بدون عنوان

موضوع قريته وعجبني جداا وقولت انقله للاستفاده منه
------------------------

تحذير لوجه الله :

من قصص حدثت لي بشكل شخصي مش مجرد سمع، اكتر من 6 موبايلات الإسبوع ده فقط اتسرقت، مش موبايل بـ 700 جنيه لا ده اقل موبايل فيهم ثمنه 4000 جنيه، حوادث السرقة المعتادة كانت بتحصل كالتالي :

1-وانت ماشي فى الشارع يعدي عليك 2 بموتوسيكل من وراك ويخطفو التليفون
طبعا بتقول انا لما اسمع صوت الموتوسيكل هاخد بالي، احب اقولك انهم بيهدو وراك لدرجه انك متسمعش صوته، ده غير ان مع وقت التحدث الكبير إيدك مسكتها بتضعف عالتليفون ومع ابسط شدة للموبايل هيتاخد منك

2- وانت نازل من المواصله العامه
اللحظة دي بتكون اقل لحظه انتباهاً ليك، لأن في مصر مبقاش فيه سواق بيوقف العربية عشان سيادتك تنزل، لا احنا بقينا اقل من الحيوانات، بتنزل والعربيه ماشية مبيوقفش اساسا، وطبعا عشان تحافظ على حياتك بيبقي كل همك انك تنزل بسلام، وعالباب هيكون سوء الحظ منتظرك

3- وانت فى المطاعم او المقاهي
فيه ناس، وانا "كنت" منهم بيحب يفضي كل اللى في جيوبه عشان يكون مستريح في الفتره اللى قاعدها فى المطعم او الكافية، وفى الوقت ده لازم هتيجي لحظه انت فيها مش منتبه وساعتها للأسف متلومش غير نفسك

4- الأكل فى الشارع
وانت بتاكل في الشارع وقاعد جوة العربيه دايماً عند المحلات المشهورة فيه ناس بتترقب الجماعه اللى بياكلو فى العربيات، لأنهم "بالتعريف او المنطق بتاعهم" ناس مرتاحه واكيد معاهم تليفونات تستاهل
والحرامي هينتظر اي لحظه انت فيها إما مشغول بالأكل او بتحاسب او بتدي اكل لحد من اللى معاك فى العربيه

5- ودي الأفظع: انك تتثبت
وهنا طبعا مش محتاج اشرح ايه اللى بيحصل، هتتقلب في كل شىء ويارب تطلع سليم

---------------------------

طيب إيه الحل ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ ؟

1- وانت ماشي فى الشارع، يا إما تمسك الموبايل كويس جدا وتمشي عالرصيف مش فى وسط المواصلات، يا إما تدخل عمارة تتكلم وتخلص كلام ، يا تشتريلك سماعه بلوتوث، او توصل موبايلك بسماعاته العادية

2- خلي موبايلك دايماً فى جيب ضيق مش واسع وعميق قدر الإمكان

3- وانت نازل من المواصله العامه إيدك على حاجتين، جيب المحفظه والجيب اللى فيه الموبايل، البنات اللى بتحط الموبايل فى الشنطة، خلي شنطتك قدامك وانت نازله مش تحت دراعك

4- وانت فى مطعم يا تخلي الحاجات بتاعتك على الترابيزه جنب الحيط او تخليها فجيبك ومش مهم تقعد مرتاح، او طلع الحاجات اللى ملهاش قيمه

5- وانت بتاكل فى الشارع في عربيه- ارفع الإزاز بحيث لو حد مد إيدة يدخلها بصعوبه جدا يعني يادوب تدخل هوا وخلاص ... وبلاش تلعب Angry Birds فى الإشارات او Whatsapp لو كنت قاعد جنب اللى بيسوق، خلي موبايلك فجيبك احسن ما تندم بعد كده

6- لو انت من سائقى السيارات لازم ترفع الزجاج اللى جنبك والبعيد وتقفل سقاطة الباب ولو معندكش سنترلوك تتأكد ان كل الابواب مقفولة ، ويستحسن لو فيه تكييف تقفل الزجاج علي الاخر كمان ، واى حد يعمل انك خبطته او دست علي رجله متسمعش الكلام ولاتقف اصلا ولاتكلمه بيخبطوا الربع الخلفى بالقصد علشان يحسسك انك خبطته بجد. كل دة للحرص بس ساعة القدر مش هتحس بحاجة برضة بس لازم نكون حريصيين على قد مانقدر.

7- مش عارف اقولك إيه عشان متتثبتش، لكن عالأقل ابعد عن الأماكن اللى مفيهاش إنارة وهي الحمد لله مؤخراً بقت كتير، حاول متكونش لوحدك
ولو انت من هواه المشى على الكورنيش فى اسكندريه - امشي بلبس رياضي وخد المفاتيح فقط معاك

------------------------------

اللهم بلّغت... ومتقولش انا جدع والناس دي كلها هبله، من حيث انت مطمئن يأتيك السارق