بدون عنوان

للرجوع الي صفحة سوني Xperia Z1 الرئيسية اضغط هنا

Mahmoud Samir

2014-01-26 (07:08:40AM)

السلام عليكم ورحمه الله وبركاته
أتمني ان الجميع يكون بخير

انهارده حبيت انقل تجريبتي مع جميع الانظمه ال موجوده علي الساحه علشان اريح ناس كتير من كتر الاسئله ودا يجاوب برأي ودا برأي تاني وطبعا ف المقارنه هقارن بالانظمه المنتشره يعني مش معقوله هانقل تجربتي مع نظام الجافا او نظام سيمبيان :D

أولا الأندرويد : أول تجربه ليا مع الاندرويد كانت سنه 2011 كان لسه الجلاكسي الايس نازل طازه طبعا كان لسه الناس منبهره بالنظام وانا واحد زيهم ابتديت كمستخدم عادي جدا لا اعرف روت ولا روم ولا اي حاجة نزلت اشتريت الجلاكسي ايس كان ساعتها كاسر ال 2000 جنيه والموبايل كان روعه ف وقته طبعا انطباعي الاول انبهار ماسك اندرويد وبنزل العاب اتش دي جاتا 3 وpes 11 والعاب جامده اول مره حد يشوفها على الموب المهم فضل معايا الجهاز وبفضله اتعلمت الاندرويد الصح نزلت عليه اكتر من 35 روم مطبوخ وطبعا ف كام من المرات يحصل معايا مشاكل والجهاز مايرضايش يبفتح واضطر افلشه من الاول وهاكذا وفهمت الاندرويد والحمد لله
بعديها اشتريت جلاكسي اس 3 والجهاز كان نقله ليا وكان جميل جدا وروعه وكل دا نظام الاندرويد مسيطر علي ذهني وبصراحه افضل الانظمه بعديها حبيت اغير ونقلت لل ios ومسكت الايفون للاسف ماقعدش معايا كتير هوا كام يوم وبعته النظام سريع وثابت اكتر من الاندرويد بس رخم وال يقولك تتعود عليه وماتعرفش تمسك غير ابل بعد كدا كله كلام ياباشا انا مسكت ال 4 و 4s ورجعت للاندرويد النوت 2 .
ثانيا بقي الويندوز فون بعد خساره فلوس كتير بسبب التغيير جبت الويندوز فون واشتريت جهاز لوميا 820 انطباعي اول ماجبت الجهاز كنت حزين واحد كان معاه نوت 2 يجيب حاجة لوميا دا اكيد مجنون مش عاقل اول يوم مضايق اوي من النظام تاني يوم تالت يوم وهاكذا لحد مانزل تحديث الامبير بصراحه اول مره اعرف معني كلمه تحديث بما تحمله من معاني ف النظام دا اندرويد اي تحديث بينزل لازم يحسنلك حاجة ويسوءلك حاجة تانيه يعني من الاخر تحديث مش كامل المهم تحديث الامبير لقيت الجهاز البطاريه بتقعد بالايام طبعا حاجة جامده لقيت مميزات جامده جدا ف السوفت زي انك تلمس الشاشه مرتين تنور ونظام السينسور انك تمشي ايدك من قدام الشاشه تنور برضو وشويه مميزات جدا تحسين صوت وهاكذا والسينسورات ف اللوميا من افضل السينسوررات ف الهواتف واحسنها ف الاستجابه .. وبرضو لقيت التحديث خلي الكاميرا وهم بمعني الكلمه وخصوصا اني بستخدم كذا برنامج للتصوير بصراحه مبهرين ومنهم nokia cam وsophieLens HD.... نيجي للنظام نفسه دلوقتي لو عايز بحركه بسيطه جدا تعرف مدي سرعه النظام حضرتك ممكن تفتح قايمه الاسماء واسرع نظام بيفتح القايمه الويندوز فون الجهاز سريع جدا بدون تهنيج او اي مشاكل بصراحه مش متعود علي كدا خصوصا ان ف الاندرويد لازم كلير رام والكلام دا ف الويندوز انسي الكلام دا انا تعبت من عدم تهنيج الجهاز نفسي مره يقف معايا :D

النهايه .. العاب هاتشتري اندرويد
تصفح نت بطاريه تصوير كيبورد افضل سرعه وعدم تهنيج وجهاز مايقدمش معاك بسرعه هاتشتري ويندوز فون
وعلي فكره الالعاب علي الويندوز فون جامده جدا برضو وان شاء الله هاعملكوا موضوع فيه صور عن الالعاب لكن الافضليه للاندرويد ف نقطه الالعاب لانه مفتوح المصدر وبتقدر تنزل العاب بفلوس بس مجانا من اي منتدي

omyoussef

2014-01-26 (01:15:45PM)

لا والله مش كله كلام
انا مبقولش كلام الا وانا متأكدة منه وعارفة انا بقول ايه
اللى مسك آي فون واتعود عليه (وحط تحت كلمة اتعود عليه دى 100 خط)
مش هايعرف يمسك غيره
انما حد مسكه يومين ومعجبوش يبقى طبيعى يمسك غيره وغيره وغيره لحد ما يلاقى حاجة تريحه ولما يلاقى حاجة تريحه مش هايعرف يمسك غيرها بردو ما هى اذواق وكل واحد بيختار اريح حاجة بالنسباله

معرفش ليه الناس هنا علشان تعرض رأيها لازم تجرح فى رأى غيرها
ابتديت اكره الدخول هنا بسبب الموضوع ده
الله المستعان

CCCCCCCCCCCC

2014-01-26 (02:47:42PM)

تجربة تحترم
أوضحت و فسرت الكثير من تساؤلات الاعضاء
شكرا

Mahmoud Samir

2014-01-26 (02:55:36PM)

Ccccc تسلم ياباشا وكلنا هنا لخدمتكوا

Mahmoud Samir

2014-01-26 (03:11:49PM)

هوا انا جبت سيرة حضرتك ف التعليق ؟. بتكلميني كدا وداخله فيا شمال ليه بكل بساطة مش عاجبك تعليقي ممكن ماترديش عليه

OnlyOne2013

2014-01-26 (03:15:54PM)

معلش يا محمود صل على النبي و اعتبر ان مكنش فيه كومنت اصلا.

Mahmoud Samir

2014-01-26 (03:17:59PM)

عليه افضل الصلوات واتم التسليمات ياصاحبي مافيش حاجة بس ضايقني طريقة الكلام مش اكتر

hardtime

2014-01-26 (03:44:35PM)

محمود
تسلم ايدك يا صحبى
ام يوسف
محمود مش وجهة كلام بيعينوا ليكى واتمنى متخديش اى انتقاد بانة موجهة ليكى
انتى اخت محترمة وكلنا هنا بنقدرك وبنحترمك بليز بلاش
تزعلى من اى انتقاد واعتقد كويس ان احنا عمرنا ما سمحنا لاى عضوا فى صفحة يغلط
فى التانى

Mahmoud Samir

2014-01-26 (03:52:18PM)

حبيبي يا حودا تسلم ياصاحبي

bobma

2014-01-26 (06:14:49PM)

و جهة نظر مفيدة و رائعة تسلم ايدك و انا شايف ان ios نظام تعبن و الويندوز فون ليه مستقبل

walidelsaid

2014-01-26 (06:37:42PM)

محمود باشا.. اتفق معك تقريبا في كل ما ذكرت إلا حاجة واحده وهي بخصوص ان اللي اتعود علي الايفون بيكون صعب عليه يستخدم حاجه تانيه،،، أنا زيك في حكاية تغيير الموبايلات من كل الأنواع ومختلف أنظمة التشغيل ويكاد الموبايل لا يكمل معي الشهر ولكن الموبايل الوحيد اللي فضل معايا اكتر من ٤ شهور وده ريكورد عالي بالنسبه لي كان الايفون 4s وبصراحة كان موبايل اكثر من رائع في كل تفاصيله وهو الموبايل الوحيد اللي ندمت علي بيعه وخصوصا أني لم اجد منه جديد بأعتبار أني لا اشتري الا الجديد وفعلا تعبت جدا عشان اتعود علي غيرة من سوني TX الي جلاكسي S3 اللي كرهته جدا حتي كان الاستقرار علي Optimus G وهو بالفعل جهاز اكتر من رائع ، كل ذلك رغم انني بدأت استخدام الاندرويد من عام ٢٠١٠ اي من بداياته وكان HTC Legend ،، عايز أقول أني كنت متعود علي الاندرويد لكن مع الايفون المسألة فعلا مختلفه ومن تعود عليه بيبقي صعب جداً التغيير لحاجه تانيه وزي ما قالت الفاضله ام يوسف ان التعود بيكون بالاستخدام لفتره مش مجرد يوم او اتنين٠٠ حاجه اخيره وآسف للاطاله أنا بجد مش قادر افهم سبب التعصب لحاجه بعينها بصرف النظر عن نوع النظام في النهايه كل واحد بيجيب اللي بيناسبه واللي هو بيفضله .. حاجه تانيه أنا جبت الnote 3 وفعلا استمتعت بيه جداً وهو جهاز جبار بكل معني الكلمه وجربت الZ1 وايضاً هو جهاز رائع .. اما الان فأنا اشتريت من يومين ال IPHONE 5 S ولو فضل معايا شويه هيكون صعب أغيره وهو أيضاً ممتاز جدا.. اخيراً تحية تقدير واحترام لحبيبي محمود سمير وللرائع hardtime وللاخت الفاضله ام يوسف

hardtime

2014-01-26 (06:41:49PM)

walidelsaid
بجد وجهة نظر محترمة
واشكرك على المجاملة الرقيقة دى

kariam

2014-01-27 (01:56:07AM)

