بدون عنوان

مراجعتى المتواصعة للهاتف بعد استعماله لمدة اربع ايام

1- اول حاجة الشكل : الموبايل روعة وشيك جدااا ومختلفى ويخطف العين اول ما تشوفه الصراحة وانا بشتريه كنت عايز اخطفه من ايد الراجل وهو بيشغلهولى بجد شكله رائع جدا

2- الشاشة : طبعا ال PPI بتاعة الشاشة قليله جدا 217 بيكسل وكانت حاجة قلقانى جدا لكن اتفاجئت ان الشاشة الوانها جميلة وواضحة جدا حتى فى الشمس مع ان السولا اللى كثافته اعلى من ده مكانش بيبان خالص تحت الشمس ف بجد محدش يقلق من الشاشة وحجمها مناسب جدا مش كبير اوى .. ومن وجهة نظرى 4.3 انش هو الحجم المناسب للتليفون اكبر من كدة هيبقى كبير جدا ورخم

3- الصوت : الموبايل صوته اعلى من المتوسط مش جامد اوى واعلى من السولا بس مش كتير وللاسف السماعات اللى جاية معاه وحشة جدااا يعنى اى حد ناوى يشترى الفون ده يعمل حسابه على سماعة جديدة صوتها واطى جدا .. واتاكدت انه من السماعة مش من التليفون لانى جربت سماعة السولا وكان الصوت عالى وواضح واعلى من السولا كمان .. فهو عيب من السماعة نفسها

4- السرعة : طبعا كله مقلق من 512 رام و 1 جيجا بروسيسور دوال كور لكن فعلا الموبايل سريع طبعا مش الاسرع لكن عمره ما علق او حصل فيه lag رغم انى نزلت عليه حوالى 20 app و 5 العاب ساعات بيعمل لودينج ف حدود خمس ثوانى ف تشغيل البرامج لكن عمره ما علق و smooth جدا ودى حاجة مش موجودة فى الموبايلات الاندرويد حتى ال high-end منها ايا كان الامكانيات لازم بيحص lag او تعليق

5- نظام التشغيل : طبعا زى ما قولت نظام التشغيل سريع ومفيهوش lag خالص لكن له عيوب رخمة طبعا .. اول حاجة فى حاجات اساسية موجودة ف اى نظام تشغيل هتفتقدها فى الويندوز فون زى ال widgets تحسه نظام معقد شوية وعشان تعمل حاجة او تفتح مثلا واى فاى لازم مليون خطوة مش مسهل الامور يعنى ومثلا مش بيبان مدة المكالمات فى ال log حاجات صغيرة كدة بس بتخنق ساعات .. طبعا ده غير ان معظم الالعاب ال free رخمة جدا ومفيش تنوع كبير فى ال apps لكن ال apps الاساسية معظمها موجود .. طبعا النظام نفسه شكله شيك وجميل جدا

6- الكاميرا : طبعا الموبايل ده بكاميرا 6.7 و بعدسة f/1.9 وهو اوسع عدسة فى اى موبايل واوسع حتى من لوميا 920 و HTC One طبعا باستثناء P808 وده مخلى جودة التصوير الليلى رووووووعة حتى لو مفيش نور خالص الصور بتطلع منورة بجد جامدة جدا التصوير بالنهار متوسط مش جامد اوى زى الليلى لكن مش وحش .. يأدى الغرض يعنى وبصراحة احلى حاجة ف نوكيا والويندوز فون منزلين برامج كتير جدا للكاميرا والصور .. اكتر حاجة مهتمين بيها ( مجربتش تصوير الفيديو لحد دلوقتى )

7- التاتش : التاتش فى الموبايل سريع جدا خصوصا ان الشاشة Super sensitive يعنى ممكن تشتغل بمفاتيح او وانت لابس جوانتى .. بصراحة رائع جدا

8- البطارية : اهم واحلى حاجة فى الموبايل ده بجد البطارية روعة .. انا السولا كنت بشحنه تقريبا 3 مرات كل يوم وساعات اكتر .. الموبايل ده مع الاستعمال المتوسط هيفضل معاك لاخر اليوم مستريح
لو استخدام جامد هتضطر تشحنه مرة كمان .. واعتقد ان لسة اداء البطارية هيتحسن مع الوقت

9- السعر : الموبايل الصراحة سعره مبالغ فيه خصوصا لما تقارنه بسعره ف السعودية 1200 ريال يعنى حوالى 2400 مصرى ..
وجهة نظرى النهائية : الموبايل رووووووووووعة وبجد مجرد ما بشوفه بتبسط حقيقى شكله جميل جدا ( اللون الاصفر ) ومكفى احتياجاتى تمام .. من رأيى لو عايز حاجة مختلفة عن اللى موجود ف السوق وعن اللى ف ايد الناس كلها وشكلها شيك ويهمك الكاميرا والبطارية ومش همك اوى الالعاب والبرامج ومستعد تدفع زيادة .. انصحك بال 720 عن تجربة .. روعة :)