تقييم جهاز Samsung Galaxy S6

بسم الله الرحمن الرحيم

ده تقييمي لجهاز Samsung Galaxy S6 ، في البداية احب اوضح حاجة وهي ان الجهاز ده من افضل اجهزة سامسونج حتي الان من وجهة نظري من حيث الشاشة والخامات والتصميم والكاميرا والسرعة والاداء

والتقرير ده للناس اللي عاوزة تشتري الجهاز بس مترددة

اولا التصميم والخامات :-

الجلاكسي اس 6 زي ما قلت من افضل اجهزة سامسونج من حيث التصميم والخامات وتصميمه يعتبر قريب جدا من تصميم سلسلة هواتف Sony Xperia Z

وبيتميز ان ظهره من الزجاج وعليه حماية من الخدوش Corning Gorilla Glass 4 من الامام والخلف والفريم بتاعه من المعدن مش البلاستك كعادة اجهزة سامسونج لكن لازم اللي يشتريه يجيبله جراب لحماية الظهر بالذات خصوصا ان الكاميرا الخلفية بارزة شوية ومن السهل انها تتكسر من اخف الوقعات وكمان بيتميز انه نحيف جدا ووزنه خفيف ومتوفر بالوان جميلة وهي الذهبي والاسود والابيض والازرق واديله في التصميم والخامات 8/10

ثانياً الشاشة :-

بإختصار شاشة الاس 6 من افضل الشاشات في اي سمارت لغاية دلوقتي وبتتميز بالسطوع العالي حتي مع تخفيف السطوع علي اقل درجة بردو الشاشة بتكون واضحة والوانها جميلة وبتميل للواقعية علي عكس اجهزة سامسونج السابقة وحجم الشاشة ممتاز جدا ومريحة في الجيمز ومشاهدة الافلام واديلة في الشاشة 10/10

ثالثاً السرعة :-

ودي من اهم مميزات الاس 6 وهي السرعة اللي تحسنت بشكل رهيب عن كل اجهزة سامسونج اللي فاتت وطبعا الكل عارف ان البطيء والتهنيج كانت من اكتر المشاكل اللي بتواجه مستخدمي اجهزة سامسونج لكن في الاس 6 المشكلة دي اتحلت بنسبة 95% الجهاز استجابته للاوامر سريعة جدا والتاتش سلس جدا وبيفتح التطبيقات والالعاب في لحظتها والتهنيج تقريباً منعدم وفعلاً الجهاز ده بقي منافس قوي للاجهزة التانية في السرعة زي iphone 6 و HTC One M9 و Sony Xperia Z3 Plus واديله في السرعة 9.5/10

رابعاً اداء الجهاز في الالعاب :-

الاس 6 بيشغل جميع الالعاب من غير تهنيج او بطئ لكن في بعض الالعاب زي GTA San Andreas بيكون في تأخير بسيط احيانا لما بتكون ظابط اعدادات اللعبة كلها علي Max وده في كل اجهزة الاندرويد لكن غير كدة الجهاز ما شاء الله اداءه رائع في الالعاب وده يرجع للبروسيسور القوي وكارت الشاشة والرامات + ازالة 95% من الحركات اللي كانت موجودة في الاجهزة السابقة زي Galaxy S4, S5 واللي كانت بتأثر بالسلب علي اداء وسرعة الجهاز بشكل عام واديله 9.5/10

خامساً البطارية :-

طبعاً لان الجهاز مكنش معايا لفترة طويلة مقدرتش اقيم البطارية تقييم كامل لكن عن تجربتي البسيطة للجهاز لقيت ان البطارية جيدة الي حد كبير لكن مقدرش اقول عليها قوية وبردو مقدرش اقول عليها ضعيفة لكن يعتبر ادائها متوسط لكن طبعاً في خصائص لتوفير الطاقة في الجهاز وبتحسن من اداء البطارية بشكل واضح وبتخليها تدوم لفترات اطول من الطبيعي وطبعاً من اهم مميزات الجهاز خاصية الشحن السريع واللي بتخلي الجهاز يشحن من 0 الي 100% في ساعة واحدة تقريباً واديله في البطارية 7.5/10

سادساً الكاميرا :-

كاميرا الاس 6 من افضل الكاميرات حتي الان من حيث واقعية الالوان والتفاصيل والزووم وسرعة التصوير والكاميرا الامامية ممتازة جداً واديله في الكاميرا 9.5/10

سابعاً الصوت :-

صوت الجهاز قوي ونقي لكن طبعاً صوته لايرقي لجهاز HTC One M8, M9 لكن صوته مرضي جدا واديله 8/10

ثامناً خاصية البصمة :-

اللي اقدر اقوله انها اتحسنت كتير عن الاول واستجابتها اسرع بفرق واضح وتقريبا بقت زي الايفون بالظبط 10/10



وطبعاً الاس 6 زي اي جهاز فيه عيوب وعيوبه بالنسبالي هي اﻷتي :-

بطارية غير قابلة للازالة _لا يدعم كارت ميموري_الكاميرا بارزة شوية وسهل انها تتكسر لو مفيش جراب _استهلاك الرام عالي لكن مش مأثر نهائي علي اداء الجهاز _لا يدعم راديو

ده باختصار تقييمي للاس 6 وانا شايف انه يستحق ان الواحد يشتريه لكن اللي معاه النوت 4 ميغيروش ويجيب الاس 6 لان الفروقات ما بينهم ضئيلة جداً وكمان في نقاط تفوق للنوت 4 زي البطارية القابلة للازالة ودعم كارت الميموري وحجم الشاشة والقلم

لكن انصح اللي عاوز يشتريه يصبر عليه شوية كام شهر عشان سعره بينزل بسرعة لان الاقبال عليه مش كبير زي الاجهزة المنافسة ليه واتوقع سعره يبقي زي سعر النوت 4 بعد فترة قصيرة

واي استفسار انا في الخدمة :)