waleedsunny

الجهاز في مصر للاسف سعره عالي جدااا
وده عيب تسعير مش عيب موبايل
انا اشتريت الجهاز ب 3300 مصري من السعوديه قبل ماسعر الريال يعلي اليومين دول
لون نحاسي ممتاز جدااااا
مميزاته
بيقبل شريحتين بالاضافه لكارت ميموري
شاشه سوبر اموليد عليها طبقه حمايه وجوده في الالوان والاضاءه
فيه سنسور بوصله واضاءه
في خاصيه OTG
فيه خاصيه NFC
فيه خاصيه OIS للكاميرا ودي اول اجهزه استخدمتها كانت الايفون ودي بتسمح بصوره جيده في الاضاءه الضعيفه شويه وكمان تقليل الاهتزاز اثناء التصوير
في حساس بصمه 360 درجه لفتح قفل الشاشه ولحساب الايميل ولحسابك علي موقع سامسونج
ذاكره الجهاز 16 المتبقي منهم حوالي 9.5
الرامات 3 لكن بالظبط 2.75 جيجا والمتبقي منهم في المتوسط 1.5 جيجا
تصميم سماعه الجهاز من اسفل زي النوت 3 والنوت 5 بالظبط
اطار الجهاز من المعدن بالكامل
ضهر الجهاز من ماده بلاستيك لكن تحس انها زجاج
نزله في الخارج اسكرينه وش وضهر زي سوني كده
تصميم الجهاز متقارب بنسبه 95% من النوت 5 حتي انا مركبله جراب نوت 5 ضهر مؤقتا لحين نزول جراب اصلي ليه
وبخصوص الاسكرينه فدي مشكله لان شاشه الجهاز فيها انحاء من الاربع حواف فاصعب انك تركب اسكرينه غير الاصليه
طبعا الاداء ماشاء الله عالي جدااا وخاصه في استخدام النت 3 جي من اسرع الاجهزه اللي استخدمتها في ال 3جي بعد اجهزه سوني
صوت سماعة المكالمات نقي وواضح وعالي
صوت سماعه النغمات كويس بس يفضل تحط نغمات عاليه من عندك لو انت موجود دايما في مكان دوشه
الجهاز بيدعم شبكات الجيل الرابع
شرحتين الجهاز نوعيه نانو
البطاريه غير قابله للازاله
ومن المميزات الجامده هي اداء البطاريه في الجهاز ده مقارنه ب A7 2015
بيقعد معايا نت 3جي متواصل حوالي 10 ساعات ولو واي فاي حوالي 12 ساعه
ومافيش ادني سخونه او لاج او تقل
وبيجي مع الجهاز شاحن بيدعم الشحن السريع
بحيث ان اول 50% بيتشحنوا في حوالي 35 دقيقه
والجهاز بيتشحن بالكامل في حوالي 1.25 ساعه
الجهاز نازل معاه برنامج اوفيس كامل ورد واكسل وباور بوينت
اداء الكاميرا ممتاز وسريع سواء الخلفيه او الاماميه
الجهاز بيدعم تحميل سيمات بتغير كل شئ في الموبايل من حيث الشكل والالوان والايقونات والفونت كمان
من عيوب الجهاز في رأي
سعر مبالغ فيه في مصر
مافيش لمبه اشعارات لكن فيه اشعار بالصوت فقط
مافيش خاصيه تصوير 4K
المفروض كان ينزل باندرويد 6 مارشيملوا عالطول
كان المفروض جهاز بالمواصفات دي ينزل بذاكره 32 مع انه بيدعم كارت ميموري
كان المفروض اضافه اوبشن اكتر للبصمه زي موبايلات هواوي ولينوفو

