تسجيل دخول الاعضاء

قم بتسجيل الدخول من خلال حسابات التواصل الاجتماعي
الدخول بحساب الفيسبوك
او
التسجيل بالموقع
دليل اسعار الموبايلات
اكسسوارات

بدور علي ايه؟ اكتب رقم موديل الموبايل الابدور عليه

زيارة الموقع الرسمي
هذا الموضوع مرتبط بـ سامسونج Galaxy E7
للرجوع الي صفحة سامسونج Galaxy E7 الرئيسية اضغط هنا

تقييم مبدئى ل E7

waleedsunny
waleedsunny
2015-02-09 (07:57:00PM)
السلام عليكم
ده تقييم مبدىء لسامسونج E7 عشان الاعضاء المستعجلين وعايزيين يخدوا فكرة مبدئيه عن الجهاز ولو جد جديد هابلغكوا ان شاء الله
اولا الجهاز متبرشم بالضمان من عند دريم 2000 ب 2685ج لون ابيض بضمان MTI نسخة 3 جى فقط
بيركبله سكرينه زجاج بتاعت النوت2 بدون ادنى تعديل لحد ماينزله اسكرينه عشان الشاشة نحافظ عليها عشان هى مش ضد الخدش
بالنسبة للجراب بنركب جراب مؤقت للنوت 3 نيو سيليكون مع بعض التعديلات طبعا
البطاريه مابتتشلش والجهاز ليه فتحتان من الجنب
الفتحه الاولى بيتحط فيها الخط الاول شريحه نانو زى اللى بتركب فى الايفون
الفتحه التانيه بيتحط فيها الخط التانى شريحه نانو برده او كارت ميمورى
اظن الموضوع ده واضح ومش محتاج استفسار تانى
بيجى مع العلبه دبوس لفتح مكان الخطوط
المساحه 16 جيجا الصافى حوالى 11 جيجا
الجهاز بيقرا الرامات 1.85 جيجا والصافى دايما حوالى 1 جيجا عند عدم استخدام الموبايل
الشاشة 5.5 بوصه سوبر اموليد وطبعا معروف عن الشاشات دى ان الوانها فاقعه قوى لكن سامسونج عدلت درجات الالوان بحيث ان الالوان اصبحت صافيه ونقيه جداااا
الجهاز خفيف الوزن جداااا
البرسسور رباعى 1.2 A53
الجهاز ما شاء الله سريع جداااااا مافيش حاجه اسمها تهنيج او تعليق نهائى
سرعة ال 3جى بدون مبالغه طلقه زى ما اكون شغال واى فاى
وطبعا سرعة الواى فاى مش محتاجه كلام
وفى واى فاى دايركت – واى فاى هوت سبوت
والجهاز فى اوبشن زى ال NFC بالظبط بخصوص نقل الداتا اللى انت تحددها فى الضبط الاول للجهاز القريب منك وفى نفس الاوبشن
الجهاز بيدعم الراديو والبطاريه بتاعته ماشاء الله تحفه وقويه جدا
مكالمات فقط وقافل ال 3 جى ممكن تقعد معاك من 4-5 ايام
بتستخدم نت متقطع على مدار اليوم من 7 – 9 ساعات 3جى وبتقفل النت عند عدم الاستخدام لكن سايب ال 3 جى مفتوح عادى بيكمل يوم زى الفل
الكاميرا بتاعته السيلفى جميله جداااا 5 ميجا
الكاميرا الخلفيه 13 ميجا زى مايكون معاك كاميرا النوت3 العادى وممكن تستخدم الكاميرا الخلفيه سيلفى بانك لما تفعل الوضع ده كل اللى بتعمله انك تمسك الموبايل وتوجه الكاميرا الخلفيه ليك وهى لما تلقط وجه انسان اتوماتيك بتلقط الصوره من غير انت ما تعمل حاجه
الجهاز فيه اوبشن الترا سيفينج باور اللى عن طريقه بتقفل كل البرامج اللى الاندرويد بيفضل فتحها على الفاضى لتخفيض الطاقه جداااااااا
الموبايل فى كل الاوبشن بتاع سامسونج العادى القديم وزودوا كمان اوبشن جديد
فايبريشن عند فتح المكالمه وغلقها – عداد المكالمات – الاتصال عن طريق سحب اسم المتصل لليسار – اوبشن تعليه الصوت للضعف او التحكم فى جودة ونوعيه الصوت اثناء المكالمه – زياده حساسية اللمس عشان لو هاتستخدم جوانتى – فى تنبيه اشعارات بالصوت زى الجراند 2 وتنبيه بالاهتزاز عند مسك الموبايل عشان يعرفك بالمكالمات او الرسائل الفائته – زراير التحكم بتنور وممكن تتحكم فى مدة الاضاءه – قائمة الضبط ممكن تكون بالطول او العرض – فى قائمة الضبط ممكن تخلى القوائم اللى بتحتاجها عالطول تبقى فى الاول لسرعة الضبط – الجهاز فيه عدد 5 ثيمات لتغير شكل وايقونات الجهاز زى موبايل هواوى وال جى مثلا – الكيبورد كامل وفى الارقام فى الصف الاول دائما – فى خاصيه فتح شاشتان فى الشاشة الواحده – اوبشن غلق وفتح الشاشة عن طريق جراب الفيب سنسور لما ينزل ان شاء الله – امكانية تغيير خلفية الرسائل – وجود برنامج جديد اسمه استديو للصور والفيديوهات عشان ماتحملش برامج من بره زى برامج الفوتو شوب – خاصية حجب المكالمات او ال Black list - خاصية الفيديو كول عن طريق الشريحه
