armada7

احدث المشاراكات

• 2011-11-07 (06:09:07PM) Sony Ericsson XPERIA Neo

  انا شوفت مشكلتك وشكلك محتار
  اولا طبعا مش معقولة انك تعمل اعادة ضبط المصنع اكتر من مرة فى وقت قصير جدا
  ده ممكن يكون عيب فى الجهاز وعشان كده خليك متمسك فى حقك ال14 يوم وتطلب انك تغير الموبايل لان المشكلة رجعت تانى او تسيبو هم يوده التوكيل بس الحل ده انا لو مكانك مش هعمله طبعا
  طالما معاك فاتورة ولسه مدة ضمان المحل مخلصتش من حقك انك تغير الموبايل على طول فى اول ظهور عيب فيه ولو حد من المحل حاول يلعب بالكلام عشان انا تعاملت كتير مع الناس دى عرفه حقك وحقه وقوله انا معايا فاتورة وجهاز حماية المستهلك لسه موجود وفعلا ممكن بيكونو قاصدين يضيعو فترة ال14 يوم دول قصد

---

• 2011-09-29 (09:14:25AM) Sony Ericsson XPERIA Neo

  اهم حاجة بالنسبة لك المتانة وان الموبايل يعيش يبقى تستنى الديفى بلس لان الديفى العادى موبايل ممتاز فى حكاية المتانة وزى ما شفت على النت جربت كل حاجة فيه لاقيته ضد المية والصدمات يعنى موبايل بامانة هيعيش بس استنى النسخة الاحدث منه اللى هيا ديفى بلس هيكون امكانيات اعلى نسبيا واهم حاجة البطارية هتكون اعلى لان الديفى العادى من مشاكله البطارية
  ده طبعا لو عايز موبايل يعيش معاك مدة وبالنسبة للتحديث ف ده بيتوقف على مبيعات الموبايل فلا موبايلات فى سامسونج منزلهاش تحديث مع ان امكانيتها تسمح بس مبيعات الموبايل قليلة وفى موبايلات بتبقى مشهورة والناس بتطلب تحديث ليها ف بينزل بس عادة للاسف موتورولا بينزلها التحديث متاخر ولنسخة واحدة للامام زى الديفى العادى كان 2.1 ونزله تحديث 2.2 ممكن ينزله 2.3 الله اعلم مش مضمونة لانهم اعلنوا عن الديفى بلس انه هينزل 2.3 غير كده لو مش عجبك الخيارات هتكون كتير بس مش بنفس المتانة وعامة استنى شوية لسه فى موبايلات كتير هتنزل مصر خلال الشهرين اللى جايين دول

---

• 2011-09-29 (09:07:16AM) Sony Ericsson XPERIA Neo

  shahynaz
  اكسبيريا ارك تقريبا نفس المواصفات بس شاشة اكبر موبايل جميل جدا بس فيه عيب وانا شفته بنفسى بيهنج عند التنقل ما بين القوائم والحقيقة جربت الحكاية دى فى كذا موبايل ارك ونفس النتيجة
  يمكن يكون التهنيج مش ملحوظ اوى يعنى بس بالنسبة لى كان ممكن يبقى مقرف خاصة لو شغلك على الموبايل كتير زيى ولو فتحت اكت من حاجة فى وقت واحد غير ان الشاشة كبيرة نوعا ما وطبعا الحكاية دى اذواق فى ناس بتحب وتقدر تستحمل كبر حجمه وناس تانية لا حاجة تانية لاحظتها فيه الجاك بتاع السماعة من الجنب الشمال وطبعا الحكاية دى بالنسبة لى ممكن تضايقنى لو حاطط السماعة وجيت احطه فى جيبى مثلا
  بغض النظر عن العيوب دى ف الجهاز ك امكانيات جميل وشكله اشيك بكتير ولو العيوب دى مش مهمة يبقى خلاص توكلى على الله بس على الله القرار يبقى بسرعة لانى للاسف لسه كنت فى موبايل شوب امبارح وقالى دفعة النيو خلصت من عندهم وميعرفش اذا هيجى منه تانى امتى
  
  moriano
  البصمات دى عادى على فكرة ويمكن الموبايل لما يبقى معاك تعاملك معاه يبقى مختلف عن تعاملى انا معاه ولو ده الحاجة الوحيدة اللى قلقان منها احب اقولك توكل على الله لو دخل دماغك والعيب ده ولا حاجة يعنى

