تقييم الاسطوره Ascend Mate 7

محتويات العليه : الهاتف + الكابل يو اس بي 2.0 + رأس الشاحن + سماعات هواوي الكلاسيكيه + علبه تحتوي ع دبوس الشريحه والميموري والكتالوج

تم شراء الهاتف من محلات الهدايه بشارع مراد الجيزه نسخه 16 جيجا لون اسود .. بسعر 3675


لشكل : التليفون اللون الاسود منه شيك جدا جدا وزارير الصوت والباور معدن بس صغير شويه بالنسبه لاني كنت م مستخدمي سامسونج

( 9.5/10 )


الخامات : التليفون مصنوع كله من المعدن والضهر في النسخه اللون الاسود مش سوده غامقه لا فاتحه وده مديله شياكه ف ايدك ( 9/10 )


الشاشة : الشاشه زي ماقالت الشركه فعلا تقديرها بالنسبه للهيكل بتاع الجهاز 83% وحجمها كبير اوي اوي والوانها تحفه والتاتش سلس جدا والسطوع المانوال عالي لدرجة انه تعبلي عنيا م شدته :D ( 10/10 )


الاداء : الجهاز سريع جدا وسلس ومفهوش اي مشاكل ولا اي تهنيج لدرجة اني اضطريت الضغط عليه بفتح كذا برنامج مع بعض وهو الحمد لله كان قدها وعملتله اختبار لل ANTUTN سجل 43688 الف
(9/10 )


الرامات : الجهاز برامات 2 جيجا طبعا الرامات دي مع البروسسور القوي بتاعه بيخليك تعيش تجربه عالميه ع الجهاز
( 10/10 )


البصمه : اللي خلاني ارشح الجهاز ده اني اشتريه وانحاز ليه عن الاس 5 والزد2 .. البصمه .. انسا ان أي حد يدخل ع تلفونك جربت بعد ماعملت بصمتي قولت انهم بيضحكوا علينا .. لا انسا الموضوع بجد .. وكمان تقدر تقفل بيها تطبيقات ف التلفون وانتا اللي تختارها .. وتقفل بيها حسابك ع برنامج هواوي السحابي وتسجل لحد 5 بصمات .. وكمان مش تسحب صباحك وتعمله بشكل معين .. لا انتا مجرد مابتلمس البصمه بصباعك بيفتح ع طول
( 10/10 )



الاصوات : 1- صوت سماعة التحدث : الصوت نقي جداا وفيه اتنين مايك منهم واحد مانع للازعاج
( اديها 10/10 )
2- صوت السماعات الخارجية : الصوت عالي اوي ونقي وكانك قاعد ف سينما بالظبط مكان السماعه يضايقك شويه لو ماسك التلفون بايدك الاتنين وبتتفرج ع فيديو او فيلم لكن ف العموم الصوت عجبني اوي ( 9.5/10 )

3- صوت سماعات الاذن : انا مش هقدر اقيم السماعات دي لاني مبحبش النوعيه بتاعت السماعات المسطحه او الكلاسيك


الكاميرا : اوبشن الكاميرا كتير اوي لدرجة اني مقدرتش اجربه كله وفيه حاجات بتغنيك عن برامج التعديل ع الصور والوانها تحفه بجد وهرفقلكم صوره متاخده بيها م غير تعديا ( 9.5/10)



البطارية : البطاريه 4100 ملي امبير ودي م اكبر البطاريات الموجوده ف الهواتف المحمول
انا استخدمت التلفون بعد شحنه 100% قعد معايا ع الشحن 3 ساعات ودي كانت اول شحنه ليه بعد ما فضي الشحن
استخدمته 22 ساعه واي فاي ومكالمات وجيمز اتبقى 29% (10/10)



الذاكرة الداخلية : الهاتف مزود باجمالى ذاكرة 16 جيجا , والصافى 11 جيجا ودي كافيه جدا لانك تدلع بيها :D
( 9/10 )



انا كنت م مستخدمي سامسونج .. وكنت هحدث للاس 5 .. شوفت الزد2 .. وف الاخر ارتاحت جدا للهواوي ..

الناس اللي خايفه م الشركه دي احب اقولكوا انا كنت شغال ف مجال التلفونات وكان عندي محل ف شبرا
الشركه دي معاملتهم مع التجار محترمه جدا جدا وبيعرفوا يختاروا الوكلاء بتوعهم بعنايه .. بعد ما سبت المجال
طبعا ليا صداقات بتجار وبعد سؤالهم عن الجو العام بتاع السوق والشركات المحترمه لقيت ان هواوي اكتر شركه مبيجيش منها شكاوي م تلفوناتها ومنزله تلفونات مميزه جدا والسعر مقابل اداء

كده اكون خلصت تقييمي للتليفون .. أي استفسار انا ف الخدمه