المهندس محمد خالد نزل امبارح الريفيو للجهاز ياريت يكون فيه الافاده

بمناسبة انى استخدمت افضل 3 اجهزه متوسطه في السوق حاليا
سامسونج E7 و J7 وهواوى 4X
ليه بقول ان ال 4X افضل
السعر 1800ج متبرشم بضمان شركة i2
مستوى أداء الكاميرا سواء الاماميه او الخلفيه ممتاز افضل من E7 واقل من J7
مستوى أداء البطاريه كويس جداااا زى ال E7 وأقل من J7 حاجه بسيطه
التلاته والحمد لله مافيش سخونه
امكانيه تركيب خطين + كارت ميمورى والخطين فيهم أوبشن ال 4 جى
الرامات 2 جيجا الجهاز بيستخدم 800 والفاضى دايما من 1000 الى 1200
فيه سنسور بوصله
فيه سنسور اضاءه
فيه لمبة اشعارات جميع الالوان
في خاصية OTG يعنى بيقرا من فلاشة كمبيوتر
في خاصية عمل باسور ورد للداتا اللى على الجهاز زى ال E7
امكانيه فتح الشاشة بالنقر مرتين على الشاشة وغلق الشاشة عن طريق برنامج قفل جاى مع الجهاز وده بيقلل استخدامنا لزرار الباور فايعيش وقت اطول بكتيير
فيه برنامج اوبتميز لغلق جميع البرامج المفتوحه في الخلفيه وتفضية الرامات
فيه امكانية التحكم في البرامج النشطه اثناء غلق الشاشة للتوفير في الطاقة
مساحة الجهاز 8 جيجا الفاضى منها 3.5 جيجا وده مش عيب في الجهاز لسبب بسيط وهو ان هواوى فيها اوبشن امكانيه جعل كارت الميمورى هو الذاكرة للجهاز ونقل جميع البرامج والالعاب لكارت الميمورى مهما كان حجمهم
من اقوى الاجهزه في الاستخدام في ضوء الشمس بحيث انك لو خليت الاضاءه 100% بتشتغل على الجهاز بمنتهى السهوله تحت اشعة الشمس وال J7 قريب من الموضوع ده لكن اقل حاجه بسيطه وذلك من غير تفعيل اوبشن الاضاءة في الخارج
صوت سماعة النغمات كويس وعالى جدا غير ان وضعية السماعة زى الايفون فا بتخلى مافيش مشكله انك تحط الجهاز على وشه او ضهره عادى لان السماعة من الجنب

ايه بقى عيوب هواوى عامة

قلة الاكسسوارات والدعم الفنى والتحديثات بشكل عام
قلة قطع الغيار او الصيانة
بطء المزامنه وده اهم عيب قابلنى في الهواوى لحد ال Mate 7
وهو بطء الاشعارات الخاصة بمواقع التواصل الاجتماعى زى الفيس والواتس والميل للاسف بتاخد وقت شويه على ماتوصل بعكس سامسونج بصراحه

انا بحاول اشرح العيوب والمزايا
وده مش معناه ان سامسونج احلى ولا هواوى احسن
كل شىء ليه مميزاته وعيوبه وعلينا نقرر الافضل لاحتياجتنا
وربنا يوفق الجميع للخير ان شاء الله

الجهاز ب 2250ج لون دهبى تقفيل صينى متبرشم بالضمان
بيركب عليه اسكرينه وجراب بتوع ال E7 مع تعديل فتحه المايك فقط
الجهاز مساحه 16 جيجا الصافى 11.5 جيجا وبيسمح بنقل بعض البرامج والالعاب لكارت الميمورى
الشيبست بتاعت النسخه الموجوده في مصر من انتاج شركة سامسونج Exynos 7580 نفس الشيبات الموجوده في نوت 4 واس 6 واجهزه حديث لسامسونج وبرسسور ثمانى النواه 1.5 - وكارت فيجا Mali-T720MP2 - والجهاز جاب على an tu tu حوالى 38000 وطبعا ده اعلى من E7 بكتيير لانه ال E7 كان جايب حوالى 21000
مميزات الجهاز اللى بتخليه افضل من ال E7
1 - بيركب خطين بالاضافه لتركيب كارت ميمورى
2 - وجود فلاش امامى للكاميرا الاماميه بس الفلاش بيكون مغلق او مفتوح فقط مافيش اوبشن الاوتو
3 - الكاميرا الاماميه والخلفيه افضل في الدقه والوضوح من ال E7 مع ان الاتنين نفس الرقم لكن ممكن يكون السبب في نوعيه العدسات او سوفت وير متطور
4 - الجهاز في خاصيه توصيل فلاشه الكمبيوتر بالموبايل وطبعا ده اوبشن جميل واصبح مهم
5 - الثيمات بتاعته متطوره جداااااا وبتغير كل شىء في الجهاز من شاشة اتصال والكيبورد وقوائم الضبط وقوائم الاشعارت بالكامل والرسائل والايقونات والفونت وكل شىء - المفيد انها بتخلى الموبايل حاجه تانيه خالص وفى ثيمات كتيير جدااا ممكن تحملها من على النت
6 - مستوى أداء البطاريه افضل بنسبه حوالى 20%
7 - نسخة الاندرويد لوللى بوب 5.1

