انا اشتريت التليفون من موبايل شوب. 2499 جنيه
العلبه فيها جراب ظهر بلاستيك قوي و شفاف و معاه شاشة حمايه و شاحن و كابل USB و السماعات
الجهاز شكله شيك جدا طبق الاصل الآيفون بطريقه ملفته. جسم معدني كامل ما عدا حرف التليفون من فوق معمول بلاستيك. الجهاز سهل جدا في مسكه في اليد و خفيف جدا لدرجة انه ممكن يقع من ايدك. الشاشه ملزوق عليها حمايه بس مطبوع عليها رسم طريقة تركيب الشريحة. ممكن الرسمه تتمسح بمزيل و تحتفظ بالشاشة الحماية و تخلي الشاشة الحماية اللي في العلبة تستعمل بعدين. انا عملت كده عشان التليفون ملهوش اكسسورات
الجهاز أداءه كويس جدا مقارنة انه رباعي النواه. اضاءة الشاشة و دقة وضوحها ممتازة حتى في الشمس. و ده كان الشئ الاساسي في اني اخدت قرار اختيار الموبايل ده. واضح جدا في الشمس.
بينزله تحديث مرتين. معرفش كل تحديث كان وظيفته ايه. اول ما فتحت العلبه وصلت الجهاز في الشاحن و عملتله تحديث.
انا مجربتش احط فيه غير شريحه واحده. نقاء الصوت رائع. صوت السماعة الخارجيه ممتاز. و كمان اللي بيسمعني على الناحية التانيه بيسمع بوضوح و نقاء حتى لو حواليا ضوضاء.
انا بشحن التليفون مره كل يوم و نص تقريبا و انا استخدامي متوسط. و فيه خاصية الاداء الاقتصادي للبطاريه جربته كانت البطاريه 10% و شغلت الخاصيه قعد معايا ساعتين منهم 30 دقيقة مكالمات
الكاميرا الاماميه و الخلفيه كويسين بس انا بحس ان الصورة كما لو كانت متلونه بالوان فلوماستر. يمكن تكون دي طبيعة كاميرات الموبايلات بس انا معرفش قوي فيها.
ضوء الفلاش قوي جداً
بالنسبة للشبكه ثابت و مستقر على مدار اليوم ما عدا نفق المترو بيلقط GSM بس
الاندرويد بتاعه اصدار كيت كات بس واجهة الاستخدام ازعجتني بسبب ان سطح المكتب هو المكان بتاع البرامج مش زي اللينوفو الـ A3000 . بس مع الاستخدام و التنظيم اتعودت عليه.
بيسجل مكالمات و معاه برنامج حمايه للخصوصية ليه وظايف كتير من ضمنها بلوك للمكالمات و الرسائل للارقام البلاكليست.
الجهاز فعلا يستاهل فلوسه و سعيد جدا اني اشتريته خصوصا شاشته الواضحه في الشمس.
ده اللي فاكره حاليا ممكن اجاوب على اي اسئله.