احمي بياناتك: ليه لازم تعرف كل الأرقام المسجلة باسمك؟
في الفترة الحالية بياناتنا الشخصية بقت هدف سهل لأي حد بيحاول يستغلها، خصوصًا مع انتشار خدمات الاتصالات وسهولة تسجيل خطوط الموبايل. من أخطر الحاجات اللي ممكن تحصل لأي شخص هي أن يتسجل باسمه رقم موبايل هو مش عارف عنه حاجة. والموضوع ده مش بس إزعاج، ده خطر حقيقي ممكن يوصلك لمشاكل قانونية ومالية من غير أي ذنب.
تخيل حد يستخدم رقم باسمك في نشاط غير قانوني زي النصب أو الابتزاز أو حتى إرسال رسائل مشبوهة! في الحالة دي، أي تحقيق رسمي هيبدأ باسمك لأن الخط متسجل ببطاقتك الشخصية "برقمك القومي". كمان، شركات الاتصالات ممكن تطالبك بتسديد فواتير أو مستحقات لخطوط أنت أصلاً مش بتستخدمها، وده ممكن يأثر على تقييمك المالي، أو يخليك تواجه صعوبات في الحصول على خدمات تانية زي التقسيط أو القروض.
غير كده، وجود أرقام بأسمك من غير علمك معناه إن بياناتك اتسربت أو في جهة معينة استخدمتها من غير إذنك، وده بيشكل انتهاك مباشر لخصوصيتك، وبيفتح باب لمشاكل أكبر في المستقبل.
عشان كده، مهم جدًا تتابع باستمرار وتشوف هل في أرقام موبايل مسجلة باسمك من غير ما تعرف، وتحافظ على بياناتك دايمًا محدثة ومؤمنة. وده بالضبط الدور اللي بيقوم بيه الجهاز القومي لتنظيم الاتصالات من خلال تطبيق "NTRA" وخدماته المختلفة.
إزاي تعرف الأرقام اللي باسمك؟
دلوقتي معظم شركات الاتصالات بقت بتوفر خدمة تقدر من خلالها تعرف الأرقام المسجلة باسمك، سواء من خلال الأكواد المختصرة أو تطبيقات الهواتف أو الموقع الإلكتروني الخاص بالشركة.
كمان الجهاز القومي لتنظيم الاتصالات في مصر (NTRA) وفر تطبيق رسمي اسمه "NTRA" تقدر تحمّله على الموبايل (متوفر على Android وiOS). التطبيق ده مش بس بيساعدك تعرف الأرقام المسجلة باسمك، لكنه بيقدم مجموعة خدمات مهمة جدًا، منها:
- "ارقامي" تعرف كل أرقام الموبايل اللي مسجلة برقمك القومي.
- "المحافظ الالكترونية" تقدر تعرف المحافظ الإلكترونية المسجلة برقمك القومي
- تعرف عدد الخطوط اللي عندك من كل شركة.
- تقدم شكاوى أو استفسارات مباشرة للجهاز.
التطبيق آمن وسهل الاستخدام، بيوفرلك وسيلة مضمونة وموثوقة لمتابعة بياناتك الشخصية وحمايتها من أي استغلال.
الخدمات التي يقدمها تطبيق NTRA:
معرفة الخطوط المسجلة باسمك
تقدر تشوف كل أرقام المحمول المرتبطة برقمك القومي، ومين الشركة المشغلة لكل رقم.
تقديم الشكاوى والاستفسارات
لو عندك شكوى من أي شركة اتصالات، سواء بسبب سوء الخدمة أو مشاكل في الفواتير أو الباقات، تقدر تقدّم الشكوى من خلال التطبيق، و هتوصلك رسالة بالرد والمتابعة.
مقارنة العروض والباقات
التطبيق يتيح لك إنك تقارن بين العروض المختلفة من كل شركات المحمول (فودافون – أورنج – اتصالات – وي)، وتعرف مين بيقدم أفضل سعر وجودة حسب استخدامك.
تغطية الشبكات وجودة الخدمة حسب منطقتك
من خلال خاصية اسمها "خدمة التغطية"، تقدر تعرف جودة الشبكة في منطقتك، من حيث سرعة الإنترنت وجودة المكالمات، وتقرر أنهي شركة مناسبة ليك.
أكواد الخدمات المختصرة
التطبيق يجمع كل الأكواد المهمة زي كود الغاء الكول تون، كود معرفة الرصيد، كود تحويل الرصيد، إلخ، لكل الشركات.
خدمة نقل الرقم بين الشبكات
لو عايز تنقل رقمك من شركة لشركة تانية بنفس الرقم، تقدر تعرف شروط وخطوات النقل من خلال التطبيق.
بيانات التعاقد وحقوق المستخدم
تقدر تعرف حقوقك كمستخدم لخدمات الاتصالات، وشروط التعاقد، وسياسات الاستخدام العادل، علشان تكون دايمًا في أمان ومفيش حد يضحك عليك.
رابط تحميل التطبيق:
يمكنك تحميل التطبيق علي موبايلك من خلال الروابط المذكورة بالاسفل
Google Play:
https://play.google.com/store/apps/details?id=eg.gov.tra
App Store: