j7 ولا m4 aqua dual

هنتفق علي قاعده عموما ان ما فيش جهاز كامل متكامل وكل جهاز فيه ميزه مش موجوده في التاني وحاليا اصبح كل الموبايلات متقاربين من حيث المواصفات والأداء من نظام الاندرويد ولكن الاختلاف ان كل شركة بتضع لمساتها في اضافه التحسينات سواء علي المكونات الداخلية او الشكل الخارجي وفي نقطه مهمة لما اجي اشتري موبايل وهي ..... هل ليه دعم كامل سواء مادي (اكسسوارات وقطع غيار وصيانه )او دعم فني (سواء روم رسمي وتحديثاته من الشركة المصنعه +رومات غير رسمية وبرمجيات من المطورين) .

طبعا اول حاجة لما نيجي نقارن بين أجهزة لازم نضع في الحسبان الاتي عشان المفاضلة تبقي سليمة :

سعر الشراء ونظام الهاتف(اندرويد ولا ويندوز فون ولا أي او اس ولا عادي) و احتياجي للتليفون ايه (جيمز متوسطة ولا عالية ولا ما ليش في الألعاب خالص وتطبيقات عادية) والتصميم(معدني ولا بلاستيك ولا زجاج) وقوة المعالج(قوي ولا متوسط ولا ضعيف) والرام (عالية ولا متوسطه ولا صغير) والشاشة (كبيرة ولا متوسطه ولا صغيره)نوعها(سوبر اومليد ولا أي بي اس ولا تي اف تي) ووضوع (عالية ولا متوسطه ولا قليلة ) وبطارية(عالية ولا متوسطه) وكاميرا (عالية ولا متوسطه )والذاكرة الداخلية وهل يقبل ذاكرة خارجية من عدمه كل الحاجات دي هتساعدني اني اتخذ قرار سليم .

اسف علي الاطالة
نيجي بقي للموضوع الأساسي

اكسيبريا ام 4 اكوا : طبعا اول ميزة فيه انه مقاوم للمياه وبيدعم التصوير تحت المياه حتي 30 دقيقة علي عمق 1.5 م ...وطبعا المياه العذبه النقية وبأكد علي الموضوع ده وفقا لمقياس ip وطبعا ال j7 ما فهوش الميزة دي .
المعالج في السونى من انتاج كوالكوم شريحة سناب دراجون طراز 620 /8939 بقوة 1.5 جيجا هيرتز اوكتا .وأما السامسونج اكزينوس 1.2 اوكتا والإتنين نفس المعمارية ... في الأداء الأمثل للجهاز وإدارة التطبيقات معالج اكزينوس في j7 أما لو العاب وجرافيك يبقي معالج كوالكوم شريحة سناب دراجون يعني هيتفوق السوني في الألعاب عن السامسونج .
الرامات في سامسونج 1.5 ج اما في السونى 2 ج. يبقي في النقطه دي الأفضليه لـــ السونى .
الذاكرة الداخلية في السونى 8 ج اما السامسونج 16 والاتنين بيدعمو الذاكرة الخارجية .
الشاشة في السامسونج 5.5 والسونى 5.1 وسامسونج تقنية السوبر اموليد اتش دي 720*1280 والسونى بتستخدم تقنية الاي بي اس بنفس دقه سامسونج ولكن البيكسلات في سوني اعلي من سامسونج .

الاتنين فيهم راديو والسوني طبعا الراديو فيها غير داعم للتسجيل عكس سامسونج .

الكاميرا في السامسونج والسونى نفس الميجا بيكسل 13 بس للأمانة كاميرات السونى وتطبيقاتها الرسمية عموما أفضل وبأكد علي الجزئية دي وسامسونج حبت تقلدها في الموضوع ده .وده عن تجربة شخصية ليا
البطارية في السونى غير قابلة للإزالة بقدرة 2400 عكس السامسونج قابلة للأزاله وبقوة 3000 ... للأمانة بطاريات السونى في الأداء ممتازه افضل من السامسونج وده عن تجربة شخصية ليا .
...................................

الخلاصة عشان انا حيرتك كده ...

السونى ام فور اكوا افضل من السامسونج 7:

1- الأداء في الألعاب وتطبيقات الجرافيك .
2-الرامات.
3-مقاوم للمياه العذبة النقية.
4-التصوير في المياه .
5-كاميرا السونى تتفوق علي السامسونج.
6-بيكسلات الشاشة اعلي وبالتالي هتكون الصورة اعلي دقة .
7- الشاشة من نوعية ips ودي في استهلاك البطارية ممتازة.

السامسونج j7 افضل من السونى m4
1-الاداء في الجهاز عموما من تطبيقات وادراة وتشغيل .
2-ذاكرة داخلية أعلي .
3-شاشة أكبر والنقطة دي مهمة لمن يرغب شاشة كبيرة.
4- بطارية قابلة للأزالة والجزئية دي مهمه .
5- الصوت أعلي من السونى (سواء في الخارجية او صوت سماعه المكالمات).
6-الكاميرا الامامية بفلاش والكاميرتين عموما من حيث جوده التصوير جيده جدا .
7- سوق الإنتشار واعاده البيع والدعم المادي والفنى الأفضلية للسامسونج طبعا بلا منازع ..

شوف الجهازين علي الطبيعة واللي هاتقتنع بيه اشتريه ....... الجهازين كويسين.....

بالتوفيق يا كبير ...

بص أنا كنت بحاول أعرف إيه الأحسن مابين سامسونج j5 ولينوفو A7000 بصراحة الأراء عقدتني من كل الموبايلات اللي فى العالم كل واحد له رأي غير التاني وأى جهاز يخوفوك منه بجد أنا عن نفسي أتخنقت لغاية أما أستقريت على الهواوي اسند G7 لقيت واحد قاللى ده اصدار الأندرويد بتاعه قديم