اقدر اقوله انها اتحسنت كتير عن الاول واستجابتها اسرع بفرق واضح وتقريبا بقت زي الايفون بالظبط 10/10
  
  
  
  وطبعاً الاس 6 زي اي جهاز فيه عيوب وعيوبه بالنسبالي هي اﻷتي :-
  
  بطارية غير قابلة للازالة _لا يدعم كارت ميموري_الكاميرا بارزة شوية وسهل انها تتكسر لو مفيش جراب _استهلاك الرام عالي لكن مش مأثر نهائي علي اداء الجهاز _لا يدعم راديو
  
  ده باختصار تقييمي للاس 6 وانا شايف انه يستحق ان الواحد يشتريه لكن اللي معاه النوت 4 ميغيروش ويجيب الاس 6 لان الفروقات ما بينهم ضئيلة جداً وكمان في نقاط تفوق للنوت 4 زي البطارية القابلة للازالة ودعم كارت الميموري وحجم الشاشة والقلم
  
  لكن انصح اللي عاوز يشتريه يصبر عليه شوية كام شهر عشان سعره بينزل بسرعة لان الاقبال عليه مش كبير زي الاجهزة المنافسة ليه واتوقع سعره يبقي زي سعر النوت 4 بعد فترة قصيرة
  
  واي استفسار انا في الخدمة :)

---

• 2015-02-14 (03:30:40PM) Sony Xperia Z2

  mohamedk123
  
  شوف يا باشا الزد 2 بيتفوق في الاتي :-
  
  1- الشاشة اكبر
  
  2- الخامات افضل بكتييير
  
  3- اسرع واخف في الاستخدام ومش بيهنج نهائي
  
  4- الرامات اكبر
  
  5- البطارية اقوي
  
  6- الصوت افضل وانقي
  
  7- الوان الشاشة واقعية اكتر من الاس 5
  
  8- بيدعم راديو
  
  اما الاس 5 بيتفوق في :-
  
  1- الحساسات
  
  2- بطارية قابلة للازالة
  
  3- البصمة
  
  4- الكاميرا افضل لكن مش في كل الاوضاع

---

• 2015-02-14 (03:20:33PM) Samsung Galaxy S4 I9500

  سعر الزد 2 دلوقتي بدون ضمان حوالي 3100 جنيه
  
  مفيش اي مشاكل لو جبتوا بدون ضمان لان هيبقي قدامك 14 يوم تقدر ترجع فيه الجهاز لو في عيب
  
  لكن اطمن النسخ الحديثة من الزد 2 مفهاش اي عيوب
  
  ومبروك مقدماً :)

---

• 2015-01-17 (08:37:38AM) Samsung Galaxy S4 I9500

  طالما انتا ضامن التليفون وحالته زي ما انتا بتقول كويسة وهتشتريه من واحد تعرفه خلاص توكل علي الله واشتريه ، لكن مع العلم ان سعره جديد ضمان دولي حوالي 2500 جنيه وبالضمان المحلي 2800 جنيه
  
  المهم يكون معاه جميع مشتملاته الاصلية بالذات الشاحن وقبل ما تشتريه تجرب كل حاجة فيه بالذات الكاميرا والبطارية وسرعة النت
  
  ومبروك مقدماً :)

---

• 2015-01-16 (07:36:26PM) Samsung Galaxy S5

  هو ممكن يكون في برامج معينة في الاس 5 مخلياه بطيء او انتا منزل عليه تطبيقات كتير ومخلصة الميموري ووممكن كمان تكون المشكلة في كارت الميموري لو انتا بتستخدمه يكون ماركة مش كويسة او هو في مشكلة او الرامات استهلاكها عالي زيادة عن المعدل الطبيعي او تكون مفعل وضع توفير الطاقة او فاتح كذا تطبيق في نفس الوقت كل الحاجات دي بتبقي من الاسباب الاساسية في بطئ الجهاز
  
  لان المفروض الاس 5 في الوضع الطبيعي اسرع بفرق واضح من الاس 4 ميني في التحميل وسرعة الاستجابة للمهام بشكل عام لان الفرق في البروسيسور والرامات وكارت الشاشة كبير جداً جداً بين الجهازين لصالح الاس 5
  
  عموماً شوف اذا كان في حاجة من اللي قلتها دي في الجهاز ولا ﻷ
  
  ولو انتا معملتش اعادة ظبط المصنع انصحك انك تعمله بس تاخد نسخة من الاسماء والرسائل والحاجات المهمة اللي في الذاكرة الداخلية للتليفون عشان هتتمسح بعد اعادة ظبط المصنع
  