فى اوبشن جديد ومهم جدا اسمه Private mode وده عن طريقه ممكن تخلى الدخول للاستوديو والفيديو والموسيقى والتسجيلات الصوتيه بتاعتك والفايل مانجر كمان يكون بباسورد عشان السريه التامه وعدم التطفل
صوت سماعة المكالمات عالى وواضح ومجسم
صوت سماعة النغمات – ماتعتمدش على النغمات الموجوده على الجهاز – لما تحط نغمات من عندك وتحطها جوه الفولدر الخاص بنغمات الجهاز Ringtones هاتلاقى الصوت عالى وواضح جداااا
اثناء الاتصال بيجبلك اخر مكالمه تمت للمتصل اللى انت معاه
اقصى حرارة وصلها الجهاز اثناء الدخول على النت 3 جى وفى جو حر بالنهار كان 35
سامسونج غيرت لون القوائم بالكامل للون الابيض زى هواوى وال جى والكاتيل عشان تكون الرؤية فى الشمس جيده
العيوب
مافيش سنسور بوصله لتحديد الاتجاهات او القبله
مافيش سنسور اضاءة اتوماتيك حسب اضاءة المكان اللى انت فيه لكن حاطين مكانه اوبشن انك بتزود اضاءة الشاشة جدا لمدة 15 دقيقه عشان لو انت فى مكان اضاءة عالى جدا تقدر تشتغل على الجهاز عادى
يعنى التحكم فى اضاءة الشاشة بيكون مانيوال
الجهاز بمنتهى الامانه جيد جدا بل وممتاز على سعره التحفه ده
انا ماجربتش الالعاب ومش هاقدر اوعدكوا بتجربتها عشان ماليش فيها
اعذرونى لو فى اى حاجه نسيتها وكمان عشان الجهاز بقاله معايا 3 ايام
لو فى اى استفسار تحت امركوا بس ياريت نقرا اللى انا كتبه بالتفصيل لعدم تكرار الاسئله والاجوبه
ولو فى حاجه جديده اكتشفتها تانى او اى ملاحظه هاكتبها عالطول ان شاء الله
وبالتوفيق للجميع
waleedsunny
عضو مميز
waleedsunny
2015-02-09 (08:22:59PM)
ملحوظه نسيت اكتبها
كان دايما مشهور عن سامسونج ان قائمة الاتصال بتفتح بعد كذا ثانيه وساعات بتطول قوى على ماتفتح الاسماء وكنا بنحمل برنامج تانى عشان يبقى سريع ومانستعملش القايمة اللى في الجهاز
الكلام ده خلاص انتهى وماعدش موجود في الفئة دى خالص
eng3000
eng3000
2015-02-09 (10:43:47PM)
شكرا للاهتمام والتقييم المفصل بس في اسفسار هو النسخه اللي نزلت مصر 16 جيجا فقط واللون ابيض فقط
waleedsunny
عضو مميز
waleedsunny
2015-02-09 (11:08:44PM)
الشكر لله
على حد علمى ان النسخه الموجوده في مصر 16 جيجا ومافيش نسخه اعلى من كده
اضغط هنا لزيارة الرابط
وبخصوص الوان تانيه ماتنساش ان الجهاز لسه نازل مصر من حوالى 10 ايام ومافيش اى اكسسوار ليه اصلا
فا اصبر شويه في حدود شهر وان شاء الله ممكن يتوافر الوان تانيه والاكسسوارات الخاصه بيه
ELGENY
ELGENY
2015-02-10 (10:01:52AM)
لو سمحت هو الجهاز في لمبة اشعارات ولا لا
تاني حاجه هو الجهازده افضل ولا desirre820
omarsaad
omarsaad
2015-02-10 (10:44:02AM)
كانت اكثر حاجة بتضايق الواحد في سامسونج هي موضوع تاخر فتح قائمة الاسماء بالفعل -- وده كويس انهم عالجوا المشكلة دي -- و الجهاز ده كده حلو جدا جدا
بس بصراحة -- غباء ان جهاز بالمواصفات دي و ينزل بدون لمبة اشعارات و بوصلة و تحكم اوتوماتيكي بالاضائة.
jo2010
jo2010
2015-02-10 (12:54:35PM)
الاستاذ الفاضل / وليد
اشكرك على الشرح التفصيلى للموبايل وانك طمنتنى ان الاسماء بتفتح بسرعة
سؤال بسيط انت قولت
يوجد فتحتين فى الجوانب واحدة لخط والثانية لخط او كارت ميمورى معنى كدة انة مينفعش اركب خطين وكارت ميمورى ولا انا فهمت غلط ولك خالص الشكر
waleedsunny
عضو مميز
waleedsunny
2015-02-10 (01:25:37PM)
الجهاز لايوجد به لمبه للاشعارات
لكن يوجد به تنبيه بالاهتزاز او الصفاره تتحكم في مدتها زى ما انت عايز يعنى ممكن تظبط الاوبشن ده انه يدى صفاره زى بتاعت الرسائل كل 3 او 5 او 10 دقائق لحد ما تشوف الرساله او المكالمه الفائته

