بدور علي ايه؟ اكتب رقم موديل الموبايل الابدور عليه

تجربتي مع موبايل Samsung Galaxy Fit S5670

تجربتي مع موبايل Samsung Galaxy Fit S5670
تاريخ النشر:

بواسطة العضوة : lolo16


انا هكتبلكم عن تجربتي مع

Samsung Galaxy Fit S5670



الموبايل انا جبته ب 1400 جنيه من المتحده

معاه ضمان لمدة سنه

والضمان مكتوب فيه انه من يونيون جروب

والصيانه مجانا لمدة 14 شهر من تاريخ الضمان

الموبايل جبته ميتالك بلاك


محتويات العلبه :

الجهاز طبعاً-

وصلة يو اس بي-

شاحن منزلي-

2 كتالوج واحد عربي وواحد انجليزي-

كتالوج خاص بالضمان وباللغه العربيه والانجليزيه وعلى ما اظن باللغه الايرانيه -

2 سي دي خاص ببرنامج كايس وعلى ما اظن بردوا ده برنامج زي نوكيا بي سي سيوت


كارت ميموري 2 جيجا ومعاه ادابتور

سماعه




وعلبة الموبايل صغيره مش كبيره لأني لقيت بعض الفيديوهات على اليوتيوب جايبه علبه كبيره

دي صورة محتويات العلبه




اول ما جبت الجهاز لقيت فيه برامج اسلاميه جايه مع الجهاز زي القران الكريم -القبله- الاذان

الجهاز كمان فيه

يوتيوب

جي ميل

جي توك

جوجل سيرش

اوفيس

وده شئ بسطني اوي الحمد لله

تعليقي على الجهاز بعد ما اشتغلت عليه

اولا بالنسبه للتصوير

انا بصراحه كنت خايفه من التصوير بالموبايل وده لسبب

اني كان معايا نوكيا

n95

 وكان تصويره رائع سواء فيديو او صور


لكن بعد ما صورت بسامسونج اكتشفت ان صورته احسن من نوكيا كمان

والتصوير فيه بالفيديو والصور اكثر من رائع

ودي اول صوره صورتها بيه





ده جدار حائط عندنا وسلوك النت عليه

ووالله انا وريت الصوره لأختي مصدقتش وكانت بتحسبها صوره جايباها من النت

ودي صوره كانت في اللاب توب وصورتها بالموبايل

 



وده فيديو صورته بالموبايل


ملحوظة: موقع يتيوب قام بضغط الفيديو و تقليل الجودة

و ما شاء الله وضوح الشاشه رائع

و السرعه جميله

الصوره في الإضاءه الخفيفه الصوره جميله لاني بظبط الوضع ليلي والصوره طلعت جميله بجد

يعني محستش ان في عيب فيه بسبب عدم وجود الفلاش

بالنسبه للبرامج

 انا اول مره اشتغل على نظام اندرويد وكنت خايفه من التعامل معاه


لكن بعد ما دخلت ماركت اندرويد اكتشفت ان برامجه رائعه وممتعه جداً

والعابه جميله جداً وخصوصا العاب الاطفال رائعه واي طفل هيحبها

بالنسبه لتصفح النت

اول مشكله قابلتني هى الدخول على النت عن طريق الوايرلس

المشكله كانت ان الموبايل مش قادر يشوف شبكة اللاب توب لاني مكنش عندي راوتر وايرلس

وبحثت كتير لقيت مواقع كتير بتتكلم عن المشكله دي ومواقع اجنبيه كمان

ويمكن ملقتش غير واحد بس اللي مكنتش عنده المشكله دي

لكن انا حليت المشكله اني جبت راوتر وايرلس

ودخلت على النت ودخلت سوق اندرويد الرائع ولغاية اليوم بنزل برامج والعاب على الموبايل

في حاجه كمان ان اول ما جبت الجهاز مكنش الماركت ظاهر عندي

لكن في واحد جزاه الله خير قاللي ان اعمل اعاده لضبط المصنع للجهاز عشان يظهر وفعلاً ظهر عندي

الموبايل مش بيدعم الفلاش للمتصفح وبيدعم HTML بس انا مش شايفه اي مشكله بسبب الموضوع ده

تصفح النت عادي جداً معاه


في مشكله واجهتني وهى القائمه

القائمه بيكون فيها البرامج والالعاب والاستديو وحاجات كتيره وكان نفسي انظمهم في فولدرات

لكن المشكله اتحلت اني نزلت برنامج

App organizer free

ده نظم كل حاجه في فولدرات بس طبعا لازم ادخل على البرنامج الاول

بس والله كده احسن ومريحني اوي


بالنسبه للصوت والنغمات

بيكون حسب النغمه يعني لو النغمه صوتها عالي هتلاقي الصوت عالي اوي

يمكن بس نغمة الرسائل الصوت منخفض حتى بعد ما حطيت نغمات عاليه ومش عارفه ليه



بالنسبه للبطاريه

 كويسه جداً ومش بتفضى بسرعه وبصراحه بتفضل عندي كتير اوي من غير شحن بالرغم اني بشتغل على الجهاز


وعلى فكره البطاريه انا جربتها ومشحنتهاش لمده يومين واكثر

وكان استخدامي للموبايل استقبال واجراء مكالمات

يعني البطاريه كويسه معايا


بالنسبه للتاتش سكرين

التاتش فيه رائع وسريع جداً

يمكن بيكون بطئ في حاله واحده لما بكون لابسه جوانتي وده يمكن عشان الشاشه

capacitive


الموبايل ملوش ثيمات وده كان شئ مزعلني لكن لما نزلت خلفيات الشاشه المتحركه لقيت انها احسن من الثيميز

الموبايل ممكن يتشحن من اللاب توب وده شئ جميل اوي ومريح

من الاخر بصراحه الموبايل رائع بجد وانا اول مره استخدم موبايل من سامسونج واشتغل على نظام الاندرويد وبصراحه عجبني اوي الموبايل وبرامجه وكل حاجه فيه
ونظام اندرويد نظام جميل وسهل جدا وممتع جداً في تصميم برامجه

ده كل حاجه اقدر اقولها عنه ولو في حاجه تانيه هبقى اقولها

لمزيد من المعلومات حول هذا المنتج نرجوا زيارة الرابط التالي:

http://mob4me.com/mobinfo.php?id=570

بواسطة: Mob4me

هذا المقال مرتبط بمنتج

Samsung Galaxy Fit S5670

تعرف علي موصفات Samsung Galaxy Fit S5670

شاهد المزيد