مقارنه رائعه ى محمود تسلم ايدك

Mahmoud Samir

2014-01-27 (03:29:01AM)

استاذ وليد تسلم ياباشا علي التعليق ويارب نعرف نثبت شوية عشان كدا هانفلس خالص ‎:‎:D
bomba مشكور ياباشا علي المشاركة
كيمو تسلم ياصاحبي ربنا،يخليك

Star1

2014-01-28 (12:46:18AM)

مشاركة رائعة بالرأي.. شكراً

انا كنت بستخدم الأيفون من الجيل الأول .. وحتى الآن ....
والمقولة ال بتقول (الي مسك الايفون واتعود عليه مش هيعرف يمسك غيره ) مقولة بالنسبة لي الى حد ما صحيحة

كان نفسي اجرب الاندرويد في تليفون .. خصوصا واني مبرمج وكنت بقدر استخدم الاندوريد بشكل افتراضي عشان اتعلم واشوف ... المصادر المفتوحة اغراء لا يمكن مقاومته

مشكلة عمر البطارية ( في الايفون) كانت مزهقاني في حياتي وغصب عني لازم اشيل تليفون احتياطي

قررت أشتري تليفون اندرويد ... وبدأت أبحث عن تليفون في نفس حجم الايفون بل ونفس الشكل
لان ايدي فعلاً اتعودت على الايفون .. مش بطيق الاس 3 ولا الاس 4 ولا النوت بسبب الحجم والوزن
لحد ما لقيت تليفون OT-Star 6010X تقدر تقول كده انه نسخة من الايفون في الشكل وال shape لكن بنظام اندرويد

سجلت في الموقع هنا وبدأت اشارك في صفحة التليفون دا لاني فعلا حبيت الاندرويد والتجربة وسعيد بيها جدا .. لدرجة اني بقيت نادرا ما بستخدم الايفون لان عندي بديل بنفس الحجم ال compact المريح ومش عاوز أقولك بنظام تشغيل أكثر مرونة

انا بشارك بتجربتي دي هنا عشان بس أوضح ان الأخت omyoussef بتعبر عن مستخدم ايفون برأي حقيقي ... انا نفسي كنت أسير لل 4 بوصة وال shape بتاع الايفون

وعشان اوضح ان الاستاذ Mahmoud Samir بيتكلم عن وجهة نظره الـ أنا شايف انها محايدة وانه بالتأكيد ما يقصدش تجريح للأيفونيين :D

عموما الخلاف في وجهات النظر لا يفسد البطارية :P .. ودمتم بود

Mahmoud Samir

2014-01-28 (12:56:54AM)

تسلم ياباشا علي كلامك الفوق رائع
انا برضو كانت عقدة حياتي ف الايفون البطاريه كنت بشحنه والله تلت مرات بالميت مرتين ف اليوم لاني بستخدم نت بشكل دائم علي مدار اليوم وسبب بيعي لل 4s كان البطاريه والكاميرا الكاميرا ف الضوء القليل مش حلوة نهائي طبعا كان معايا اس٣ قبله وف التصوير كان روعه

walidelsaid

2014-01-28 (01:15:56AM)

يا معلم محمود ده داء واتمكن .. الفيصل دلوقتي اني لو صبرت علي الايفون اسبوعين انا متأكد انه هيفضل معايا مدة معقولة لان فعلا اللي بيتعود علية وعلي حجمة صعب يغير لموبايل تاني مهما كانت امكاناته وخصوصا ان كل الموبايلات اللي امكاناتها عالية في الاندرويد حجمها كبير جدا مقارنة بالايفون حاجة كدة زي فردة الشبشب واسف للتعبير .. ودة من ضمن الحاجات اللي ممكن تخلي التغيير بالنسبة لي صعب ناهيك عن اختلاف نظام IOS عن الاندرويد ،، ومع التذكير اني قولت في بداية كلامي ان التغيير هيكون صعب لو فضل الايفون معايا اسبوعين فأنا بفكر اشوف الZ1 لاني جربتة مع واحد معرفة وعجبني وخصوصا اللون الابيض والله الموفق والمستعان

تلك الخدمة مخصصة للأعضاء فقط