بدون عنوان

الموضوع دة كان معمول على منتدى نايل موتورز حبيت انقله عشان الكل يستفيد
فى البداية احب اوضح ان الموضوع دة منقول ودة للاستفادة فا انا بستسمح الادراة انها متشلوش لانه مهم جدا جدا


تليفونك السامسونج إتسرق وعاوز ترجعه ؟

بسم الله الرحمن الرحيم

إن شاء الله هكتبكلم على طريقه تقدروا بيها ترجعوا تليفونكم لو لا قدر الله الموبايل إتسرق والتجربه دي أنا شخصيا مريت بيها وبفضل الله تعالى رجعت تليفونى بالظبط فى خلال 8 أيام

بس لازم تكون مسجل على Samsung Apps علشان الموضوع يبقى سهل شويه وأعتقد إن أغلبنا بيكون مسجل علىه

ولو مش مسجل على Samsung Apps يبقى قدامك طريقتين لكن للاسف نتيجتهم مش مضمونه ونتيجتهم هتاخد فتره طويله بس مش هتخسر حاجه لو جربتهم برضه

نييجى بقى للحاله الاولى لو انت مسجل على Samsung Apps ساعتها فيه حاله من اتنين:

1- ان اللى سرق التليفون ما يكونش عمله فورمات (او هارد ريست) وفى الحاله دي اعتبر تليفونك فى جيبك ان شاء الله
والطريقه انك هتدخل على اللينك ده وتكتب الاكونت بتاعك الخاص ب Samsung Apps والباسوورد وتعمل log in

دلوقتي هتظهرلك صفحه فيها اوبشنز كتير لكن اهم حاجه تشوف ال status بتاعت الموبايل online ولا offline
لو online يبقى الحرامي فاتح انترنت من الويرلس او من الخط نفسه وبكده يبقى سهل علينا المهمه
اما لو offline يبقى يا الموبايل مقفول او مش متصل بانترنت متقلقش وخليك متابع كل شويه واكيد يعني هييجي عليه وقت ويفتحه او يستعمل الانترنت !

دلوقتي نشوف الاوبشنز اللى موجوده فى الصفحه

اول حاجه Track my mobile ودي قسمين اول حاجه اللى هيا find my mobile ودي لو ضغطت عليها هيجيبلك مكان الموبايل فين دلوقتي بس بتاخد وقت شويه

تاني حاجه start tracking ودي بيفضل يجيبلك مكان الموبايل كل ربع ساعه لمده 12 ساعه وشخصيا افضل انك تبدأ بالاختيار الاول احسن

تانى اوبشن موجود lock my mobile ودي فيها 3 اختيارات اول حاجه تكتب رساله تظهر للحرامي على شاشه تليفونك تقدر تشتغله بيها مثلا انا عارف مكانك فين دلوقتي والبشرطه فى الطريق مثلا
تاني حاجه تكتب رقم موبايلك مثلا لو انت استبدلت الشريحه او موبايل حد تبعك يخللى موبايلك يطلبه وبالتالى تعرف رقم الحرامي
ثالت حاجه تكتب كود مكون من اربع ارقام

ال 3 حاجات دوول بيتنفذوا مع بعض فى وقت واحد على الموبايل فالتليفون بيتقفل ب lock code اللى انت كتبته من اربع ارقام وبيظهر على الشاشه الرساله اللى انت كتبتها وبيتصل على الرقم اللى انت حددته

ثالث اوبشن موجود Ring my mobile وده بيخللى الموبايل يعمل اصوات تنبيه بصوت عالى والشاشه تفضل تنور وتطفى وده ممكن يفيدك لو انك مثلا عرفت ان الحرامي موجود فى كافيه على سبيل المثال بس مش عارف قاعد فين فبالتالى التليفون بيفضح مكانه

رابع حاجه Call / Message forwarding ودي اختيارين الاول انك تحول المكالمات اللى جايه للحرامي ليك انت او تانى اختيار انك تحول الرسايل كل المطلوب انك تحدد الرقم اللى عاوز الحاجه تييجي عليه

خامس اختيار Call logs وده الاختيار المفضل بالنسبه ليا لاني بيه قدرت اوصل للى سرق تليفونى بفضل الله اولا تقدر تشوف log المكالمات اللى الحرامي عملها وتجرب تكلم اي حد منهم وتعمل حوار عشان تعرف مين اللى كلمه فى الوقت كذا مثلا

سادس حاجه Wipe my mobile اتنين اختيار يا تمسح الداتا اللى على الميموري كارد يا تمسح الجهاز كله بس كده الاكونت بتاعك المتسجل على الموبايل هيتمسح هو كمان عشان كده انا شايف انه اختيار مالوش لازمه

اخر حاجه موجوده Unlock my screen وده هيفيدك بحاجه واحده انك تفتح للحرامي ال lock بتاع الشاشه هتقولى ايه الاستفاده ااقولك نييجي عند نقطه مهمه وهي بلاش تعمل للموبايل lock او pattern او اي نوع للحمايه لان لو اتسرق الحرامي هبضطر يفرمت الجهاز عشان يفتحه وبالتالى الاكونت بتاع سامسونج هيتمسح فانت سهل عليه المهم وبلاش تعمل اي حمايه

بالمناسبه الاوبشنز اللى فاتت دي اغلبها تقدر تنفذه حتى لو الجهاز اوف لاين وبجرد ما يكون اون لاين هتتنفذ علطول

بس كده وان شاء الله متقلقش تليفونك هيرجع يعني هيرجع باذن الله وياريت لو انت معاك تليفونك ولسه مسجلتش على سامسونج سجل باي ايميل ويفضل غير ايميل ال gmail

نييجي بقى للحاله التانيه وهى انه اتسرق وانت مش مسجل اصلا على سامسونج قدامك حل من اتنين

1- يا تمشي قانوني وتعمل محضر وطلب تتبع فى النيابه ودي سكه اخرتها سد الا لو كان معاك للاسف واسطه فى نيابه او قضاء

1- اي جهاز سامسونج ليه سيريال خاص بيه وبيبعت زي نبضات كل فتره للقمر الصناعي بمكانه حتى لو مفيش نت او حتى مقفول وسامسونج تقدر هيا تعملك التتبع لكن للاسف انا كلمت خدمه عملاء سامسونج وقالولى ان الموضوع ده غير متاح فى مصر
الحل انك تجرب تبعت ميل لسامسونج بس ال globale مش الخاصه بمصر تشرحلهم فيه املوقف وممكن هما يعملولك موضوع التتبع ويردوا عليك

انتهى الموضوع وادعوا من الله ان محدش يمر بالموقف ده لانى مريت بيه وشوفت اسبوع عذاب لكن الحمد لله ربنا اكرمنى والجهاز عرفت مكانه فين وروحت للحرامي بمخبر من القسم ورجعت جهازي بس لازم يكون معاك العلبه ورقم المحضر عشان تبقى فى السليم

اسالكم الدعاء بالشفاء لابي وامى وللمسلمين جميعا

منقول للامانة وشكر خاص لـ eng. A7med Badr ,ودة صاحب الموضوع الاصلى