الجهاز ماينفعش يركب ليه خطين + كارت ميمورى
يركب خط وكارت ميمورى او خطين بدون كارت ميمورى
والجهاز سعره رخيص عشان مافيهوش سنسور بوصله او سنسور اضاءة او لمبة اشعارات

لو دخلت على اراء المستخدمين فى الخارج هاتلاقى انهم بيقارنوا بين الجهاز ده وجهاز HTC 820 والكل اجمع على ان ال E7 افضل وارخص وبيشتكوا جدا من بطاريه ال 820ج
انهارده ده ب 2700ج وال 820 ب 3300ج يعنى ارخص حوالى 600ج
omarsaad
omarsaad
2015-02-10 (03:27:09PM)
ميزة ال 820 تنحصر في الاتي
البروسيسور اعلي -- الكاميرا الاماية اعلي و تصويرها ممتاز -- سريع بجد -بوصلةو لمبة ال اي دي.
و لكن البطارية سيئة فعلا -- لا يوجد فيديو كول -- شاشة زي الزفت في ضوء الشمس حجم كبير علي الفاضي يعني هو بالفعل يكاد يكون نفس حجم ال mATE 7 اللي هوه 6 بوصة و انا بالفعل وضعتهم علي بعض -- صوت نقي جدا بس خرج الصوت وااااطي جدا عند استقبال رنة -- لان سماعة واحدة غالبا تعمل و ليس الاثنين في تلك الحالة طالما انت مغطي السنسور
اما هذا الموبايل -- الكاميرا الامامية افضل بكتير -- الشاشة افضل بكتير -- بطارية افضل -- نسبة حجم الشاشة لحجم الموبايل رائعة --
فيه بس ملحوظة حبيت اضيفها بخصوص تحديثات و دعم اتش تي سي -- دائما فيها مشاكل و فين و فين لما بيفتكروا يعدلو تحديث فيه مشاكل.
ahmedkmk
ahmedkmk
2015-02-10 (07:47:58PM)
الاستاذ وليد مشكور جدا على الشرح والتقييم - بس استفسار اخير هل الجهاز بيدعم تركيب وقراءه فلاش ميمورى - وكمان هل مستوى الصوت زى البرايم ولا الجراند 2 - ومشكور جدا جدا
galaxy2468
galaxy2468
2015-02-10 (08:01:18PM)
Huawei Ascend G7 ولا Galaxy E7