العيوب اللى بتخلى ال E7 افضل من ال J7

1 - الرامات بالظبط 1366 الفاضى منها من 400 - 300 فقط وانت لسه مافتحتش برامج تقريبا
2 - شالو اوبشن كتيير جدااااا من الموبايل على سبيل المثال وليس الحصر - مافيش اوبشن الفايبريشن عند فتح وغلق المكالمه - مافيش اوبشن برايفت مود اللى تميز بيه ال E7 - مافيش تنبيه عن طريق الفايبريشن عند مسك الجهاز لما يكون في مكالمات او رسائل فائته - مافيش اسكرين شوت عن طريق المسح براحة اليد - مافيش امكانيه فتح كذا برنامج في الشاشة الواحده
3 - صوت نغمات الجهاز واطى لازم وحتما تحط نغمات ترددها عالى جداا من عندك عشان تسمع صوت الموبايل وده اللى عملته وفعلا اصبح صوته عالى جدااااا
4 - سرعة ال 3جى في ال E7 بتكون 42 لكن ال J7 بتكون 21
طبعا الجهازين مافيش فيهم سنسور اضاءه او سنسور بوصله او لمبة اشعارت

ملحوظه - انا كان معايا هواوى 4X
بدون مبالغه افضل من الاتنين بمراحل كبيره وكمان سعره 1800ج بس
انا بقول كده للامانه لعدم التحيز لماركة معينه اهم شىء الحاجه اللى تفيد الواحد اكبر استفاده وفى نفس الوقت يكون سعرها معقول

ده اللى لاحظته حتى الان ولو في جديد هاكتبه ان شاء الله

التقرير ده منقول من صفحة م/ محمد خالد وهو صاحب محل موبايلات بالاسكندريه وبيعمل مقارنات وريفيوهات للاجهزه

مقارنه تفصيليه ما بين :
١- جهاز Huawei honor 4x
٢- جهاز Huawei P8 Lite

* التصميم :
# جهاز P8 Lite
يأتي الهاتف بتصميم انيق ومن خامات تصنيع جيده فيأتي بظهر من البلاستيك الزجاجي ولا يمكن ازاله الظهر وجوانب مصنعه من المعدن بوزن مناسب للاستخدام وخفيف نسبيا ً حيث يأتي بوزن ١٣١ جرام .

# جهاز Honor 4x
ياتي الهاتف مصنع بالكامل من البلاستيك مع ظهر يمكن ازالته تصميم الجهاز مناسب للاستخدام بالنسبه لحجمه ويأتي بوزن ١٧٠ جرام .

* الشاشه :
# جهاز p8 lite
شاشه الجهاز بمقاس 5 انش بدقه HD من نوع ips بكثافه بيكسل 294 بيكسل في كل انش مما يجعلها جيده وتتفوق في دقتها ونقائها وجوده اداء القراءه عليها .
تتميز بوجود طبقة حمايه من الزجاج من نوع Corning Gorilla Glass 3.

# جهاز Honor 4x
شاشه الجهاز بمقاس 5.5 انش بدقة HD من نوع ips بكثافة بيكسل 267 بيكسل في كل انش وتعتبر جيده الاداء وتتميز بسطوع الوانها وإضائتها ..
لا تحتوي على اي نوع من الحمايه .

* شرائح الاتصال :

# جهاز p8 lite
يدعم الجهاز تشغيل 2 شريحة اتصال مع دعم سرعات الجيل الرابع LTE ولكن مكان تركيب شريحه الاتصال رقم 2 يعتبر هو نفس مكان تركيب بطاقة الذاكره الخارجيه بمعنى انك حتركب خط تاني او كارت ذاكره خارجيه ولكن لا يمكن تركيب الاتنين في نفس الوقت .

