تقييم الموبايل بعد اكثر 6 شهور

السلام عليكم و رحمة الله
مميزات و عيوب هذا الموبايل العجيب الغريب صاحب افضل المميزات و اغبي العيوب في نفس الوقت:
سبحان الله

اولا المميزات
السرعة الملحوظة عن باقي الاجهزة و اللي بتحسس الواحد و كأنه شغال بنظام ال اي او س -- و ليس اندرويد -- مفيش حاجة اسمها تهنيج -- انسي.
مفيش اي تهنيج بخصوص تشغيل الخطين بالمرة و فعلا من افضل ان لم يكن افضل موبايل بخطين في السوق المصري منذ ظهور هذه الاصدارات.
الكاميرا اراها جيدة بشكل عام و خاصة تصوير الفيديو -- روعة -- بجد فول اتش دي -- و كمان ميزة التصوير البطئ دي حاجة حلوة اوي -- لهواة التصوير.
الكاميرا الامامية -- ملهاش حل -- و الصورة واضحة فيها.
الصوت نقي و طبعا من افضل الموبايلات في الصوت بالفعل.
الشاشة جيدة و الوانها اقرب للواقع.
صوت سماعة الاذن رووعة وبتسمع من يتكلم معك بكل وضوح و عاليية جدا حتي بتتضطر توطي الصوت احيانا.
تاتش الموبايل جمييل جدا و سريع جدا و كمان واجهة البرنامج بسيطة ايضا و جميلة.
و طبعا هناك مميزات اخري.

العيوب --
قمة التخلف العقلي و البشري و الهندي و قول للصبح -- ازاي الموبايل نازل بدون فايل ماندجر كامل لنقل الملفات الي كارت الذاكرة. لان اندرويد كيت كات لا يقوم بالنقل علي ذاكرة الميموري كارد
احتمال الموضوع ده يتحل جزئيا مع اندرويد المصاصة الجديد -- بس قد لا يكون الحل كلي.
الموبايل يتيح لك امكانية نقل البرامج "بعضها" و كذلك الالعاب " بعضها" -- الي كارت الذاكرة بس المفاجأة انه بينقل بعض الملفات للبرامج الي كارت الذاكرة و ليس كل الملفات -- يعني و لا كأنك عملت اي حاجة.
بمنتهي الصراحة -- احذر اي شخص انه يشتري اي موبايل في هذه الفئة السعرية و هذه الامكانيات بمساحة ذاكرة داخلية اقل من 16 جيجا --- بصراحة -- شئ ممل جدا
عند استقبال مكالمة -- اذا كان السينسور متغطي - او عليه جراب فليب - -- السماعة السفلية فقط هي اللي بترن -- و ده بيخلي صوت الرنة واااااطي جدا و قد يكون غير مسموع --- و الله انا دوخت علي ما لاقيت رنة اقدر اسمعها بسبب الحركة المتخلفة عقليا دي -- و للعلم برده الرنة واطية و للعلم ايضا اتصلت ب اتش تي سي الشركة -- و قالوا لي ان ده مقصود عشان حماية للاذن -- سبحان الله في التفكير..
شاشة الموبايل -- بتتشااااف بالعاااافية في الشمس --- بس مش هاقول غير كده -- و محدش يقوللي عالي الاضائة او الغي مش عارف ايه او اعمل ايه -- بس كده.
تصوير الكاميرا للفيديو رائع كما قلنا -- اما بالنسبة للصور -- فيه مشكلتين:
الاولي انك لازم الموبايل ما يتهزش منك خالص وانت بتصور لان احيانا ده بيطلع الصور زي الزفت -- و لا كأنها 1 ميجا بيكسل --مهزوزة و متخلفة --
ثانيا-- الاوتو فوكاس -- غبي شويتين -- احيانا الصورة بتتلقط و بيكون الاوتو فوكس مش جايبها كويس.
نقطة مهمة جدا بالنسبة للكاميرا بشكل عام في التصوير الليلي -- كاميرا الموبايل بارزة و ليست محفورة للداخل -- و ده بيخلي فلاش الكامير يعكس الضوء علي الكاميرا اثناء التصوير الليلي و بتتطلع الصوة سيئة جدا -- بس ده مش بيحصل الي وانت حاطط الموبايل في جراب -- يعني لو عايز تصور بالليل كويس -- شيل الجراب يا برنس...
الموبايل بيسخن جامد -- مع النت وخاصة ايضا مع الالعاب ال اتش دي.
من الجاجات المتخلفة عقليا ايضا ان شركة اتش تي سي -- حاطة علي الموبايل مجموعة من البرامج واكلة المساحة الداخلية القليلة في الاساس و كتير منها مش مطلوب -- و كمان مينفعش اني اشيلها -- و كمان مينفعش اني انقلها الي الميموري كارد --
التعليق الوحيد علي هذه الشركة هو.... "كيف تستخدم الذكاء لتكون غبيا"

قبل الاخر --- موضوع ان الموبايل الناس بتقول ان سعره نزل -- ده شئ عادي جدا -- كل الموبايلات كده -- دي الناس مستنية الايفون ينزل سعره عشان يشتروه -- و كمان ده يعتبر اكثر موبايل حافظ علي سعره الفترة اللي فاتت.

اخيرا
كل كلمة قلتها هي بموضوعية و نقد لهذا المنتج --
واذا سألني اي احد -- هل اشتري هذا الموبايل ام لا -- و هذه وجهة نظري الخااااااااصة -- اقول له -- لا -- لانك هاتتشل بجد --
بالتوفيق للجميع
السلام عليكم و رحمة الله