  وكمان حاول تحمل برنامج Antutu Benchmark وقولي الجهاز اداك ايه
  
  وان شاء الله المشكلة تتحل

---

• 2015-01-16 (07:39:21AM) Samsung Galaxy S5

  لازم تتأكد انك نزلت كل التحديثات لدولة بولندا لان بولندا نزلها 3 تحديثات للولي بوب في حوالي اسبوع اول تحديث كان فيه مشكلة فعلاً وبيخلي الجهاز بطيء وتاني تحديث خلي الجهاز اسرع وفي بردو تحديث تالت المفروض انه حل المشكلة دي تماماً
  
  فانتا اتأكد انك منزل اخر نسخة للولي بوب
  
  وكمان المفروض بعد ما تحدث التليفون تعمل اعادة ظبط المصنع للتليفون عشان لو في اي مشكلة تتحل

---

• 2015-01-16 (07:30:34AM) Samsung Galaxy S4 I9500

  ﻷ طبعاً مفيش مقارنة بين الاس 4 والجراند 2 , الاس 4 يتفوق عليه في كل حاجة ( كاميرا_شاشة_سرعة_بروسيسور_معالج الرسومات_الشكل ( ودي اذواق )_بطارية_حساسات اكتر بكتير )
  
  كل حاجة في صالح الاس 4 ، من الاخر يا باشا مينفعش نقارن بين الاس 4 والجراند 2 في اي حاجة
  
  مين قالك كدة يا باشا !!! ، الاس 4 بجميع نسخه في برنامج S Health و Smart Stay اذا كانت الخاصية دي موجودة في تليفونات اقل بكتير من الاس 4 !
  
  الا بقي اذا كنت بتتكلم علي تليفون مش اصلي ده موضوع تاني
  
  انصحك انك تتوجه للاس 4 علطول من غير ما تفكر ، والمنافس ليه وبنفس السعر تقريباً هو النوت 3 نيو ده جهاز ممتاز بردو ومنافس قوي للاس 4 من سامسونج

---

• 2015-01-15 (07:52:03PM) Samsung Galaxy S5

  شوف يا باشا هما الجهازين امكانياتهم قريبة من بعض جدا لكن انا عن نفسي افضل الاس 5 كفاية اسم الماركة وشهرة التليفون
  
  اما الهواوي مش معروف اوي في مصر وقطع غياره مش متوفرة زي السامسونج ومش اي حد يعرف يصلحه لو حصله حاجة فالاضمن والافضل الاس 5
  
  ودي مقارنة بين الجهازين

---

• 2015-01-15 (06:49:37PM) Samsung Galaxy S5

  نوت 4 افضلهم طبعاً في كل حاجة ، انصحك بيه جداً

---

• 2015-01-12 (04:17:22PM) Sony Xperia Z2

  Error404
  
  شوف يا باشا بالنسبة للمقارنة بين الزد 2 والاس 5
  
  الزد 2 بيتفوق علي الاس 5 في الاتي :-
  
  1- حجم الشاشة
  
  2- الوان الشاشة اكتر واقعية من الاس 5
  
  3- بيدعم راديو
  
  4- الخامات افضل بكتييييير
  
  5- الرامات اكبر
  
  6- البطارية اقوي
  
  7- اسرع من الاس 5 ( فعلياً )
  
  8- صوت افضل وانقي
  
  9- مكان السماعات قدام علي عكس الاس 5 في الظهر وده بيخلي الصوت مكتوم شوية و انتا حاطه علي ظهره
  
  10- في Tap To Wake Up زي خاصية ال Knock في ال LG G2
  
  
  اما الاس 5 افضل في :-
  
  1- حساسات اكتر
  
  2- بطارية قابلة للازالة
  
  3- خاصية البصمة
  
  4- اسرع في الشحن
  
  5- الكاميرا افضل ( لكن مش في كل الاوضاع )
  
  دي اهم الفروقات اللي بينهم وعموما شوف اللي ترتاحله اكتر واشتريه
  
  والزد 2 عامل حوالي 3400 جنيه والاس 5 3600 جنيه ضمان دولي

---

• 2015-01-07 (08:08:57PM) Samsung Galaxy Grand Prime

  Nokia x2 افضل في الكاميرا والبطارية والشاشة كحجم ونوع لكن اداء في الالعاب الاس دوس 2 هيكون افضل والصوت بصراحة معرفش عشان ممسكتش ال X2 لكن الاس دوس 2 صوته كويس
  
