بدون عنوان

للرجوع الي صفحة سامسونج Galaxy Note II N7100 الرئيسية اضغط هنا

shin545

2013-09-13 (12:44:48AM)

انا اشتريت نوت2 من اقل من اسبوعين وبسمع في المكالمات لما الشبكه تقل يعني مثلا الشبكه 5 شرط لما تبقىى 4 شرط او تلاثه وترجع لخمسه الي هيه الحركه الطبيعيه لقوه الشبكه بيصاحب ده صوت ذبذبات شبكه بتسبب ازعاج للشخص الي انا بتصل بيه بيقولي ابعد عن اي تلفزيون او راديو وانا مبيكنش جمبي اي حاجه زي ديه انا الشريحه كانت شريحه عاديه وانا قصتها عشان تركب ممكن تكون ديه المشكله ولازم اشتري شريحه ميكرو جاهزه ولا المشكله من التلفون...ارجو المساعده لاني قلقان من الموضوع ده لو في حد صادفه المشكله ديه مثلا؟؟؟؟

3ashry

2013-09-13 (10:03:46AM)

الف مبروك على الجهاز وافتكر كده ربما يكون عندك مشكله فى الهاتف ..وبعدين حجم الشريحه ملوش علاقه ....لانى بعمل مكالمات بشرطه واحدة ومحدش قلى انى فيه صوت زبزبه ولازنه فى المكالمه .....لو جهازك فى الضمان ما تتردش ترحلوهم وانشاء الله يرجع قبل 14 يوم من الشراء بس جرب تعمل اعاده ضبط المصنع الاول وبعدين فيه ملحوظه مهمه هل شخص واحد فقط ام كل اللى بتتصل بيهم ؟لان المشكله ممكن تكون من تليفون الطرف الاخر ا وده وارد جدا ......ومتقلش وتطمنى عملت ايه

shin545

2013-09-13 (02:35:16PM)

الف شكر على اهتمامك يا باشا 3ASHRY
انا والله مشكلتي بقا جايه في مقتل ليه... المشكله ديه مبتظهرش غير في مناطق معينه زي المطبخ ومدخل البيت المناطق الي فيها شبكه ضعيفه جدا اما في الشارع وباقي اجزاء البيت بتظهر برضه بس بالعافيه نادرا جدا يعني لما بتظهر فانا لما هروحلهم هقلهم انا عايز استبدال مش صيانه يعني لازم العيب يبقا ظاهر وواضح جدا عشان يقبلو يرجعوه فده كلام غريب جدا وعيب صعب اظهاره ليهم لازم الشبكه تكون ضعيفه وكده لانها خارج المنطقه ديه بتبان بالعافيه فمش عارف اعمل ايه انا عملت اعاده ضبط المصنع
وهروح اجيب شريحه ميكرو يمكن حصل حاجه في الشريحه...ملحوظه لما بحط الهاند فري او بشغل السبيكر بتروح وانا في المطبخ مثلا ولما ارجع للسماعه الداخليه بتظهر انا هتجنن منها والله تنصحوني بايه؟؟اروح واخش فيهم شمال حتى لو عيب مظهرش اودامهم ولا اعمل ايه؟؟؟؟؟!!!!

3ashry

2013-09-13 (03:18:54PM)

لازم تروح التوكيل وتقولهم التليفون فيه زنه وذبذبه وبتظهر مع ضعف الشبكه وعلى فكره وارد جدا المشاكل دى انا كان معايه والله جهاز صيني كان فيه المشكله دى وغيرته من المحل د ه عيب وظهر معاك وخانقك وكمان انت دافع اولوفات فيه فمن حقك تاخد جهاز غيره واوعى تمشى من غير ماتغيره وان ماتغيرش تقولهم انا اسف لانى هروح ابلغ فى الغش التجارى وهما يجبولك حقك واوعى تتهون فى حق من حقوقك بس بسرعه قبل 14 يوم وعايزك تاكد لهم انك قرفان من التليفون ومش عاوزه وبأكد عليك تغيره فى الحال لايقولك صيانه ولاغيره ومتخفش وربنا معاك

shin545

2013-09-13 (09:46:30PM)

حاضر يا باشا هروح بكره الصبح انشاء الله وهبقا اطمنك لاني معرفتش اروح النهارده...واطمن قلبي قايد ناااااااااااار يا بوي :)

MuhammadSaied

2013-09-14 (12:24:32AM)

طب قبل ما تروح ليه متجربش خط تانى ممكن المشكلة تكون فى الخط او فى شبكة الخط ده فى اماكن معينة

shin545

2013-09-14 (03:02:15AM)