# جهاز Honor 4x
يدعم الجهاز تشغيل 2 شريحة اتصال مع دعم سرعات الجيل الرابع LTE كما يتميز بامكانيه تشغيل كل خط في مكان منفصل مع وجود مكان مخصص فقط لتركيب كارت ذاكره خارجيه.

* الاداء :

# جهاز p8 lite
يعمل الهاتف بواجهة المستخدم ايموشن الاصدار ٣.١ وهيا احدث واجهة تشغيل من انتاج شركة هواوي
كما يعمل الهاتف بنظام تشغيل اندرويد اصدار 5.0.2 لولي بوب بمعمارية 64bit
مما يجعل الهاتف يتميز بقوة الاداء والثبات في الاستخدام بشكل اكبر عن جهاز 4x حتى وانوا بيشتغل بنفس التشيب سيت والمعالج ولكن دعم النظام لمعمارية 64bit يجعل الاداء والثبات متفوق .

# جهاز Honor 4x
يعمل الهاتف بواجهة المستخدم ايموشن الاصدار ٣.٠
كما يعمل الهاتف بنظام تشغيل اندرويد اصدار4.4.4 كيت كات 32bit .

* الكاميرا :
# جهاز p8 lite
يتميز الهاتف بكاميرا اساسيه بدقة ١٣ ميجا بيكسل بجودة تصوير مميزة جدا بسبب حساس الكاميرا من نوع BSI مع توفر العديد من انظمه التصوير مع دعم ل Digital Zoom مما يجعل اداء كاميرا الجهاز متميزة عن جهاز 4x مع تميز الكاميرا في تصوير الفيديو بارتفاع الصوت اثناء تصوير الفيديو بخلاف جهاز 4x

# جهاز Honor 4x
كاميرا الجهاز جيده الاداء ومتميزة في الاضاءه المرتفعه والمتوسطه .

* الذاكره الداخليه :

# جهاز p8 lite
ياتي الجهاز بذاكره داخليه بحجم ١٦ جيجا المتاح منها للاستخدام ١٠ جيجا .

# جهاز Honor 4x
ياتي الجهاز بذاكره داخليه بحجم ٨ جيجا المتاح منها للاستخدام ٣ جيجا .

*** يمكن استخدام الذاكره الخارجيه كذاكره اساسيه في كل من الجهازيين .

# جهاز p8 lite لا يدعم OTG
# جهاز Honor 4x يدعم OTG

# جهاز p8 lite يدعم تقنيه NFC
# جهاز Honor 4x لا يدعم تقنيه NFC

* الصوت :
كلا الجهازين يتميزوا بصوت جيد ولكن جهاز P8 Lite احسن في نقاء وارتفاع الصوت بشكل ملحوظ .

* البطاريه :
# جهاز p8 lite
يأتي ببطاريه بحجم 2200 مللي امبير وتعتبر جيده مقارنتا بحجم شاشه الجهاز ولكن اداءها متوسط

# جهاز Honor 4x
يأتي ببطاريه بحجم3000 مللي أمبير وتعتبر جيده جدا بالنسبه لاداءها وتوافقها مع اداء الجهاز .

** خلاصه الكلام :
الجهازين متميزين في فئة سعرهم ويعتبروا منافسيين قويين للاجهزة المنافسه من شركات اخرى .
تختار اي جهاز فيهم ؟؟
الموضوع حيرجع لاستخدامك وتفضيلك الشخصي سواء كنت بتفضل شاشه بحجم كبير او شاشه اصغر .
محتاج لتشغيل 2 شريحه مع بعض في نفس الوقت بجانب استخدام ميموري خارجي .

في الاول ولا الاخر الجهازين كويسين والقرار حيرجع لحضراتكم ..

