تــقـيم شامل لجهاز Sony Xperia Z1

السلام عليكم ورحمة الله وبركاته

ده اول تقيم ليا عن جهاز

هنتكلم فى التقيم ده عن عيوب ومميزات الجهاز الجبار الاكسبيريا زد 1 وعن تجربة شخصية لان الجهاز اصلا معايا
واول ميزة في الجهاز انه ضد المياه وضد الصدمات
الجهاز نسخة متطورة تقريبا من جهاز الاكسبيريا زد العادى ولكن يختلف تصميم الجهاز بالتاكيد

والمواصفات بقت اعلى بكتير اوووى

هنتكلم عن الشاشة
المميزات :- الشاشة بمساحة 5 إنش Full HD بكثافة 441 بيكسل لكل بوصة
الشاشة قوية جدا ومحمية بطبقة من جوريلا جلاس اى ضد الصدمات والالوان واضحة جدا
والتاتش سريع جدا و سرعة الاستجابة عالية وده عن تجربة شخصية

العيوب :- يوجد بها عيب وحيد وهو انك لما تيجى تبص للشاشة من زاوية هتكون الرؤية غير واضحة يعنى لما تكون ماسك الجهاز وواحد صاحبك قاعد جنبك وبيشوف بتعمل ايه مش هتكون الرؤية واضحة عنده زى ما انت شايف

تقيمى للشاشة : 9/10

( الكاميرة )

سونى ابدعت بمعنى الكلمة فى كاميرة اصداراتها لجهاز الاكسبيريا سواء كان فى زد 1 او زد 2 او زد3
مع اختلافات من منتج لاخر

اللمميزات :- الجهاز فيه كاميرة خلفية بدقة 20.7 بيكسل وتعمل بتقنية G Lens وهذه التقنية اخذت جوائز لدقتها فى التصوير ،، والكاميرة هتديك صورة فوق الممتازة ونسبة ريزولوشن عالية جدا فى التصوير فى البسين او حمام السباحة لو بتحب المغامرة انت واصحابك ومن عشاق التصوير والسباحة فى نفس الوقت
والكاميرة بتقوم بتصوير فيديو Full HD يعنى اكيد نسبة الريزولوشن هتبقى عالية جدا وهتبقى الصورة واضحة لو حبيت تعرضة ع اليوتيوب او تنزله ع الفيس بوك
ويوجد به كاميرة امامية بدقة 2.2 ميجا بيكسل ودى اكيد كافية انك تعمل مكالمات فيديو بوضوح

العيوب :- الكاميرة الخلفية غير جيدة فى التصوير الليلى وتظهر الصور غير واضحة

تقيمى للكاميرة 9/10

( الميكروفون - والاسبيكر )


السماعات الخارجية جيدة يعنى صوتها يقدر يسمعك لو فى مكان مغلق اما لو فى الشارع او فى زحمة او مكان فى صوت عالى صعب انك تسمع صوت الجهاز كمان السماعة الداخلية صوتها هيكون واطى معاك لو انت فى الشارع لكن ودانك هتبدء تتعود ع الصوت ده وتدريجيا هتبدء تسمع بوضوح

والسبب فى ده ان الجهاز ضد المياه فــــكـــان لازم ان سونى تحافظ ع السماعات من التلف من المياه وكان لازم تخفى السماعات داخل الجهاز وتحيطها ب غلاف معدنى يمنع وصول المياه والاتربة اليها
والصوت ده بالنسبة لجهاز ضد المياه والاتربة كويس جدا

تقيمى للصوت :8/10

( جسم الجهاز )

المميزات : سونى صنعت الجهاز من اجود الخامات الموجودة فى السوق حتى الان واستخدمت هذه الخامات فى صناعات كل منتجات الاكسبيريا
فجهاز اكسبيريا زد 1 ظهره وجوانبه مصنوعه بطبقة من الالومونيوم والتى عليها طبقة من الظهر من الزجاج القوى الذى يحافظ ع الجهاز من الصدمات والكسر
وسونى قامت بهذا حتى يتحمل الجهاز كل الصعاب والحياة اليومية الشاقة

العيوب :- قد يحس البعض منكم ان الجهاز وزنه ثقيل وهذا لانه مصنوع من خامات ثقيلة مثل الالومونيوم والزجاج

تقيمى لجسم الجهاز :- 10/10

( اداء الجهاز )

الجهاز قوى جدا ما شاء الله عليه من حيث الاستخدامات انا بشتغل عليه كتير جدا برامج وتصفح انترنت وفيس بوك والعاب ثقيلة والحمد لله شغال جدا ومشوفتش منه اى تهنيج وجربته ع اقوى لعبة وهى Asphalt8 الغنية عن التعريف والجهاز ما شاء الله عليه شغلها بكل بساطة وكان شغال تمام

المميزات : وده لان الجهاز يوجد به اقوى انواع المعالجات حتى الان وهو Snap Dragon 800
معالج ثمانى النواه 2.2 جيجا هيرتز
رامات 2 جيجا
واكيد بروسيسور قوي زى ده مع رامات عالية اكيد هيديك اداء فوق الممتاز للجهاز

العيوب : 1- الجهاز بيبدء يسخن اوووى لما تشغل عليه تطبيقات كتيرة او حاجة تقيلة لكن انت ممكن تحلها بانك تركب للجهاز Cover والسخونية الصادرة عنه معقولة مفهاش ضرر على مكونات الجهاز الداخلية
2 - البروسيسور Snap Dragon عيبه الوحيد انه يعمل بكامل قوته يعنى حتى لو مشغل صورة او اغنية برضة بيشتغل زى ما يكون بتلعب لعبة تقيلة يعنى بيعمل بكامل قوته فى كل الاوقات وده طبعا بينعكس بتأثيره ع عمر البطارية وسرعة نفاذها

تقيمى لاداء الجهاز : 10/10


( مساحة الجهاز )

الجهاز بيأتى بمساحة داخلية 16 جيجا وانا شايف من وجهة نظرى ان المساحة دى غير كافية لتنزيل تطبيقات والعاب ع المدى الطويل لان حاليا كل الشركات بقت بتنزل اصداراتها بمساحة ع الاقل 32جيجا
لكن فى كل الاحوال انت عندك امكانية تزود مساحة الجهاز بكارت ميمورى يصل الى 128 جيجا

تقيمى لمساحة الجهاز : 7/10

( البطارية )

للاسف البطارية مشكلة كل سمارت فون ولازم هتضطر تشحنها فى نهاية كل يوم

بطارية الجهاز تأتى بقوة 3200 ملى امبير
هى بتقعد معايا فى التحدث يعنى انا فى مرة شحنت الموبايل وكنت قاعد فى البيت مخرجتش ومستخدمتش الموبايل خالص غير فى مكالمات بس طويلة اووووى الجهاز قعد معايا اكتر من 24 ساعة
لكن فى الوضع العادى والاستخدام الطبيعى هتقعد معاك 12 ساعة

تقيمى للبطارية : 9/10


انتهى التقيم الشامل لجهاز Sony Xperia Z1