استاذ محمد سعيد
جربت خط اخر غير فودافون لان فودافون هو الخط الاساسي روحت اخدت خط اتصالات ميكرو من حد اعرفه وجربت المشكله كانت بتظهر اكتر لان اتصالات اضعف في الشبكه قليلا وجربت موبيل اخر في نفس الاماكن ولا فيه اي مشكله....ولما بيظهر صوت الذبذبات في النوت 2 وبفتح الاسبيكر الطرف الاخر بيقولي ان الصوت واضح للغايه والذبذبات اختفت ولما احط سماعه الهاند فري ايضا المشكله بتختفي اول مرجع للسماعه الداخليه واتكلم عادي الصوت ده يرجع فورا....بس المشكله انه في الشارع المشكله تقريبا بتبقى صعبه الظهور بتظهر ولكن لوقت بسيط جدا مبتسببش ازعاج في الكالمه اما في البيوت مع ضعف الشبكه بتظهر وبتزيد وانا رجعت لشركه فودافون واشتريت شريحه ميكرو جاهزه والمشكله استمرت واكدولي ان المشكله من التفلون...السؤال بقا هل ديه ممكن تكون في السوفتوير نفسه ولا ديه بالتاكيد هارد وير؟؟؟ انا كده كده هروح احاول ارجعه بس عايز ابقا فاهم يعني لان الجهاز ممتااااااااز في كل شئ ولا يوجد به اي عيوب!!!!

shin545

2013-09-15 (12:21:35AM)

سؤال للاعضاء الي فاهمين في السوفتوير...هل الجهاز لو نازل عليه سوفتوير خاص باوروبا وتحديدا بولندا هل ممكن ان يتسبب في مشكله الي الشبكه في مصر؟؟؟

MuhammadSaied

2013-09-15 (01:42:50PM)

السوفت وير ملهوش علاقة حتى لو كان نسخة صينى انته المشكلة عندك هارد وير روح للمكان اللى اشتريته منه وبدله ومترضاش انه يتصلح

eng_ah_maher

2013-09-16 (04:20:17PM)

انا بردو بتقابلنى نفس المشكلة ومش عارف اعمل ايه
كل اللى بيحصل معاك ده بيحصل معايا بالظبط
ياريت تطمنا قالولك ايه ف التوكيل عشان انا عدى عندى ال 14 يوم

eng_ah_maher

2013-09-16 (04:26:08PM)

مع العلم ان المشكلة مش بتحصل مع كل الارقام لكن بعضها بس !!!

shin545

2013-09-16 (08:16:31PM)

eng_ah_maher & 3ashry& mohamed saied& اعضاء الموقع الكرام
انا مشكلتي ان شاري الموبيل بضمان دولي مش مصري بس ده ممنعنيش اني اروح لتوكيل سامسونج عشان خاطر اسال العيب ده ليه يعني فروحت والراجل المهندس الي شغال في مركز الصيانه الخاص بسامسونج قالي ده عيب تصنيع في دايره السماعه الداخليه لان المشكله بتروح لو ركبت الهاند فري او شغلت الاسبيكر اول مرجع للسماعه الداخليه الزنه بنظهر على طول وبتظهر مع ضعف الشبكه ان الشبكه مثلا 5 شرط بتوصل لاربعه او تلاته وترجع لخمسه الي هيه الحركه الطبيعيه لقوه الشبكات بتاعت المحمول فمثلا لو انا في الشارع مبتظهرش اوي ولو الشبكه 5 شرط ثابته بتظهر بالعافيه جدا جدا وممكن متظهرش اما في البيوت بتبقا مقرفههههه فعشان كده بيتهيقلك انها لارقام معينه مش لكل الارقام لاني اتهيقلي في الاول كده برضه ففعلا روحت للتاجر لاني لسه في ال 14 يوم ومرضيش يرجعه لان العيب فعلا مكنش ظاهر في عنده في المحل لان الشبكه عنده مبترمش قويه جدا جدا جدا فمش عارف اقنعه لدرجه اني كلمت جهاز حمايه المستهلك وقالولي الضمان الدولي مبندعمهوش لازم يكون ضمان مصري عشان نحرك الشكوى قولتلو ديه عمليه بيع وشراء طبيعيه ومعايه فاتوره من التاجر وانا لسه في ال 14 يوم اجيب حقي ازاي والراجل مش هيرجعه راح الموظف الي بيكلمني بتاع حمايه المستهلك قالي كده بالنص (هات حقك بدراعك بقا) لان شرحتلو المشكله والتاجر بيتعامل معايه ازاي....وفعلا مكدبتش خبر وفضلت في معاناه مع التاجر لحد ماستقرينا اني ازود 300 جنيه على ال 3700 جنيه الي دفعتهم واخد واحد جديد متبرشم بضمان مصري. ودلوقتي انا سايب جهازي عنده وبحضر الفلوس وهروحلو بكره ..عايز اسال كام سؤال ليكو ازاي اعرف ان الجهاز متفتحش قبل كده وهل ممكن يكون الجهاز متبرشم وفي حته من ورقه الضمان الزرقا ديه خارجه بره العلبه وهيه متبرشمه ولا التوكيل مبيعملش كده وايه اول الحجات الي ابص عليها لان الوقت عندو وانا بجرب هيبقا ديق؟؟؟
وربنا يستر واخد حاجه كويسه في الاخر...

