هذا الموضوع مرتبط بـ Honor GR5

تقيمي للهاتف GR5

GentleMan33

2016-11-26 (01:45:55AM)

أولآ بس وقبل أي شيئ أحب أوضحلكم إني كان معايا هواوي Mate 8 أشتريته أول يوم نزل به الأسواق المصرية أيام ماكان تمنه 4250 النسخة ال 32 جيجا وفضل معايا ال Mate 8 لغاية يوم 15-11-2016 موبايل رائع طبعآ بكل ماتحمل الكلمة من معني ويعتبر هو أقوي موبايل في الأسواق المصرية حاليآ بعته وأشتريت السامسونج S7 edge بصراحة لم أقتنع به وبعته بعدها بأربع أيام
الكلام اللي بقوله ده مهم جدآ في تقييمي لموبايل هواوي GR5 عشان أنا هتكلم من خلال تجربتي مع الهاتفين الــ Mate 8 والــ GR5
بشكل عام ومن وجهة نظري الشخصية المتواضعة يعتبر الــ GR5 موبايل فوق الممتاز بالنسبة للفئة السعرية الخاصة بيه تقدر تقول إنه نسخة مصغره شكلآ ومضمونآ من الهواوي الــ Mate 8 وأنا بتكلم من خلال تجربتي العملية للجهازين
أول مابتفتح الموبايل الــ GR5 بيوصلك تحديث المارشميلو مباشرة هوائي النسخة 6.0.1 ومساحة التحديث بالضبط 1.28 غيغا بايت
ووجهة EMUi هتتحدث بعد ماتنزل التحديث من 3.1 إلي 4.0 نفس واجهة الــ Mate 8 بالضبط يعني مش هتحتاج تروح الضمان عشان تحدثه هتحدث الموبايل لأندرويد مارشميلو وأنت قاعد في بيتك ملك بس طبعآ لازم أول ماتفتح كرتونة الجهاز تضع الموبايل علي الشحن وتفوله وتضع كارت ذاكرة لايقل عن 4 غيغا بايت ويستحسن تحط كارت 8 غيغا أو أكتر قبل ما تنزل التحديث ضروري جدآ
نتكلم بقا عن الجهاز وأدائه بعد أستخدامي له لمدة أسبوع كامل
الجهاز تصميمه بالكامل من المعدن ومن خامات جيدة جدآ تقترب بشكل كبير من خامات تصنيع Mate 8 شاشه IPS LCD رائعة وألوانها واضحة وزاهية مش هتحس بأي معاناه في الرؤية وحجمها 5.5 بوصة مناسبة جدآ الجهاز كعادة هواوي مابيسخنش أو بيهنج زي موبايلات السامسونج وبصراحة دي النقطة اللي خلتني أحب موبايلات هواوي جدآ وده تقريبآ خامس موديل أمسكه بشكل متتالي من هواوي البطارية أدائها جيد جدآ 3000 مللي أمبير بس للأسف الجهاز بياخد وقت طويل في الشحن لأنه لايدعم الشحن السريع يعني من 0 إلي 100% هياخد معاك تقريبآ 3 ساعات
نفس أوبشن ال Mate 8 بالضبط أنا عن نفسي ما حستش بأي أختلاف مابينهم يمكن لإني مش بحب ألعب ألعاب كل أستخدامي للموبايل مكالمات وتصفح فقط لاغير
صوت سماعة المكالمات نقي جدآ وعالي وواضح واللي بيسمعك هيسمعك بكل وضوح وصوت الجرس عالي جدآ ومفيش أي تشويش كما يدعي البعض الكاميرا أدائها فوق المتوسط تقدر تقول مقبوله جدآ بالنسبة للفئة السعرية والموبايل بيدعم الــ 4G للشرحتين
اللي بيميز هذا الهاتف عن ال Mate 8 إن كارت الذاكرة له مكان مستقل بذاته يعني مش هتضطر تستغني عن خط من الخطين عشان تضيف كارت ذاكرة
وأخيرآ مفيش لاج نهائي بالأخص بعد تحديث المارشميلو
السؤال بقا اللي بيطرح نفسه هل الموبايل يستاهل إنك تشتريه
الجواب الموبايل يعتبر أقوي منافس فى هذه الفئة السعرية من تصميم معدني وبطارية وشاشة واضحة ونسخة أندرويد مارشميلو
يارب أكون قدرت أفيدكم يارب وسامحوني علي الأطالة بس حبيت أوضح علي قدر المستطاع جوانب هامة عن هذا الموبايل للمقدمين علي شرائه
وتفضلوا بقبول فائق الأحترام