---

• 2011-09-27 (11:29:02AM) Sony Ericsson XPERIA Neo

  shahynaz
  الحقيقة الاندرويد فى اكتر من برنامج رائع لتقليل من استهلاك البطارية بس المشكلة انى استخدامى للموبايل بيكون فى معظم الوقت ف مهما عملت برده البطارية مش هتكمل يوم او بتكمله بالعافية
  
  moriano
  بص موضوع البصمات يعنى بصمات ايدك بتطبع على الجهاز سواء الشاشة او الضهر بتاع الموبايل واحيانا بيبقى تنظيفه مقرف بتفضل تمسح فيها
  اما من ناحية الالوان عندك 3 بس الفضى والازرق والاحمر او النبيتى الفاتح
  الاحمر لسه منزلش على اخر السنة هينزل مصر او ممكن فى خلال الشهرين او ممكن تلاقى الاحمر بس فى محلات معينة زى ابليناس اللى فى سيتى ستارز لو انت من القاهرة بس ممكن يكون اغلى
  واختيار اللون يرجع لذوقك انا مثلا بحب الغوامق ف اشترى الازرق انت ممكن تحب الفضى وعلى فكرة لون فخم جدا

---

• 2011-09-26 (02:01:05PM) Sony Ericsson XPERIA Neo

  النيو موبايل ممتاز خصوصا فى الجزء المتعلق بالمالتيميديا سواء من اداء الكاميرا او سماع الاغانى او حتى مساهدة الفيديوهات على الشاشة اللى اقل ما يقال عنها انها ممتازة
  المميزات والعيوب باختصار
  اداء عالى ومفيش تهنيج الا عند استخدام كذا تطبيق مفتوح فى نفس الوقت
  الكاميرا ممتازة على قد السعر سواء فى تفاصيل الصورة ووضوح التباين وقلة التشويش فيها ولكن للاسف عند عرضها على اللاب الصورة مش بتطلع جميلة وتمت مقارنتها با آى فون طلعت الصور اقل فى جودة الصورة وده ناتج على ان الصورة بيحصلها عملية ضغط عشان تكون مساحتها صغيرة بس ده مجرد عيب بسيط مش هيفرق كتير مع الهواة
  زرار الكاميرا حساس شوية او انا اللى يمكن ايدى كانت تقيلة حبتين بس برده عيب لا يذكر
  البطارية اسوء العيوب على الاطلاق تقريبا بتكمل يوم كامل مع استخدام فوق المتوسط و18 ساعة مع استخدام المجهد وده بسبب الشاشة مع العلم انك لو قفلت خاصية البرافيا اللى بتسبب وضوح وسطوع الشاشة ممكن تضيف من 4 الى 6 ساعات الى عمر البطارية
  التاتش ممتاز ويمكن من احسن اجهزة التاتش اللى شوفتها بالرغم ان فى بعض الاوقات بيكون حساس جدا بس تمام برده
  نقطة تانية التصفح على النت سريع وكويس جدا على قد السعر لانى شوفت موبايلات التصفح اسرع بمراحل مع الاستجابة لاقل سرعات المصدر
  خامة الجهاز للاسف مش مريجة شوية اولا بلاستيك بس مش ده العيب للاسف انه glossy
  بمعنى انه مغنطيس للبصمات ونفس الكلام على الشاشة ودى حاجة منرفزة جدا الحقيقة خصوصا لو كان لون الموبايل الازرق الغامق
  امكانيات مقابل السعر ادى الموبايل ده 8 من 10 وده تقييم ممتاز خصوصا انه فى الفئة المتوسطة بس برده كان ممكن يبقى اعلى من كده وانا اقصد هنا على خامة الموبايل فقط وليس التصميم الفاخر
  بالنسبة للبدائل للناس اللى مش حابة سونى مع انها شركة محترمة جدا وليها سوق ومشتريين فى جميع الانحاء
  
