بدون عنوان

لو سمحتوا انا محتارة بين
Note 8
و Note 2
انا استخدامي مش هيبقا لعب كتير هيبقا استخدام لعب بسيط بس هحتاج اشوف عليه فيديوهات وافتح ملفات pdf, word, excel
عاجبني نوت 8 عشان حجمه بس في نفس الوقت استخدامه كموبيل حاساه حجمه كبير
و بقول مش فارق الفرق بينهم عشان الكاميرا تبقي كويسة
مش عارفة بجد محتارة بقالي شهر ياريت حد يفيدني ارجوكوااااااااا :(

انا برضه البطارية بتقعد معايا 5.5 ساعات screen on استخدام wifi متواصل وتصفح قريت فى ال xda ان حل المشكلة دى تخريج البطارية كام ساعة ومن ثم اعادتها

مستحيييييييل يا سارة تكونى بتعملى كل اللى قولت علية .، والبطارية تبقى معاكى كدة .، أنا مش أول مرة أستخدم أندرويد .، وعارف بقول إيه ..
ياعنى بتقفلى الفون وتشحنيه مقفول .، نت شريحة ، واى فاى قليل أو عند الزوم .، مابتنسيش الجهاز ع الشاحن .، لأ إتبعى الخطوات تانى وهتشوفى النتيجة بعد 4 أيام من أتباع الخطوات هاتلاقى البطارية بتتحسن كتييييير جدا .،

لو قابلتك المشكلة تانى .، إبعتيلى ع الخاص ..

الف مبروك ام يوسف علي النوت ، ربنا يباركلك فيه ، معلش لسه شايفه رسالتك ، الحمدلله إنك غيرتيه

بخصوص البطارية أستاذ أرشيدياكون أنا بعمل كل اللي قولت عليه دا بالحرف بفضي الرام بإستمرار ، والإضاءة قليلة ، والنت من الخط ، ومع ذلك من4 ساعات ل 5 ساعات النوت بيشتغل مش اكتر من كده
ومافيهوش تسريب شحن زي النوت القديم بتاع ام يوسف ، واما بنتهي من استخدامه بقفله علي وضع الطيران
وبعد ما كنت بشحنه علي وضع الطيران بقيت بقفله خالص
ومع ذلك يبقي الحال علي ما هو عليه

الامر لله جزاك الله خيرا كفاية ذوقك والله

الحمد لله .، ربنا يباركلك فيه .، ويبارك فى ولاد حضرتك .، لو إحتاجتى أى حاجة كلنا تحت أمرك :)

استاذ هارد
ما احنا موجودين علشان نفيد بعض و الواحد زى ما الموقع افاده لازم هو كمان يفيد غيره
متشكرة لمرور حضرتك :)


استاذ ارشيديا
ده اللى كنت حاطه ايدى على قلبى منه انه يقولى ماينفعش يرجع او يماطل معايا بس هو لما شافه لسه بلزقة الضهر و الجناب قاللى خلاص هاخده مرتجع وهاديكى واحد تانى
اصل انا كنت جايبه منه تابات لولادى بردو مفيش من شهرين ف يمكن علشان انا زبونة ف مرضاش يزعلنى او يمكن هو ذوق عموما الله اعلم انا اللى يخصنى انه رجعه و الحمد لله الجديد تمام

أم يوسف / مبروك يا ست الكل ربنا يحفظهولك من كل شر ، ويفرحك دايما -:)
وكويس إن حضرتك بدلتيه بسرعة قبل ماكان صاحب المحل يرفض أو يتحجج بإنه إتفتحت علبته وكدة ، لأن فى ناس كتير بتعمل كدة ، بس الحمد لله ، نشكر الله

استاذ ارشيدياكون
اهو انا شحنت النوت امبارح اول شحنه قعد تقريبا ساعتين ونص يشحن و استعملته 4 ساعات متواصله بأه 67% ونمت ولما صحيت لقيته 66%
كده طبيعى الحمد لله انما اصحى الاقيه ناقص 15% كانت صدمة بالنسبالى بصراحة
و ما شاء الله بطاريته كويسة جدا الحمد لله