م . محمد خالد
‪#‎Connect_Mk_Reviews

وده فيديو للجهاز X4



وده فيديو للجهاز P8 Lite

الجهاز موجود في فروع رايه ب 1887ج بفاتوره ضريبيه بضمان شركة رايه لون اسود
الجهاز صوره طبق الاصل في الشكل بالمللى لجهاز G3 في كل شىء
الجهاز بيركب عليه جراب الهواوى G750 مع تعديل وضع زراير الصوت والباور والفلاش - بيركبله اسكرينه الزجاج بتاعت ال G750 برده
الجهاز فيه نفس الأوبشن بتاع البرو لايت بنسبة 70% لكن ده فيه اوبشن اعلى وجديد بس قالب على هواوى حبتين
طبعا اكتر حاجه بتميزه هو زرار الباور وتحكم الصوت الخلفيين وليهم كذا وظيفه كمان
نبتدى بالمميزات
1 - صوت سماعة المكالمات او الاسبيكر او النغمات - ماشاء الله - عاليين جداااااااااا
2 - البطاريه عامله زى البرو لايت قويه جداااا وأداء عالى ومحترم
3 - الجهاز طبعا سريع جدااااا زى ما ال جى متعوده دايمااااا - الفاضى دايما من الرامات من 300 - 400 ميجا
4 - الكاميرا الخلفيه 13 ميجا جيده جدااا سواء بالليل او النهار - الاماميه متواضعه جدا - امكانيه التصوير سيلفى من خلال غلق قبضة اليد وفتحها اما الجهاز فايتم الالتقاط بعد 3 ثوانى - امكانيه طبعا التصوير بالصوت
امكانيه التقاط صور اثناء تصوير الفيديو - وجود نظام ايقاف مؤقت عند تصوير الفيديو - امكانيه عمل زووم اثناء تصوير الفيديو - تصوير الفيديو Full HD رائع جداااااا
5 - سرعة النت 3جى 21 جميله وسريعه جداا
6 - امكانيه تشغيل اى شريحه 3 جى بدون تغيير الاماكن
سوفت وير الجهاز والوان الجهاز اصبحت قريبه جدااا من الاجهزه مرتفعة السعر وخاصه هواوى
7 - الشاشة الوانها رائعه ( مش زى البرو لايت الوانه زى الرسوم المتحركه ) مع ان البيكسل قليل لكن ده العادى في ال جى
8 - الشاشة 5.3 بوصه صافى عشان زراير التحكم داخله جوه الشاشه - يعنى الشاشه 5.5 متضمنه زراير التحكم
9 - زراير التحكم بقى حكايه زى G2 Mini وهواوى Mate 7 وهواوى G7
احنا متعودين على 3 زراير - باك وهوم وقائمه - هنا بقى ممكن نخليهم 4 او 5 ونخلى اتجاهتهم زى ما احنا متعودين او عايزيين ونتحكم في الخلفيه اللى وراهم ولونها كمان ودرجة الشفافيه بتاعت الخلفيه بتاعتهم
10 - طبعا الفتح والغلق نسبة 200% عن طريق النقر مرتين على الشاشة شغاله زى الفل
11 - وجود لمبة اشعارات اونها احمر فقط للرسايل وللمكالمات الفائته وللبطاريه
12 - وانت قافل الشاشه لو دوست دوسه طويله على زرار خفض الصوت تفتح الكاميرا ولو دوست دوسه طويله على تعليه الصوت تفتح الكويك ميمو - ولو انت فاتح الشاشة ودوست على زرار الباور + خفض الصوت تاخد اسكرين شوت للشاشه
13 - اضافوا كيبورد سمارت زى اللى في سامسونج اللى فيه صف الأرقام فوق الحروف وممكن تكبر الكيبورد او تصغره حسب راحتك وتغير لونه للابيض او الاسود - وممكن تحمل اشكال للكيبور من خلال برنامج سمارت ورلد ده بيكون مع الجهاز
14 - الجهاز فيه راديو - وبرنامج للريموت زى اللى موجود في البرو لايت
15 - الجهاز فيه برنامج سمارت ورلد تحمل عن طريقه خلفيات او سيمات او اشكال للكيبورد او برامج خاصه بماركة ال جى
16 - وجود خاصيه الوضع الصامت عند قلب الجهاز على وجهه - وخاصيه ايقاف مؤقت للفيديو وللمنبه برده عن طريق قلب الجهاز على وجهه
17 - وجود بوصله في الجهاز
18 - وجود خاصيه الاس فيو للجراب والتحكم في الجهاز عن طريق الجراب الخاص بذلك بس طبعا لسه ما نزلش مصر
19 - وجود برنامج كلين للجهاز محدد بتوقيت كل اسبوع على الاقل عشان يحافظ على سرعه الجهاز
20 - وجود برنامج للحمايه عند تفعيله لو انت اديت الموبايل لحد مابيقدرش يشوف غير 4 برامج فقط في الجهاز بتكون انت محددهم مسبقا لعدم التطفل والخصوصيه
21 - الجهاز الرؤيه فيه جيده جدااااا عندما تكون الشمس عموديه على الجهاز بشرط تكون الاضاءه على الاخر بنسبه 100%
22 - زى البرو لايت تقدر تفتح كذا تطبيق في الصفحه الوحده - عملوا زى السامسونج انك لو دوست على زرار الباك دوسه طويله تطلع قايمه فيه برامج تقدر تختار منها التطبيقات اللى عايز تفتحا مع بعض
23 - القلم بتاعه زى البرو لايت قلم عادى جداااااااااااااا زى ابو 20ج اللى بيتباع في محلات الموبايل مالوش اى علاقه بقلم النوت نهائى - عشان ماحدش يقول وظيفة القلم ايه
24 - الوان الجهاز والخط افضل بكتيير من البرو لايت ويشبه بنسبة 95% الهواوى الحديث المرتفع السعر وبأكد على الموضوع ده

