سامسونج e7 ولا هوواوي g7

انا فعلا بحترم شركة ال جي جدا .....وكنت جبت ال جي 3 استايلوس هو حلو في جمال التصميم ومريح جدا في مسكة الايد وحجم الشاشة ...تصميمه اكثر من رائع .....بس بدلته بجهاز ايه 7 .......والسبب ان الكاميرا الامامية وحشة تحس اللي هيا مش طبيعية ومش حطين فيه اوبشن سمارت شير الخاص ب التلفزيونات الذكية وده اوبشن مهم بالنسبة ليا جدا وده اكتر حاجة ضيقتني منه...بالاضافة الى ان كل اجهزة ال جي الموجودة في السوق مواصفتها اقل من اجهزة كتير زي الكاميرا الامامية وبيكون سعرها اقل منها ال جي ......ادينا مستنيين ال جي 4 او الفيلكس الجديد....اما سوني مليش سابق تجربة معاه........والنقطة اللي حابب اوضحالك انا عملت مقارنة بين تصوير الكاميرا الخاصة ب الايه 7 و الجيه 7 لفيت ان التفوق لصالح سامسونج الوانها اكتر واعمق .....وبرده عملت مقارنة وشغلت فيديو اتش دي من اليوتيوب على الجهازين لقيت ان هناك فرق كبير لصالح الايه 7 في الالوان و تحس ان الصورة ناطقة ومجسمة .........بصراحة لا انا كده اتاكد ان اختيار السامسونج ايه 7 اختيار موفق جدا والحمد لله

أستاذ al3bd
بدون التحيز لماركه معينه
دايما بقول ان العيب الوحيد في G7 انه بخط واحد ولو موجود منه بخطين فا هو افضل بصراحه من ال E7 في وجود اوبشن كتيير جديد مش موجود في E7
ومدام انت في السعوديه
طب ليه مافكرتش في موديلات ال جى الجديده العاليه الموجوده هناك بخطين
او سونى بس طبعا بدايه من Z2 وانت طالع اللى بخطين برده لان فيها اوبشن كاميرا مش موجود في اى ماركه تانيه

حبيبي ....يا استاذ وليد ......انا عارف انك ذاكر اسم صاحب التقرير ...........بس كفاية انك دايما من اكتر الناس الي بتساعد الناس في اختيارتها .....وبتكون موفقة .....وانا اولهم.......
طيب كنت حابب استفسر انا مع الاولاد دلوقتي e7 وعجابهم الحمد لله .....انا معيا البرولايت لو فكرت اغير ايهم افضل اجيب برده e7 ولا اجيب g7 وخصوصا ان في نسخة نازلة قريب في السعودية واكيد مصر ان شاء الله من جهاز g7 بشرحتين وانا مستنيها

ربنا يخلي حضرتك
انا بصراحه جبت ال E7 مرتين لنفسى وكذا واحد لزمايلى
وجبت ال G7 مره واحده لانى لازم اشترى موبايل بخطين وبصراحه ده تقرير مهندس / محمد وانا ذاكر كده ونقله بالحرف زى ماهو كاتب

كلام رائع من استاذ وليد كالمعتاد .....جزاك الله خير على مجهودك .........بس انت لحقت تبع ايه 7 ههههه وتجيب جيه 7 .....

اتا معايا هواوي g7 وبفكر اغيرة e7 لاني حاسه الكاميرا ضعيفه

بصوا ياجماعه الموضوع ده مهم جدااااااااااااااا وشاغل بال ناس كتيير
فيه مهندس بيعمل ريفيوهات للموبايلات بالعربى وكاتب مقارنه من خلال مراجعته للجهازيين وهو على فكره صاحب محل موبايلات في الاسكندريه اسمه م / محمد خالد
وكاتب على موقعه الكلام ده