3ashry

2013-09-16 (09:53:39PM)

كده انت برنس... اهم حاجه ترجع التانى وماتتنزلش عن تغيره انا كنت متخيل انه ضمان داخلى مصرى على العموم 300 جنيه فرق زى الفل.. وبعدين هتاخد ضمان سنه وارتجاع خلال 14يوم وماتقلقش وانشاء الله يكون جديد وربنا يباركلك فيه .....ويارب الاستاذ (محمد سعيد) يفيدك اكتر منى فى شكل العلبه والجهاز قبل الاستعمال ..لانى انا اشتريت جهازى مستعمل وربنا يوفقك وقولنا وصلت لغاية فين

MuhammadSaied

2013-09-17 (03:56:37PM)

بص بالنسبة للجهاز الجديد لازم تكون العلبة مقفولة من الجنب بتكت ابيض مكتوب علية بالانجليزى وده اسمه سيل أو قفل قبل ما يفتح العلبة بتبقى اللزقة البيضا دى على العلبة من قدام ومن الجنب لازم تتاكد كويس انها موجوده ومش مفكوكة قبل كدة.
لما تفتح الجهاز جرب الكاميرا والفيديوا وشغل اغنية هادية وعليى السماعة على الاخر وشغل اغنية موسيقتها مزعجة اجنبى مثلا وشوف فى خروشه ولا زنه و جرب الهاند فرى كمان.
حط خط واعمل مكالمه مش اقل من 5 دقايق واتحرك فى المحل وخلى اللى بيكلمك يتصل بيك تانى بعد ما تقفل بدقيقتين وتكون شيلت الكافر او الضهر واتكلم معاه من غير الكافر لانه بيعزز الشبكة ولو اتشال بتبان شبكة الموبيل نفسه جودتها وقوتها عامله ايه.
جرب الانترنت وافتح كذا حاجه مع بعض وشوف الجهاز حيشتغل عادى ولا حيعمل ريسترت ولو هنج وعمل ريستارت رجعهوله.
امس الموبيل واقلبه وشوف الشاشة حتتغير معاك ولا لا "طول + عرض " عشان تتطمن على السينسور ومتنساش تتطلع القلم وتكت نوت وتشوف استجابة الشاشة ليه.
مبدئيا كده لو عملت اللى قولتلك عليه والجهاز عمل كل ده بدون مشاكل اتوكل على الله لاننا كده تقريبا راجعنا على كل الهارد وير.
والاهم انك تاخد فاتورة مختمومة بختم المحل اللى بيبقى مكتوب فيه اسم المحل + رقم السجل التجارة واحيانا الرقم الضريبى.
وبالتوفيق أن شاء الله

MuhammadSaied

2013-09-17 (04:01:47PM)

نسيت اقولك ان العلبة بتبقى مقفولة ومفيش حاجه خارجة منها والضمان بيكون بره او جوه ومقفول عليه
وخد وقتك وانته بتجرب انته دافع مبلغ محترم ومتستعجلش وعلى مهلك ده حقك ومتروحش لوحدك حاول تاخد اتنين اصحابك معاك عشان لو فكر يقولك حاجه وانته بتجرب يقلق ويقضيها سكات احسنله
ويارب اكون قدرت اساعدك

shin545

2013-09-18 (01:24:22PM)

انا متشكر اوي لتعبكم معايه بجد انتو ناس جدعان جداا...اخر سؤال للاع

shin545

2013-09-18 (01:32:52PM)

الف الف شكر ليكو ولتعبكم معايه انا فعلا هعمل الي انتم قولتلولي عليه بالظبط انتم جدعان بجد...
انا فعلا روحت وقالي الي موجود اللون الجراي في الوقت الحالي وانا كنت عايز الابيض فقالي استناني ليوم الخميس القادم والعلبه كانت بالظبط زي ما الاستاذ mohamed saied وصف الا الضمان خارج من جوه العلبه جزء صغير منه اعتقد ان ده طبيعي طالما اللزقات بتاعت السيريال مظبوطه..
سؤال اخير للاعضاء الكرام اللون الابيض مع الاستخدام متعب في نضافته واللون بيقلب على الابيض المصفر شويه في زرار الهوم وكده ولا مريحكم في اللون؟؟ عشان لو كده ابقا اجيب الجراي برضه لانه شيك برضه مش وحش

MuhammadSaied

2013-09-18 (03:02:40PM)

شكراً على ايه بس ده اقل واجب وبعدين مينفعش نشوفك او نشوف اى حد فى مشكلة ومحتاج مساعده ومانساعدهوش ده حتى يبقى شكلنا وحش هههههههههههه.
بص انا معايا الجراى لون جميل ومحترم الاهم انه ثابت ما بيتغيرش وتنظيفه سهل
الابيض شيك جدا جدا بس بيبان عليه اوى التراب و عدم النظافة المستمره بتخلى شكله مش تمام والمفروض انه ما بيتغيرش والله اعلم واللى معاه اللون الابيض ان شاء الله يرد عليك ويطمنك بس لو عايز تبقى فى الامان الجراى او الازرق

تلك الخدمة مخصصة للأعضاء فقط