انهي الافضل
waleedsunny
عضو مميز
waleedsunny
2015-02-10 (09:18:44PM)
الشكر لله
للاسف الجهاز مش بيقرا من فلاشه كمبيوتر
بخصوص ال G7 انا ماجربتوش فعليا
لكن مع المدام G750 وانا كان معايا ال Mate 7 ابو خط واحد اللى هو الرامات 2 جيجا
عيب هواوى الوحيد من وجهة نظرى هو نظام المزامنه مع البرامج زى الفيس والواتس والفايبر والبرامج الاجتماعيه عامة بطىء شويه ومش بنفس سرعة سامسونج اللى هاتلاقوا الايقونه بتاعتوا على شكل سهمين بيدورو حوالين بعض
waleedsunny
عضو مميز
waleedsunny
2015-02-10 (09:28:15PM)
هاقول تانى
مع انى رديت على الموضوع ده باستفاضه
صوت النغمات اللى على الجهاز متوسطه زيها زى كل موبايلات سامسونج باستثناء بعض الموديلات زى النوت 2 والميجا 6.3 والنوت 3 العادى
يعنى لازم نحط نغمات من عندنا
لو حطينا نغمة هايبقى مستوى العلو الافضل بالترتيب الاتى
الموديل ده E7
جراند نيو بلس
جراند 2
كور بريم
جراند بريم
اظن مافيش توضيح اكتر من كده
yasmin7
yasmin7
2015-02-12 (08:26:42AM)
ياريت يا استاذ وليد تضييف تقييم ل هواوي ميت 7 النسخه 16 جيجا اللي كانت مع حضرتك في صفحه الهواوي Mate 7

احنا بنثق في رائيك دايما

و حضرتك تديله درجه كام من عشره
وهل يستحق ثمنه ؟
waleedsunny
عضو مميز
waleedsunny
2015-02-12 (10:06:56AM)
شكرا على الثقه الغاليه
ابو خط واحد ال 16 جيجا ال 2 جيجا رام 8 من 10
ابو خطين ال 32 جيجا ال 3 جيجا رام 9 من 10
ahmedezz123
ahmedezz123
2015-02-13 (05:33:27PM)
انا عايز اشتري موبايل جديد والموبايل ده عجيبني اوي E7 اتوكل علي الله واشتريه
walidphantom
walidphantom
2015-02-21 (11:31:35PM)
محتار جدا جدا بين e7 و sony z لانى هاجيبه هديه وكمان مش عارف هو صناعه ايه
EngMk
EngMk
2015-03-02 (12:50:12PM)
أ/وليد
انا شوفت الكرتونة بتاعته فى اكتر من مكان فى السعودية ومكتوب عليها انه بيدعم جيل رابع 4G-LTE.

هل الموبيل نسخة الشريحتين جيل ثالث ولا جيل رابع ,لانى لاحظت ان نوع المعالج كوالكوم سناب دراجون 410 بيدعم الجيل الرابع , ولكن على موقع جى اس ام ارينا و الموقع هنا مكتوب ان الموبيل بيدعم جيل ثالث فقط ؟!!