جبته من شارع العريش فى الهرم
ده انا بدلت اتنين فى اسبوع واحد :) انا اعرف 3 اماكن بيبيعوه بس عموما شارع العريش ده شارع كبير فى محلات موبايلات كتير وانا حتى جبته من محل صغير مش مشهور هناك يعنى ان شاء الله لو رحت لمحل كبير زى راديو رضوان او سوليتير هتلاقيه

جبتيه منين انا مش لاقياه خالص

متشكرة جدا لحضرتك الف شكر بجد بس انا رجعت الجهاز وجبت واحد تانى لان انا كان معايا تاب قبله كان معايا تاب 2 10 انش و بعته وجبت النوت 8 و فى الموبايلات كان معايا نوت 2 وحاليا اكسبيريا زد وان وعمر ما حاجة منهم نقصت كمية الشحن دى بدون استخدام
انا قبل ما ارجعه جربت اقفله خالص واشوف هاينقص اد ايه لاقيته فى نص ساعه نقص 2% وانا قفلاه يعنى كان بيسرب شحن ف كده شئ مش طبيعى
رحت للمكان اللى اشتريته منه و الحمد لله الجهاز كان لسه بلزقته علشان كده بدلهولى بواحد تانى و طبعا الفرق شاسع فى استهلاك البطارية ما بين الاتنين
بس انا عموما هاتبع نصايح حضرتك لانها مفيدة جدا
و من ناحية الجهاز فهو فعلا ما شاء الله جهاز كويس جدا وامكانياته عالية اضافة انه حجم مناسب وكمان فئة النوت ف كل دى مميزات تخاليه يستحق الاقتناء
متشكرة لحضرتك جدا و جزاك الله كل خير

omyoussef و SaraM7md .. بصوا حضراتكم بالنسبة لموضوع البطارية .، أنا معايا النوت 8 من فترة .، والبطارية لازم حضراتكوا تتبعوا شوية خطوات بسيطة وهاتبقى مرضية جدا .، لأن النوت 8 فعلا أفضل تابلت 8 أنش نزل فى السوق حتى الآن من أمكانيات لبطارية لبروسيسور لرامات لشاشة .، كل حاجة
المهم :

نشيل أى برنامج للبطارية نهائى .، كلهم مالهومش لازمة
نخلى أضائة الشاشة أقل من النصف وليكن مابين 30 ل 40 فى المية كدة أقل من النصف لأن شاشة النوت HD وبيور جدا حتى عند أقل أضائة تعطى صورة جيدة جدا جدا
نخلى الشاشة تطفى بعد 15 ثانية تلقائى من الضبط
ياريت .، ويفضل لضمان أطول عمر للطاقة عند أستخدام النت .، يكون من نت ال 3G من الباقة بلاش الوايرلس ( WIFI ) كتير لسبب أن الواى فاى مش بيخلص على البطارية بسرعة .، ده بياكل البطارية .، وأنا صدقونى على أستخدامى الشخصى لما تركت الواى فاى وأشتغلت نت شريحة وعملت باقة نت ب 20 جنيه شهريا صدقونى البطارية شغالة معايا 8 و 9 ساعات نت متواصل فايبر و بى بى أم .، وتصفح وألعاب وكل حاجة .، جربوا نصيحتى وأدعولى
ياريت نشحن الجهاز لما يوصل ل 10 % ونسيبه لغاية مايبقى 100 % مانستخدمهوش خالص عشان مانرهقش البطارية .، وياريت يكون الجهاز مقفول أو فى وضع الطيران .، وأفضل يكون مقفول .. أنا حاليا بعمل أيه أستخدمه طول النهار عادى .، وآجى باليل كدة أقفله وسيبه على الشاحن أقوم الفجر ألاقيه تمام بقى 100 % .، وكمان ياريت تعملوا الخطوات دى كنت ذكرتها قبل كدة فى تقرير عن زيادة الفرى رام للجهاز وغلق كل التطبيقات المفتوحة .، والتقرير أهو :

من أجل تحقيق أعلى أداء تنتظره من أى هاتف أو تابلت أندرويد عليك أتباع الآتى خطوة خطوة :