  فى موتورولا ديفى وده من امتن الموبايلات اللى شوفتها وكمان اداؤه عالى جدا ويكاد ميكونش فيه عيب الا جودة الكاميرا فقط والعيب الازلى فى جميع الاندرويد البطارية تقريبا يوم ونص لو الاستخدام عالى
  واللى حابب يستنى ممكن النسخة المحدثة منه الديفى بلس هتكون احسن واعلى فى البروسيسور والبطارية على اخر السنة ان شاء الله
  اعتقد مفيش غير الموبايلين دول لمنافسة النيو فى نفس الفئة السعرية وفى معادلة الاداء العالى مقابل السعر المناسب
  

---

• 2011-01-15 LG GW620

  tomaaa
  هو ياريت تحددى حضرتك عايزة ايه فى الموبايل يعنى موبايل يكون للنت وشغل مكتبى ولا موبايل مالتيميديا وياترى هل يهم حضرتك البرامج والتطبيقات والثيمات والالعاب و ايه وكمان حتة الكاميرا هل مهم انها تكون ممتازة ولا يكفى بالجيدة
  
  وبالنسبة ان الموبيلات دى كلها تاتش انهى نوع من التاتش هيناسبك ريزيستيف ولا كابستيف
  
  كمان حجم الموبايل مش مشكلة ولا عادى لان فى موبيلات من اللى حضرتك قايلة عليهم بيعدى طولها 13 سم وحجم شاشتها اربعة بوصة ف اكيد النقطة دى لازم تتحط فى الاعتبار
  
  كمان السعر لان طبعا فى اسعار موبايلات من المذكورة سعرها بيكون ضعف للتانية
  
  ف لازم الرنج بتاع السعر يتحدد كمان هل مهمة بالنسبة لك اللغة العربية انها تكون فى الموبايل لان فى موبيلات زى الاتش تى سى مفيهاش عربى
  
  كمان هل مهمة الكاميرا الامامية لان فى موبيلات من الموجودة ملهمش كاميرا امامية للفيديو كول
  
  يعنى ياريت المواصفات كاملة عشان اقدر افيد لان فعلا الموبيلات دى مختلفة عن بعضها فى كل حاجة فى الانظمة وسرعاتها والكاميرا والخصائص والتاتش وكمان الاسعار
  
  بس مبدئيا انا شايف ان احسن واحد فيهم c6-01
  لانه طبعا فى مميزات مش موجودة فى الباقى منها الشاشة بتاعته amoled
  وطبعا الشاشة دى تعتبر من احسن انواع الشاشات لانها صافية ودقيقة جدا فى الالوان وكمان موفرة للطاقة عشان متسحبش من البطارية
  
  كمان الكاميرا بتاعته 8 ميجا بيكسل بس العيب الوحيد فيها انها فيكسد فوكس وليست اوتو فوكس بس طبعا عيب لا يذكر بالنسبة للميزاته
  
  خامة الموبايل طبعا ممتازة وكلها مصنوعة من مادة مقاومة للخدش وكمان يعتبر اعلى موبايل من حيث استجابته لسرعة الشبكات
  البلوتوث بتاعه احسن فيرجن والبروسيسور بتاعه جيد جدا وللكن لا يعتبر سريع
  (اسرع موبايل فى دول السامسونج الجيت لان البروسيسور بتاعه 800 ميجا هيرتز وكمان يعتبر من اسرع الموبايلات فى السوق وده لانه جافا مش موبايل سمارت )
  تصوير الفيديو كمان فيه 720بى وده احسن تصوير فيديو فى الموبيلات كلها بصفة عامة
  وكمان البطارية بتاعته مش بطالة
  اما بالنسبة للعيوب ان البطارية ممكن تخلص بسرعة لو الاعتماد على الموبايل كبير يعنى بيتشغل عليه افلام وموسيقى ونت كل ده بيخليه يخلص بسرعة
  كمان الموبايل بيعتمد على التطبيقات الثرى دى ودى قليلة لسه منتشرتش
  
  دى العيوب الاولوية وطبعا عشان لسه نازل ف لسه عيوبه موضحتش اوى بس فى المجمل
  
  ارتبلك الموبيلات دى تبعا للاحسن فى المميزات
  1-c6-01
  2-x6
  3-htc wildfire
  4-LG bl40 new choc
  5-xperia x10 mini pro
  6-s8000 jet
  7-c6
  8-c5-03
  