العيوب بقى
1 - مافيش سنسور اضاءه اتوماتيك
2 - مساحة الجهاز 8 جيجا الصافى منها للاسف قبل تحميل اى برامج 3.5 جيجا
3 - زى سامسونج او سونى او ماركات كتيير امكانيه نقل بعض البرامج او الالعاب لكارت الذاكرة الخارجى - يعنى مش زى الكاتيل او هواوى بنقل الالعاب الكبيرة لكارت الذاكرة الخارجى
4 - الكاميرا الاماميه متواضعه ولازم تكون في اضاءة عاليه لجوده التصوير السيلفى
5 - الكاميرا الاماميه مع انها 13 ميجا وجوده عاليه جدااا بالفعل الا المفاجأة الكبرى ان مافيش اى اوبشن في الكاميرا خالص بمعنى كل الأوبشن الموجود في الكاميرا عباره عن تحديد عدد الكاميرا تبقى كام ميجا سواء عند تصوير الصور او الفيديو - ووضع البانوراما - ووضع تصوير بالصوت
مافيش اى تحكم تانى نهائى بالكاميرا زى مثلا وضع ليلى وضع تلقائى وضع تجميلى وهكذا
6 - مافيش خاصيه HDR في الكاميرا ودى بتعمل على تحسين جوده الصوره الملتقطه

ده اللى قدرت اكتبه واجربه حتى الان في الجهاز
وان شاء الله لو في حاجه جديده ظهرت هاكتبها عالطول
للاسف ماليش في الالعاب خالص لكن كل الريفيوهات اللى على اليوتيوب جربت افضل واعلى الالعاب واشتغلت بتفوق تام

ياجماعه اللى عاوز الموبايل ده يدخل على صفحة رايه ويطلب الموبايل ويجيله في خلال 48 ساعه ب 1887ج عشان لسه متصل بيهم وقالولى انه هاينزل على بكره ان شاء الله

كان في اعضاء بيسألوا عن الفرق بين اللوميا 640 Xl وبين ال E7
الفيديو ده بيوضح بعض المقارنات بينهم
مش هاندخل في تفاصيل لان طبعا معروف للكل ان الاتنين مختلفين في كل شىء
بس انا جايب لينك الفيديو ده
لان بصراحه لقيته بيعرض اوبشن كتيير جدا في ال E7 بصراحه انا نفسى في حاجات ماكنتش اعرفها مع انى اشتريت الجهاز مرتين
وياريت اللى معاه الجهاز ان شاء الله يستفاد من الفيديو

موجود في موبايل شوب بشريحتين بفاتوره ضريبيه ب 1250ج
وموجود في وسط البلد من 1100 - 1150 ج

كل الاعضاء بيكلمونى على الخاص وبيسألوا انا ليه مش بشارك في الرد على الاسئله
الاجابه ببساطه ان كل الاسئله بدون مبالغه مردود عليها في التقييم اللى عامله في بدايه الصفحه
لكن للاسف ماحدش عايز يكلف نفسه ويقرا قبل ما يسأل

موجود في مكتبة جرير بالسعوديه ب 999 ريال
والريال انهارده عامل 2.25 للاسف يعنى الجهاز عامل بالمصرى حوالى 2250ج
بس متوقع ان شاء الله هاينزل مصر ارخص من كده بكتيير وخاصة ان مواصفاته بسيطه ومتوسطه