  ونصيحة هات الجهاز ده Samsung Galaxy Core Prime افضل بكتير من الجهازين دول في كل حاجة وبنفس السعر تقريباً

---

• 2015-01-03 (12:43:47PM) Samsung Galaxy S4 I9500

  يعني انتا فتحت صفحة الزد 2 وملقتش غير الاستاذ اللي بيقول ان كاميرا النيوا افضل وومشوفتش في بوست تاني واحد بيقول انه قارن بين الزد 2 والنوت 3 في الكاميرا ولقي ان الزد 2 افضل من النوت 3 العادي اللي كامرته اعلي من النيو
  
  وقال كدة بالنص ( كاميرا الزد 2 اعلي من النوت 3 بمراحل ) وكاميرا الزد 2 مفهاش غلطة
  
  اكيد شوفت البوست ده بس طبعاً عشان بيقول كلام عكس كلامك فمجبتش سيرته
  
  وبالنسبة للسرعة انا مليش دعوة بالفيديو اللي انتا هتنزله انا عارف الاس 4 في افضل احواله سرعته عاملة ومهما كان الفيديو اللي هتنزله مبين ان الاس 4 سريع عمره
  ما هيتخطي الزد 2 لو عملت ايه
  
  وانا مسكت كذا تليفون زد 2 واس 4 واس 5 كمان والزد 2 اسرع فعليا وبفرق محترم كمان
  
  عاوز تقتنع اقتنع مش عاوز انتا حر
  
  وبردو انتا مش عاوز تقتنع ان السخونية في الزد 2 اتحلت من زمان ومبقاش بيسخن بزيادة غي في تصوير ال 4K اللي ملوش لازمة أساساً
  
  وعلي فكرة تم اختبار بطارية الزد 2 شغل متواصل وتخطت 8 ساعات لغاية ما فصل
  
  والاس 4 معداش ال 5 ساعات بنفس معدل الاستخدام ودي حقيقة مش تأليف
  
  عاوز تصدقها صدقها مش عاوز انتا حر يا باشا
  
  بمناسبة الشاشة بقي هههههههههههه فانتا محسسني اني قولت ريزيولوشن في الزد 2 اعلي من الاس 4
  
  انا اقصد اقوي كالوان وانا مقصدش بيها انها زاهية زيادة عن اللزوم او بهتانة انا اقصد واقعية واقوي في السطوع خصوصاً يفي ضوء الشمس الزد 2 كان شاشته اوضح من الاس 4
  
  شوف يا اخ سمسم عشان الموضوع شكله هيطول وانا معنديش استعداد ادخل في مناقشات انا عارف انها مش هتنتهي لو محدش غير رأيه
  
  انتا شايف ان الاس 4 احسن تليفون في العالم وانه يتقارن باي تليفون اعلي منه ويتفوق كمان! انتا حر تقول اللي انتا عاوزه ورأيك يحترم
  
  بس انا بقي مش مقتنع بالكلام ده وليا رأي تاني خالص غير رأيك. ويا ريت تتقبل ده
  
  وشكراً.
  
  ونصيحة أخيرة للأستاذ talal21 عشان حضرتك تخلص من الحيرة دي حاول تمسك الجهازين وتقارن بينهم واللي تشوفه مناسب اكتر ليك اشتريه
  
  وحاول تقارن الزد 2 ر الاس 5 مش 4 لأنه اعلي وارقي من الاس 4 ومنافس قوي للزد 2 وبنفس السعر تقريباً

---

• 2015-01-03 (01:43:37AM) Samsung Galaxy S4 I9500

  اخ سمسم
  
  انا عارف كويس اوي كاميرا الزد 2 والاس 4 عاملين ازاي والاس 4 مينفعش اصلا تتقارن بيها
  
  ويا ريت انتا اللي تشوف تعليقات الناس علي الكاميرا في الموضوع اللي انا عامله وانتا هتعرف اخبار كاميرا الزد 2 ايه
  
  ومعلش يعني موضوع شاشات التليفيزين حاجة والتليفونات حاجة تانية خالص وشاشة السوني اقوي من شاشة الاس 4 وبعدين محدش هيشتري تليفون علشان شاشته احنا مش بنشتري تليفزيون يبقي موضوع شاشات التليفزيون معلش هو اللي يتركن علي جنب شوية
  