ثانيا : لو بيدعم جيل رابع , هل الشريحتين هيدعمو الجيل الرابع ولا واحدة فقط والثانية مكالمات زى الهواوى وخلافه ؟؟

شكرا للافادة
ahmedadham
ahmedadham
2015-03-09 (01:31:55AM)
الموبايل نزل فى السعوديه بمواصفات مختلفه مثلا انه بيدعم الجيل الرابع والبوسيسور بتاعه اعلي كتير من اللي موجود في مصر
HellMaker
HellMaker
2015-03-09 (10:18:10PM)
طب انا عايز اجيب حاجة htc انهي احسن في البطارية طبعا والسرعة و الكاميرا و كدة
walidphantom
walidphantom
2015-03-20 (11:52:20PM)
اوصل لـPrivate mode ازاى لانى دورت عليها فى كل الجهاز ومعرفتش
waleedsunny
عضو مميز
waleedsunny
2015-03-21 (11:38:47AM)
أستاذ walidphantom
اسحب با أصبعين ستارة الاشعارات من فوق - مش بأصبح واحد
هاتلاقى الايقونه بتاعت الأوبشن اللى حضرتك طلبه
دوس عليها وامشى مع الخطوات
memo2omar
memo2omar
2015-03-30 (10:24:56PM)
نشكرك سيدى الفاضل على هذا التقييم ولى سؤال لو تكرمت هل يسمح هذا الهاتف بالتقاط صور فوتوغرافية أثناء تصوير الفيديو ؟
amrMetwally
amrMetwally
2015-04-12 (10:05:50PM)
هو احسن ولا الـ Huawei Ascned G7 ؟؟
الهواوى فيه سنسور بوصله لتحديد الاتجاهات او القبله
وفيه سنسور اضاءة اتوماتيك حسب اضاءة المكان اللى انت فيه
waleedsunny
عضو مميز
waleedsunny
2015-04-12 (10:50:40PM)
ال G7 عيبه الوحيد انه بخط واحد غير ان الدعم بتاع هواوى سىء وبطىء جدا ويكاد يكون منعدم بخصوص اى تحديثات للجهاز غير ان الجهاز ساحب من الرامات جزء كبير من غير لزمه
بعكس سامسونج التحديثات فيها للاجهزه سريعه ومتتاليه لحل اى مشاكل بتظهر في الاجهزه الخاصه بيها
ال G7 افضل في البطاريه نسبيا
افضل في جودة الكاميرا
صوت سماعة النغمات اعلى بشكل ملحوظ
في اوبشن عالى وجديد زى ال Mate 7
موجود فيه سنسور بوصله وسنسور اضاءه اتوماتيك
جسم الجهاز من المعدن زى الايفون
astevv
astevv
2015-04-14 (03:55:02PM)
تقصد اية ساحب من رمات كتير بنسبة لهواوىG7 طب انا معيا جهاز G7 وهو ساحب عند تشغيل جهاز 900 ميجا بس وشفت E7 مع واحد صحبى حولى 750 عاوز افهم بقى وللامانة انهى احسا فى سفت و باقى الامكنيات لان شايف ان امكنيات الكاميرة اعلا فى هواوى حتى صوت فياريت توضحلى لان لو كدة ممكن ابيعو وجيب E7 بس شايف ان سامسنج بردو سامسنج متغيرت فى حاجة
astevv
astevv
2015-04-14 (03:57:43PM)
وبيكون فاضى من رام للجهاز حولى 1010 ميجا بيت يعنى جيجا و10 فى هواوى جى 7
waleedsunny
عضو مميز
waleedsunny
2015-04-14 (06:38:41PM)
أستاذ astevv
لما كان معايا ال G7 لمده يومين عشان كنت شاريه لواحد زميلى وقعد معايا يومين قبل ما اديهوله لاحظت انه ساحب كتيير من الرامات من غير ما اشغل حاجه
وكون ان اللى معاك والحمد لله مابيسحبش رامات عاليه ده شىء جميل وكويس
