بدون عنوان

السلام عليكم ورحمة الله وبركاته ...

والله انا كنت قررت اشترى سمارتفون جديد وقعدت اقرا واسمع ريفيوهات واعمل مقارنات واحتار واجيب م الاول وهكذا.... ، و تحديدا كنت محتار بين: سامسونج جالاكسي اس ثري ، سوني اكسبيريا اس بي ، و اتش تي سي وان اكس .... مشكلة اتش تي سي وان اكس انه غالي بفارق كبير مقارنة بالموديلين الاخرين ، مع تقارب الامكانيات وداه ميمنعش انه متفوق عليهم قليلا في بعض الجزئيات زي الشاشة مثلا وزي التصميم الرئع ، وكمان في كونه من انتاج اتش تي سي وهي شركة تتميز بجودة عالية ..... المهم ان المنافسة الحقيقية كانت بين سامسونج وسوني في النهاية ...
مميزات اكسبيريا اس بي على سامسونج اس ثري من وجهة نظري:
ـ تصميم متميز واحساس مريح في اليد ، على عكس سامسونج s3 ـ من وجهة نظري ـ ... زائد ان حجمه اصغر من اس ثري في الطول والعرض ، (وإن كان وزنه اتقل ـ جرامات معدودة ـ انا شخصيا محستش بأي مشكلة في حكاية انه اتقل من s3 ...)
لكن مهم نقول ان جسم الجهاز بلاستيك مش الومنيوم ـ باستثناء الاطار اللي بيغطي سمك الجهاز مصنوع من معدن ولونه رصاصي انيق في الموديل الاسود ـ لكن داه مش عيب في نظري طالما ان الجهاز جيد في تصنيعه ... وطبعا هو متفوق على سامسونج اس ثري في جودة التصنيع والخامات زي ما ask82 كان بيقول في تعليق تحت ...

ـ بروسيسور قوي جدا 1.7 جيجا هيرتز ثنائي النواه متفوق في اغلب رانكات الأداء على بروسيسو اس ثري 1.4 جيجا هرتز رباعي النواه... وداه يخلينا نتأكد ان اختلاف الهاردوير عند العملاقين الياباني سوني والكوري سامسونج عامل مهم جدا ( يعنى مش سرعة البروسيسور وعدد النواه هو العامل الوحيد!) ...

ـ شاشة اتش دي عالية الوضوح اعلى من شاشة اس ثري في البيكسل ـ وان كان الشاشة نفسها اصغر بقيمة 0.2 بوصة . ..... لكن الفرق الحقيقي في نظري انها شاشة tft ومش amoled >>> مين بيفضل شاشات اموليد المشهورة بيها تليفونات سامسونج؟ انا مبحبهاش .. في شاشات الاموليد بيبقا الكونتراست بين الالوان عالي جدا يؤدي الي الوان غير طبيعية ـ غير موافقة للطبيعة ,,, بينما شاشات TFT اقرب للطبيعة خاصة لما بنتكلم عن بيكسل عالي 319 بيكسل لكل بوصة ... الشاشة ممتازة والتاتش رائع (زائد ان فيه خاصية استخدام التاتش وانت لابس جوانتي سميك)

ـ البطارية اعلى من بطارية اس ثري + الشاشة اصغر = عمر اطول للبطارية
(دي مش كل مميزات الجهاز وانما مميزاته بالمقارنة بمنافسه الاس ثري)

ـ كرؤية شخصية جدا الانترفيس لسوني افضل واذكي كتير من سامسونج

- السعر ارخص من سامسونج ومن اتش تي سي طبعا ... رغم انه متفوق في البروسيور على اس ثري

عيوب الجهاز مقارنة بإس ثري:
انا مش هعرف اتكلم عن عيوب جهاز انا اشتريته مقتنع بيه لأنى لو كنت شفت فيه عيوب كتير مكنتش اشتريته ، لكن العيب اللي انا شايفه حتى الان :
- الكاميرا ... ابتداءا كل كاميرات سوني في الموبايلات مش قد كده ... وفعلا اس ثري يتفوق في الكاميرا بلا جدال ... لكن لو هتصور مناظر طبيعية او صور في اضاءة قوية هيبقا مفيش مشكلة ...
ـ الواي فاي مسافته اقل مما كنت انا متعود عليه قبل كده ودي حاجة مضايقاني فعلا، لكن انا لسه مقارنتش بينه وبين اس ثري في الموضوع داه .. وممكن يكون تليفوني القديم هو الاستثناء!
ـ

لو كنت بتفكر في جودة التصنيع والقدرة على تحمل الاستخدام الشاق، وكمان توفر فلوس ، ولو هتستخدم الكاميرا في الاستخدامات العادية مناسبات وصور اصدقاء وكده فاظن ان سوني اس بي هيكون فيه كل المميزات دي ...