* كلام من الأخر عشان متكونشي محتار :-
لو بتقارن بين جهازين
1- Huawei Ascend G7
2- Samsung Galaxy E7
ومحتار بين الجهازين وبالذات ان مواصفاتهم شبه تكون متطابقه
- نفس التشيب سيت ونفس تردد المعالج ومعماريته .
- نفس حجم الرام والذاكره الداخليه .
- نفس دقه الكاميرا .
تقريبا فعلا نفس المواصفات مع اختلافات بسيطه جدا ...
طيب .. ايه هيا اهم الاختلافات اللي بين الجهازين اللي ممكن تخليك تقدر تاخد قرارك وتختار جهاز فيهم !!
بص يا سيدي ..
اول جهاز حتكلم عليه فيهم حيكون Samsung E7 وايه اهم الحاجات اللي ممكن تميزه عن ال Huawei G7 ..
* أول حاجه هيا ان جهاز E7 بيدعم تشغيل 2 شريحه اتصال بخلاف جهاز G7 بيدعم شريحه واحده فقط ..
فاذا كنت بتحتاج خطين حيكون جهاز E7 مناسب ليك .. ومتنساش انك عشان تقدر تركب شريحه اتصال تانيه لازم تستغنى على تركيب ذاكره خارجيه .. لان الخط التاني بيركب في نفس مكان الميموري يعني لتركب خط او تركب ميموري .
* تاني حاجه حتكون الشاشه .. هيا صحيح نفس الحجم ونفس الدقه وحتى نفس توزيع البيكسلات في كل انش في الشاشه متطابق ما بين شاشات الجهازين الا ان شاشه جهاز Samsung E7 حتتفوق بسبب نوعها .
فحتلاقي شاشه E7 من نوع Super Amoled اللي بتتميز بيها شركة سامسونج وبتتميز بدقه وضوح ونقاء ألوانها بشكل رائع وكمان بتتميز بدرجه تباينها العاليه اللي بتساعدك تشوفها بوضوح تحت أشعة الشمس ..
وبالنسبه لشاشة جهاز Huawei G7 فحتكون من نوع ips ذات زوايا الرؤيه الجيده جدا وألوانها واضحه .. بس لو في مقارنه مابينها ومابين السوبر امولد حتكون شاشه E7 احسن بشكل واضح
* ثالث حاجه حتميز جهاز Samsung E7 حتكون الكاميرا ولكن بشكل بسيط جداً فالجهازين بيتميزوا بكاميرا جيده جدا ولكن سامسونج تتميز بشكل بسيط في جوده صورها الملتقطه وبالذات في تصوير الفيديو ..


طيب .. بالنسبه بقا لمميزات جهاز Huawei Ascend G7 اللي بيتميز بيها عن جهاز Samsung E7 ..
* اول حاجه حتكون أداء البطاريه ...
عاوز اقولكم ان استخدام جهاز Huawei G7 مميز جدا فيما يخص البطاريه بشكل ملحوظ عن جهاز Samsung E7 مع ان البطاريتين يعتبروا بنفس حجم المللي امبير مع فارق بسيط لصالح ال G7 فبطاريه جهاز Huawei G7 بحجم 3000 مللي أمبير بينما بطاريه جهاز Samsung E7 بحجم 2950 مللي أمبير ..

*-* طيب تفتكروا فرق ال 50 مللي أمبير ده مابينهم هو السبب في زيادة كفاءه جهاز Huawei G7 عن جهاز Samsung E7 بالنسبه لأداء البطاريه ؟؟؟؟
الإجابة حتكون لأ ... طيب أمال ايه السبب !! ⁉
السبب بيرجع بشكل كبير لواجهة المستخدم اللي بتستخدمها شركه هواوي في اجهزتها اللي بتيجي بأسم ايموشن وبتكون في جهاز G7 من الاصدار 3.0 ..
بتتميز واجهة المستخدم الايموشن اللي بتستخدمها شركه هواوي بتكون سريعه وبتحافظ على الطاقه ومش بتستخدم من مساحه الرام بشكل كبير مثل واجهة المستخدم التاتش ويز اللي بتستخدمها شركه سامسونج في اجهزتها واللي بتستخدم مساحه كبيره من ذاكره الوصول العشوائية Ram الخاصه بالجهاز وبتسحب طاقه بشكل ملحوظ فا بالسبب ده حيكون اداء جهاز Huawei Ascend G7 احسن في اداء البطاريه وسرعه نظام التشغيل ..

اتمنى اكون قدرت افيدكم واقدملكم اهم الاختلافات البسيطة الموجوده مابين الجهازين وتقدروا تقرروا اي جهاز فيهم مناسب ليكم ..

إعداد وتقديم / م. محمد خالد

وده رد واحد من مستخدمى الجهاز G7

احب برضو اضيف واشارك الاخوة بما انه عندي هواوي G7 ان الهواوي فيه مميزات كتيرة منها انه يوجد منه وفية تطبيق تنظيف النظام وازالة الكاش + انه فيه خاصية اغلاق التطبيقات اللي عايز تختارها بعد اغلاق الشاشة يعني كانك منزل تطبيق GREENIFY ... وبرضوا فيه خاصية تخصيص لمنع استقبال التطبيقات للداتا سواء كانت على شبكة المحمول او الواي فاي ... ودي اعتبرها ميزة محترمة لتوفير الباقة ومميزات كتيرة تانية رائعة متوقعتهاش في واجهة جهاز الهواوي زي عمل ضغطتين على الشاشة ويفتح الواجهة وعمل اختصارات من خلال الرسم على الشاشه لفتح الكميرا او اي تطبيق محدد ... الصراحة واجهة هواوي والحركات والاختصارات حلوة ومبتكرة

اهم حاجه كل واحد يشوف ايه اللى يناسبه بدون التحيز لماركه معينه

حضرتك معاكى انهى وعاوزه تبدليه بايه