تقييم شامل لل Iphone 6

اولا هبدأ بمميزات الجهاز :-

- في البدايه اي حد هيمسك الايفون هيعرف يعني ايه جوده الخامات ، لما بستخدم الايفون بحس اني ماسك في ايدي موبايل نضيف خامات وشكل ، ومفيش طبعا خامات احسن من الالمنيوم اللي يعملوا بيها الموبايل ، وزجاج الكاميرا وزرار البصمه من زجاج الياقوت .
- اداء الجهاز مفيش بعد كده الصراحه ، في اجهزه تانيه في السوق سريعه وادائها كويس لكن مجربتش قبل كده جهاز بأداء الايفون 6 ، وبجانب اداء الجهاز كهارد وير ، سوفت وير ابل بيتميز بالعمليه والسلاسه وبيديلك كل اللي انت محتاجه مبيحطش حاجه ملهاش لازمه عشان متعملش زحمه على الفاضي وتتقل الجهاز .
- بالنسبه للكاميرا ، بدون مبالغه افضل كاميرا في سمارت فون هي كاميرا الايفون 6 ، انا قارنتها بنفسي مع اعلى هاتف من شركه سامسونج ال note 4 واعلى هاتف من شركه سوني ال z3 واعلى هاتف من شركه اتش تي سي ال m8 ولقيت ان اقلهم جوده كاميرا الاتش تي سي واعلاهم الايفون 6 ،، لما عملت مقارنه بين الايفون 6 والنوت 4 ومع ان الايفون 8 ميجابيكسل فقط والنوت 16 يعني الضعف بالظبط !! ولكن فعلا المقارنه دي اثبتتلي ان جوده الصوره مش بعدد الميجابيكسل على قد ما هو بنوع وجوده العدسه المستخدمه ،، صور الايفون تحس انها صور طبيعيه جدا، والمنظر اللي هتصوره زي مانت شايفه بعينك هيبان قدامك على شاشه الايفون بنفس الالوان ، لكن كاميرا السامسونج هتلاقي الالوان مختلفه تحس انها مصفره كده والالوان مبالغ فيها ، ده ميمنعش ان كاميرا النوت حلوه ولكن الايفون احلى .
- من اقوى الاسباب اللي خلتني اغير من ال 5s ( برغم انه جهاز ممتاز ) حجم الشاشه ، حجم الشاشه من وجهة نظري ده الحجم المثالي لجهاز محمول لو اكبر من كده بعتبره مبالغ فيه لأن ده في الاول والاخر موبايل مش تابلت ،، والوان الشاشه اصبحت اكثر وضوحا وسطوعا ، ورزيليوشن الشاشه 326 بيكسل لكل بوصه ومفيش حد هيحتاج عدد بيكسلات اكتر من كده ، لان اكتر من 300 بيكسل في البوصه لا يرى بالعين المجرده يعني محتاج عدسه عشان تشوفه ، يبقى ايه لازمتها الشاشات اللي وصلت لاكتر من 500 بيكسل في البوصه ، دي من رأيي دعايا للهاتف ليس اكثر ، انا بستخدم الايفون حاليا وعمري ماحسيت ان رزيليوشن الشاشه قليل ،، وطبعا التاتش مش هتكلم عليه ( افضل تاتش في سمارت فون ) .
- صوت الاسبيكر من الحاجات اللي عجبتني جدا في الموبايل صوته انقى واعلى من الموديل السابق ومجسم بتسمع صوت ال bass اللي في الاغنيه ، يعتبر افضل صوت موبايل بعد الاتش تي سي طبعا .
- الجهاز طبعا كأداء في الالعاب ومعالجه الرسوميات قوي جدا مفيش حاجه اسمها لعبه تقيله ولعبه بتهنج الجهاز وكل الكلام ده .
- الجهاز سمكه رفيع جدا ووزنه خفيف وزوايا الجهاز دائريه من جميع الجوانب وده بيدي راحه في استخدامه ، ومفيش اي قلق من موضوع ان الجهاز يتني وهو في الجيب والكلام ده انا كل يوم بخرج بيه وهو في جيبي .
- البصمه طبعا من اكتر المميزات اللي بيتميز بيها الايفون ، وسريعه جدا في الاستجابه ، ومفيش اي جهاز اخر من الاجهزه اللي حاولت تعملها عارفه تخليها بنفس الاداء اللي موجود في الايفون .

ثانيا بالنسبه للعيوب :-
- بروز الكاميرا الخلفيه ، وده بسبب سمك الجهاز الرفيع جدا ، والكاميرا مكونه من 6 عدسات فوق بعض ،، ولكن تقدر تتغلب على العيب ده بالجرابات ، لما تيجي تركب جراب تتأكد ان الكاميرا مبقتش بارزه منه عشان في جرابات بتبقى رفيعه جدا .
- البطاريه بعض الناس شايفاها ضعيفه ، لكن انا شايفها ادائها مرضي جدا ، وافضل قليلا من الموديل السابق ، وميزه البطاريه انها بتعيش لفتره طويله معاك بالسنين ، اجهزه تانيه كتير البطاريه مبتكملش سنه واقل وتبوظ ،

وكتقييم عام ومن وجهة نظري الجهاز ممتاز وفعلا يستحق الاقتناء