فى ملحوظه اتكلم فيه العضو المحترم استاذ Loord
ان الكاميرا اثناء تصوير الفيديو بيظهر ضبابه لمدة ثانيتين وتختفى
الموضوع متعلق بسنسور الاوتو فوكاس
اثناء تصوير الفيديو لو حركت ايدك وانت بتصور فيديو سواء بالقرب او البعد بسرعه هاتلاقى الكاميرا عملت اتو فوكاس لوحدها عشان تظبط الصوره وطبعا ده بيمثل الثانيتين الضبابه اللى بنشوفهم لمعالجة الموضوع ده يجب تثبيت اليد اثناء تصوير الفيديو وعدم تحريك الموبايل حركه مفاجاة عشان الاوتو فوكاس مايشتغلش
ملاحظات على التصوير
التصوير الثابت جميل ونقى جدااا سواء بالنهار او الليل
امكانية عمل زووم يعنى تكبير او تصغير اثناء تصوير الفيديو
فى تصوير الفيديو ليلا يجب تشغيل الفلاش قبل البدء فى تصوير الفيديو
للاسف مافيش اوبشن عدم الاهتزاز فى الكاميرا وده كان بيفيد اثناء تصوير الفيديو

السلام عليكم
ده تقييم مبدىء لسامسونج E7 عشان الاعضاء المستعجلين وعايزيين يخدوا فكرة مبدئيه عن الجهاز ولو جد جديد هابلغكوا ان شاء الله
اولا الجهاز متبرشم بالضمان من عند دريم 2000 ب 2685ج لون ابيض بضمان MTI نسخة 3 جى فقط
بيركبله سكرينه زجاج بتاعت النوت2 بدون ادنى تعديل لحد ماينزله اسكرينه عشان الشاشة نحافظ عليها عشان هى مش ضد الخدش
بالنسبة للجراب بنركب جراب مؤقت للنوت 3 نيو سيليكون مع بعض التعديلات طبعا
البطاريه مابتتشلش والجهاز ليه فتحتان من الجنب
الفتحه الاولى بيتحط فيها الخط الاول شريحه نانو زى اللى بتركب فى الايفون
الفتحه التانيه بيتحط فيها الخط التانى شريحه نانو برده او كارت ميمورى
اظن الموضوع ده واضح ومش محتاج استفسار تانى
بيجى مع العلبه دبوس لفتح مكان الخطوط
المساحه 16 جيجا الصافى حوالى 11 جيجا
الجهاز بيقرا الرامات 1.85 جيجا والصافى دايما حوالى 1 جيجا عند عدم استخدام الموبايل
الشاشة 5.5 بوصه سوبر اموليد وطبعا معروف عن الشاشات دى ان الوانها فاقعه قوى لكن سامسونج عدلت درجات الالوان بحيث ان الالوان اصبحت صافيه ونقيه جداااا
الجهاز خفيف الوزن جداااا
البرسسور رباعى 1.2 A53
الجهاز ما شاء الله سريع جداااااا مافيش حاجه اسمها تهنيج او تعليق نهائى
سرعة ال 3جى بدون مبالغه طلقه زى ما اكون شغال واى فاى
وطبعا سرعة الواى فاى مش محتاجه كلام
وفى واى فاى دايركت – واى فاى هوت سبوت
والجهاز فى اوبشن زى ال NFC بالظبط بخصوص نقل الداتا اللى انت تحددها فى الضبط الاول للجهاز القريب منك وفى نفس الاوبشن
الجهاز بيدعم الراديو والبطاريه بتاعته ماشاء الله تحفه وقويه جدا
مكالمات فقط وقافل ال 3 جى ممكن تقعد معاك من 4-5 ايام
بتستخدم نت متقطع على مدار اليوم من 7 – 9 ساعات 3جى وبتقفل النت عند عدم الاستخدام لكن سايب ال 3 جى مفتوح عادى بيكمل يوم زى الفل
الكاميرا بتاعته السيلفى جميله جداااا 5 ميجا
الكاميرا الخلفيه 13 ميجا زى مايكون معاك كاميرا النوت3 العادى وممكن تستخدم الكاميرا الخلفيه سيلفى بانك لما تفعل الوضع ده كل اللى بتعمله انك تمسك الموبايل وتوجه الكاميرا الخلفيه ليك وهى لما تلقط وجه انسان اتوماتيك بتلقط الصوره من غير انت ما تعمل حاجه