  وبالرغم من السى 6 نوكيا ميزاته جميلة بس التاتش بتاعه ريزيستيف وده زى ما قلت مش الاحدث فى انواع التاتش يعنى ممكن بعد طول استعمال يكون مقرف شوية

---

• 2011-01-13 Samsung S5330 Wave533

  عايز حد يجاوبنى عن الموبايل ده
  صوته فى الهيد فون عامل ازاى كويس ولا عالى ولا عالى جدا
  ثانيا انا شوفت نظام البادا والحقيقة هو حلو مش وحش اطلاقا بس عايز اعرف فى المجمل النظام ده حلو فى التعامل ولا معقد شوية ولا ايه وبالنسبة لتطبيقاته الموبايل ده تطبيقاته سهلة التثبيت ولا ايه
  كمان الكاميرا هل هيا متوسطة ولا فوق المتوسط ولا جيدة جدا فى ضوء النهار
  
  كمان فى بعض الريفيوهات على اليوتيوب ناس بتقول ان الملتى تاتش بتاعه المستخدم فى الزوم سواء فى الصور او الانترنت مش سريع الاستجابة وكانك بتتعامل مع موبايل ريزيستيف
  
  حاجة تانية فى ناس بتقول وانا شوفتها قدام عينى على ريفيو ال scroll
  بتاع الموبايل اثناء التصفح مش سهل يعنى لازم تصبر شوية عليه
  وايه اخبار الخامة بتاعته هل هو فعلا صحيح بلاستيك ردىء ولا ايه بظبط
  السلايد يا ترى اخباره ايه سلايد جامد ويستحمل ولا ايه اصل انا ظروف دراستى بتبقى معامل وورش فهل هيستحمل ولا ايه
  وصوته فى السبيكر عامل ازاى عالى ومسموع ولا ايه
  الكواليتى بتاعت الالوان حلوة ولا متوسطة وياترى عاملة ازاى فى ضوء النهار لو حد ماشى فى الشارع فى عز الشمس هيشوف حاجة ولا ايه
  كمان عايز اعرف استجابة النت سريع ولا بطىء ولا ايه اخباره خصوصا انه مش جيل تالت
  وعايز اعرف فعلا البطارية مش بتكمل يومين ؟
  
  وهكون شاكر جدا لاى حد هيرد على استفساراتى

---

• 2011-01-13 LG GW620

  tomaaa
  هو الموبايل فى المجمل حلو كفاية ان نظام التشغيل بتاعه اندرويد والاندرويد من اقوى انظمة التشغيل لان ليه تطبيقات كتيرة جدا شاملة العاب وبرامج و....الخ
  هو الموبايل فى مشكلة البلوتوث انه مش بيبعت غير لنفس نوع الموبايل بس يعنى لو اى موبايل تانى غير النوع ده البلوتوث مش هيتعرف عليه وطبعا المشكلة دى اتحلت بعد صدور اصدار جديد من الاندرويد يعنى لو تم شراء الموبايل الاحسن ان الواحد يعمل ابديت
  ليه وهيلاقى مشكلة البلوتوث اتحلت تماما
  بالنسبه للسماعه الخارجيه بتاعته صوتها مسموع بس مش عالي قوي
  مش زي الموبايلات التانيه صوته اقل كتير
  وفى الهيدفون برده فوق المتوسط
  الشاشة التاتش بتاعته ريزيستيف يعنى من النوع المقاوم اللى لازم ضغط باطراف الاصابع وبالرغم من ان نوع الشاشات ده قدم نوعا ما لان الكل دلوقتى بيفضل الكابستيف بس برده يقضى الحال والفرق طبعا بين النوعين فى قدرة الاستجابة والفرق طبعا لصالح الكابستيف قدرة استجابتها عالية ......اشرع بشكل عام وحساسة جدا لمواضع الاصابع
  
  الكاميرا بتاعته جميلة وفيها فلاش اعتقد انها جيدة جدا
  
  فى حاجة تانية انه مش بيشغل مش بيشغل فلاش مواقع يعنى بمعنى مش بيشغل المواقع اللى فيها فيديو زى اليوتيوب
  
  مينفعش حد يشغل الراديو على السبيكر مفيهوش يعنى الخاصية دى
  
  وطبعا مفيهوش فيديو كول
  
  اتمنى انى اكون قدمت افادة لجميع

---

اعلانات المستعمل