  وكمان شاشة السوني بتتميز ب  X-Reality Engine_Triluminos display_Live Colour LED يعني بردو مفيش مقارنة بين الاتنين
  
  للأسف الزد 2 اللي كان معايا اتباع مش هقدر اعمل فيديو وعموما الفيديوهات مغرقة اليوتيوب وبمقارنة مع تليفونات اعلي بكتير من الاس 4 من سامسونج وريح نفسك يا اخ سمسم كلنا عارفين ان الزد 2 اسرع من الاس 4 في فتح الاسماء والرسائل وجميع التطبيقات والالعاب ولو بفرق قليل لكن في بعض التطبيقات الزد 2 بيفتحها اسرع بفرق يوصل ل 3 او 4 ثواني وانتا عارف ده كويس
  
  ومش هتناقش كتير في الموضوع ده لاننا اتناقشنا في كتير وجبتلك ادلة ومقتنعتش كالعادة
  
  واتمني من الاستاذ talal21 انه يدخل علي صفحة الزد 2 في الموضوع المثبت هتلاقي مقارنة شاملة بين الاتنين في كل حاجة تقريباً وبالادلة اللي تثبت ان اصلا متنفعش مقارنة تليفون زي الاس 4 بتليفون زي الزد 2 في اي حاجة
  
  مع احترامي لاي كلام غير كدة بس هو ده الواقع :)

---

• 2015-01-02 (04:50:28PM) Samsung Galaxy S4 I9500

  talal21
  
  شوف يا باشا انا هكلمك عن واقع تجربتي للجهازين بما انهم كانوا معايا في نفس الوقت وقارنت بينهم في كل حاجة تقريباً واحب اقولك ان لا تجوز مقارنة الاس 4 بالزد 2 دي فئة ودي فئة تانية خالص والزد 2 متفوق علي الاس 4 في كل حاجة معادا البطارية القابلة للازالة والحساسات
  
  وبعد المقارنة اللي انا عملتها بينهم اقظر اقولك ان الزد 2 احسن في
  
  1- الكاميرا في جميع الاوضاع بالليل او بالنهار يمكن الزووم يكون افضل في الاس 4 شوية لو ظبط كاميرا الزد 2 علي 8 ميجا بيكسل والفيديو في الزد 2 افضل
  
  وانا عامل مقارنة بينهم في صفحة الزد 2 تقدر تشوفها وفي مقارنة للكاميرا كمان
  
  2- البطارية بصراحة اقوي بكتير من الاس 4 الزد 2 يقدر يقعد معاك اكتر من 9 ساعات شغل متواصل بس مش جيمز طبعاً
  
  3- الشاشة اكبر وافضل في واقعية الالوان والاس 4 شاشته ممتازة بردو بس تحس ان الوانها فاقعة ومش واقعية علي عكس الزد 2
  
  4- صافي الذاكرة الداخلية اكبر وتقدر تحط كارت ميموري لغاية 128 جيجا
  
  5_ البروسيسور اقوي وده واضح اوي علي ارض الواقع هتلاقي الزد 2 اسرع واخف بكتير من الاس 4 ووبردو ده بسبب الواجهة بتاعته مش زي بتاعت سامسونج
  
  6- الرامات اعلي وده هيفرق في المستقبل في التحديثات والالعاب
  
  7- بيدعم راديو
  
  8- خاماته افضل بكتير
  
  9- ضد المياة والتراب
  
  10- صوته انقي واوضح وعالي
  
  11- السماعات بتاعته قدام مش في ظهر الجهاز ودي ميزة مهمة لان السماعات لما بتكون في الظهر وانتا حاطت الجهاز علي ظهره الصوت بيكون مكتوم وممكن متسمعوش اصلا ودي بتفرق معايا انا شخصياً
  
  دي كانت تجربتي للجهازين ودي الفروقات اللي انا حسيت بيها
  
  الاس 4 بعد اخر تحديث بعد اسرع شوية لكن مهما نزله تحديثات تحسن من اداءة عمره ما هيتخطي الزد 2 في السرعة ابدا لان الزد 2 يعتبر اندرويد خام يعني سريع جدا ومش بيهنج الا نادراً
  
  فانا شايف ان المقارنة بينهم لا تجوز ممكن تقارنه بالاس 5 او النوت 4 من سامسونج لكن اقل من كدة لأ
  
  وبالنسبة للكاميرا حضرتك هتلاقي مقارنة بين الاتنين في موضوع مثبت في صفحة الزد 2 تقدر تشوفها لو تحب

---