الجهاز فيه اوبشن الترا سيفينج باور اللى عن طريقه بتقفل كل البرامج اللى الاندرويد بيفضل فتحها على الفاضى لتخفيض الطاقه جداااااااا
الموبايل فى كل الاوبشن بتاع سامسونج العادى القديم وزودوا كمان اوبشن جديد
فايبريشن عند فتح المكالمه وغلقها – عداد المكالمات – الاتصال عن طريق سحب اسم المتصل لليسار – اوبشن تعليه الصوت للضعف او التحكم فى جودة ونوعيه الصوت اثناء المكالمه – زياده حساسية اللمس عشان لو هاتستخدم جوانتى – فى تنبيه اشعارات بالصوت زى الجراند 2 وتنبيه بالاهتزاز عند مسك الموبايل عشان يعرفك بالمكالمات او الرسائل الفائته – زراير التحكم بتنور وممكن تتحكم فى مدة الاضاءه – قائمة الضبط ممكن تكون بالطول او العرض – فى قائمة الضبط ممكن تخلى القوائم اللى بتحتاجها عالطول تبقى فى الاول لسرعة الضبط – الجهاز فيه عدد 5 ثيمات لتغير شكل وايقونات الجهاز زى موبايل هواوى وال جى مثلا – الكيبورد كامل وفى الارقام فى الصف الاول دائما – فى خاصيه فتح شاشتان فى الشاشة الواحده – اوبشن غلق وفتح الشاشة عن طريق جراب الفيب سنسور لما ينزل ان شاء الله – امكانية تغيير خلفية الرسائل – وجود برنامج جديد اسمه استديو للصور والفيديوهات عشان ماتحملش برامج من بره زى برامج الفوتو شوب – خاصية حجب المكالمات او ال Black list - خاصية الفيديو كول عن طريق الشريحه
فى اوبشن جديد ومهم جدا اسمه Private mode وده عن طريقه ممكن تخلى الدخول للاستوديو والفيديو والموسيقى والتسجيلات الصوتيه بتاعتك والفايل مانجر كمان يكون بباسورد عشان السريه التامه وعدم التطفل
صوت سماعة المكالمات عالى وواضح ومجسم
صوت سماعة النغمات – ماتعتمدش على النغمات الموجوده على الجهاز – لما تحط نغمات من عندك وتحطها جوه الفولدر الخاص بنغمات الجهاز Ringtones هاتلاقى الصوت عالى وواضح جداااا
اثناء الاتصال بيجبلك اخر مكالمه تمت للمتصل اللى انت معاه
اقصى حرارة وصلها الجهاز اثناء الدخول على النت 3 جى وفى جو حر بالنهار كان 35
سامسونج غيرت لون القوائم بالكامل للون الابيض زى هواوى وال جى والكاتيل عشان تكون الرؤية فى الشمس جيده
العيوب
مافيش سنسور بوصله لتحديد الاتجاهات او القبله
مافيش سنسور اضاءة اتوماتيك حسب اضاءة المكان اللى انت فيه لكن حاطين مكانه اوبشن انك بتزود اضاءة الشاشة جدا لمدة 15 دقيقه عشان لو انت فى مكان اضاءة عالى جدا تقدر تشتغل على الجهاز عادى
يعنى التحكم فى اضاءة الشاشة بيكون مانيوال
الجهاز بمنتهى الامانه جيد جدا بل وممتاز على سعره التحفه ده
انا ماجربتش الالعاب ومش هاقدر اوعدكوا بتجربتها عشان ماليش فيها
اعذرونى لو فى اى حاجه نسيتها وكمان عشان الجهاز بقاله معايا 3 ايام
لو فى اى استفسار تحت امركوا بس ياريت نقرا اللى انا كتبه بالتفصيل لعدم تكرار الاسئله والاجوبه
ولو فى حاجه جديده اكتشفتها تانى او اى ملاحظه هاكتبها عالطول ان شاء الله
وبالتوفيق للجميع

نزل فى محل دريم 2000 ب 2800ج
ونزل E5 ب 2225 ج برده فى محل دريم 2000