وانا كاتب في صفحة ال E7 حالا تقييم من وجهة نظر ناس تانيه بتأيد كلامك
انا بحاول اجيب كذا رأى بحيث الاعضاء يستفادوا حتى لو الكلام ده مخالف لرأى
وبمنتهى الامانه العيب الوحيد اللى شايفه في ال G7 هو انه بخط واحد غير كده كان يبقى ماحصلش
astevv
astevv
2015-04-15 (09:55:24AM)
شكرا لردك بس معلومة ليك وللجميع G7 هينزلو تحديث لوبى باب فى شهر 9 وهينزلو تحديث علشان اقدر اشغلو شريحة تنيا مكان الذاكرة الخارجية زى E7 مهو مشغل شرحتين :)
waleedsunny
عضو مميز
waleedsunny
2015-04-15 (06:31:52PM)
دى اخبار جميله
بس معلومة تحديث يشغل شبكة تانيه موضوع غريب شويه
لان المفروض ده اولا بيكون شىء في هارد وير الجهاز مش سوفت وير والله واعلم
الحاجه التانيه الباب الخاص بتركيب شريحه تانيه او ميمورى كارد في سامسونج E7 مجهذ لكده
فا أتأكد وشوف باب الميمورى كارد اللى عندك مجهز لكده برده ولا إيه
HeKtOR
HeKtOR
2015-05-16 (02:14:22PM)
لوسمحت هوا private mode بتشتغل منين و شكرا
HeKtOR
HeKtOR
2015-05-17 (09:38:49PM)
لو سمحتو هوا الوبايل دا هينزلو لولى بوب ولا لا
waleedsunny
عضو مميز
waleedsunny
2015-05-20 (04:29:56PM)
اسحب شريط الاشعارات بصباعين هاتلاقي كل الايقونات ظهرت وهاتلاقي الاوبشن اللي انت عايزه دوس عليه وامشى مع التعليمات
HeKtOR
HeKtOR
2015-05-23 (09:39:31AM)
طب هوا هينزلو لولى بوب امتا ؟
mido12adel
mido12adel
2015-05-23 (06:35:51PM)
هوه مفيش منه 4G
waleedsunny
عضو مميز
waleedsunny
2015-05-24 (11:19:37AM)
بص الشركه لسه ماصرحتش بموضوع اللولي بوب لكن عن قريب ان شاء الله
وموجود منه 4جي في الخليج فقط ب 1150 ريال وكان عليه عرض بس خلص ب 1050 ريال
mennahossam
mennahossam
2015-06-04 (07:22:55PM)
حضرتك كده الموبايل بقاله معاك فترة كبيرة و انا عايزة اعرف مشاكله ايه و ايه العيوب اللى لاحظتها عشان انا مترددة اجيبه و محتارة بينه و بين sony xperia c3 و هما نفس المواصفات تقريبا و نفس السعر كمان
eslamelkady
eslamelkady
2015-06-25 (06:13:42PM)
انا استخدمته وبصراحه ممتاز جدا جدا بس محتار بينه وبين سونى z1 عشان ما استخدمتش ال z1 راي حضرتك ايه بالنسبه للاحسن انى اشتريه ؟؟
amr14nader
amr14nader
2015-07-24 (02:25:16PM)
أنا كنت عاوز أعرف الفرق بينه وبين ال E5 و إيه مميزات و عيوب ال E5 لأن فى فرق فى السعر 600
EmanKimo
EmanKimo
2015-07-26 (08:33:30PM)
لو سمحت انا زراير التحكم عندي مش بتنور ودخلت عملت المده مفتوح دائما وبرضه مش بتنور ممكن اعرف اخليها تنور ازاي
تلك الخدمة مخصصة لاعضاء الموقع

التسجيل بالموقع

حتي تسطيع الاستفادة و المشاركة في الموقع يجب ان يكون لديك حساب علي موقعنا. خطوات بسيطة يمكننا من خلالها انشاء حساب علي موقعنا

انشاء حساب جديد سجل بحساب الفيس بوك