تقليل إستهلاك الطاقة من :
1. تقليل سطوع الشاشة وليكن للنصف وياريت أقل بلاش يزيد عن كدة
2 . مسح أى برنامج للبطارية لأنهم ملهومش أى لازمة وكفاية وضع توفير الطاقة
3 . تخلى إضائة مفاتيح الرجوع والخيارات ثانية ونصف
4 . تقفل كل حاجة فى صفحة الإشعارات من وضع القيادة والسكون الذكى ووضع القراءة و... و... وخلى بس وضع توفير الطاقة والتدوير التلقائى لما تكون بتستخدمه فقط
5 . تقفل كل التطبيقات المفتوحة وتعمل كلير للميمورى ( الرام ) بإستمرار
6 . تشحن جهازك وهو 10 % لحد ما يبقى 100% ما تستخدمهوش غير لما يكتمل الشحن وياسلام يفضل لو شحنته وهو مقفول يبقى أفضل طبعا هتلاقى أداء البطارية يوم عن يوم بيتحسن معاك وفعلا البطارية بتتحسن مع الأستخدام المعتدل وعدم الأهمال
تقفل الواى فاى ووضع شبكة البيانات ( 3G ) فى عدم إستخدامهم
كدة تمام .. بالأضافة لأتباع الآتى وهو :
فى تطبيقات كتير بتبقى شغالة ومابتتقفلش زى جوجل بلاى وتطبيقات الإنترنت وكدة حتى لو حضرتك قفلتها من مدير المهام وعملت كلير للرام كمان هى مابتتقفلش ..
هانقفلها إزاى .....؟

هاتفتح الضبط وهاتعمل خطوتين
الأولى : هاتختار مدير التطبيقات أو Application Manager هتلاقى أول قايمة حضرتك فيها إسمها ( المحملة )
أو( Downloaded ) هاتدوس عليها وهايجيلك كل التطبيقات المحملة على جهازك والأصلية هاتدوس على كل واحد فيهم وتعمله إيقاف أو Force Stop وبعد ما تعمله إيقاف هتلاقى حاجة تحت كدة إسمها Clear Cache دوس عليها وإعمل كلير وهكذا مع باقى البرامج والتطبيقات تمام كدة

الخطوة التانية بقى : بعد ماتنتهى من الأولى هاتيجى على القايمة الثالثة من ناحية الشمال فى مدير التطبيقات اللى حضرتك فتحتها هتلاقى إسمها ( التشغيل ) أو ( Running ) ودى الخاصة بالرام هتلاقى من ضمنهم الضبط وكدة إضغط على كل واحدة فيهم وإعملها إيقاف أو Stop وخلى بالك الأيقوانات الخاصة بجوجل وجوجل بلاى هاتتعبك شوية وكل ما هاتقفلها هاتلاقيها تانى المهم خليك وراها لغاية ماتتقفل نهائى وهكذا الباقى وخلى أيقونة الضبط اللى إنت فيها آخر حاجة تقفلها عشان مايخرجكش بره تلقائي لإنك قفلت الضبط وكدة
وبعد ماتنتهى من كل ده هتلاقى الرام قلت معاك كتير وبقى عندك فري رام كبيرة .، بعد ماتعمل كدة تعمل كلير للرام عادى من مدير المهام اللى بتفتحه من الضغطة المطولة على زرار الهوم .. تمام كدة
هاتعمل الطريقة دى أول ما تفتح جهاز لو كان مقفول ( هاتعملها مرة واحدة بس فى اليوم ) يعنى بعد ماترستر الجهاز أو بعد ماتفتحه لو شحنته وهو مقفول زى ما قولنا قبل كدة ..، وهتلاقى الرام قليلة معاك طول اليوم وإستهلاك
البطارية كمان هايبقى مرضى جدا ومش هاتضايق تانى من البطارية
وكله هايبقى تمام بس كدة :)

يارب أكون قدرت حتى أساعد بأى حاجة .، وأنا آسف من طول الشرح طولت عليكوا ..

كل سنة وحضراتكم طيبين وبخير دايما :)

فى خدمتكم دايما .، أخوكم

أرشيدياكون .