تسجيل دخول الاعضاء

قم بتسجيل الدخول من خلال حسابات التواصل الاجتماعي
الدخول بحساب الفيسبوك
او
التسجيل بالموقع
دليل اسعار الموبايلات

بدور علي ايه؟ اكتب رقم موديل الموبايل الابدور عليه

زيارة الموقع الرسمي
هذا الموضوع مرتبط بـ ال جي G3
للرجوع الي صفحة ال جي G3 الرئيسية اضغط هنا

تقرير كامل عن جهاز LG G3 (أحمد محمد)

أحمد محمد
أحمد محمد
2015-07-02 (04:48:27PM)
سلام عليكم
اشتريت الG3 من ايام و ده تقييمي للجهاز
الشاشة :
الشاشة فعلا ممتازة فوق الوصف
و اول مرة اصدق الناس اللي بتقول ان الtrue-hd-ips احسن من السوبر اموليد
انا بقالي اكتر من سنتين بستخدم سامسونج و فعلا الشاشة دي احسن من السوبر اموليد في كل حاجة عدا اللون الاسود
و بالنسبة للدقة كنت قريت في مواقع زمان ان العين متقدرش تفرق بين كثافة البيكسل الاعلي من 400 مهما زادت
بس انا حاسس بفرق عن كثافة الاس4 رغم ان الاتنين ممتازين
بس الفرق باين بصراحة و تقدر تحس بيه كويس
و حجم الشاشة ممتاز في الكتابة و كل حاجة
الشاشة 10/10 بأمانة

الذاكرة :
النسخة اللي معايا 32 جيجا
مش عارف متاح منها قد ايه لان الجهاز مش بيكتب غير اللي باقي بعد ما حطيت برامجي و ملفاتي
بس هو تقريبا كان متاح منها 26 جيجا قبل ما احط ملفاتي والله اعلم
الذاكرة اكتر من كافية لاي جهاز 32 جيجا لذلك 10/10
و الجهاز بيقبل كارت ميموري

الرام :
النسخة اللي معايا رام 3GB المتاح منها بعد الكلير بيوصل 1800 علي اللولي بوب
و طبعا ده رقم ممتاز و يعتبر اكتر من ضعف رام النوت 3
الرام 10/10

الكاميرا الخلفية :
في الاضاءة القوية و الخلفيات الفاتحة بتكون الكاميرة ممتازة
لكن عدا ذلك بتكون جيدة جدا و في الضلمة جيدة فقط
و اوضاع التصوير قليلة جدا و ده اللي فاجئني
بس ليها حل انك تستخدم برامج تصوير خارجية و دي موجودة كتير
الفلاش ثنائي قوي و اضاءته لونها مش ابيض
هو مصمم بحيث يديك اضاءة طبيعية شبه نور الشمس يعني مش نور ابيض ولا اصفر
الكاميرا 8/10 و الفلاش 10/10

الكاميرا الامامية :
جيدة جدا هي احسن من الاس4 و اقل شوية من الاس5
7/10

الواي فاي قوية عن الاس4 و قريبة من واي فاي اللاب توب
9.5/10

الراديو و البولوتوث و الusb كل دول 10/10

البطارية :
بصراحة جيدة مش ممتازة لكنها تقضي الغرض
بالاستخدام المتواصل 7 ساعات
و الاستخدام العادي يوم كامل
بس الشحن سريع في ساعة ونص فقط يشحن كامل
7.5/10

السخونة :
الجهاز بيسخن في الاستخدام التقيل
بس سخونة مقبولة .. زي اجهزة السامسونج
7.5/10

الاداء :
الاداء قوي جدا و مفيش اي مشاكل خصوصا مع الرام 3GB
بس الواجهة بتاعة الجهاز فيها لاج خفيف خالص بسبب ال2K
9/10

الصوت :
الصوت قوي ماشاء الله و نقي خصوصا في الموسيقى
9/10

الخلاصة
الجهز بدون عيوب تقريبا و مش هتلاقي فيه حاجة مضايقاك
ممكن فقط تلاقي حاجات مش بيرفكت زي البطارية و الكاميرا
انصح اي حد بالجهاز لكن نسخة ال 32 جيجا ، 3 جيجا رام
و الجراب السينسور الاصلي مخلي الجهاز اجمل
هو جاي مع الجهاز بتاعي من بره
و جاي بنفس لون الجهاز (جولد) و مش بيخلي الجهاز سميك ولا بيخفي اللون الجولد
Ma7aMe7oo
Ma7aMe7oo
2015-07-02 (10:46:35PM)
في البداية احييك علي التقرير الرائع انا اشتريت الجهاز في شهر 5 اللي فات بعد تجربة مع G2 اللي يعتبر من احسن التليفونات اللي مسكتها
اما بالنسبة لل G3 جهاز جبار تحفة في كل حاجة كاميرا,صوت,اداء ,اوبشن هايل جراب السينسور تحفة بجد
الجي ابدعت في الجهاز دا وكان نفسي بس يحطوا اوبشن انك ممكن تحولي دقة الشاشة من QHD الي FHD علشان استهلاك البطارية
ومبروك عليك الجهاز
أحمد محمد
مشرف
أحمد محمد
2015-07-03 (02:24:02AM)
الله يبارك فيك
صح كلامك و كان المفروض lg تحط بطارية اكبر
الجهاز ده بنفس بطارية الجي2 مع ان شاشته اكبر و مواصفاته اعلي
المفروض علي الاقل كانو يحطو بطارية 3500
و الصدمة بقا ان الg4 برضو بنفس بطارية الg2
بس مش LG لوحدها
كمان الz4 بنفس بطارية الz3 و الz2 و الz1
و الاس6 بطاريته اصغر من الاس5
الشركات بدأت تخرف
خسارة كانو ماشيين كويس
abdo20112
abdo20112
2015-07-07 (11:34:11AM)
انا معايا الجهاز من شهر 11 اللي فات
حاليا انا منزل روم للجهاز و بعد ما نزلت الروم معدش فيه اي لاج ف الواجهه طبعا تقريبا كل حاجه ف التليفون بقت احسن معادا الكاميرا ف الرومات المعدله بتكون اقل ف الجوده من الروم الاصلي (اقصد ال AOSP based مش Stock based )
أحمد محمد
مشرف
أحمد محمد
2015-07-08 (09:13:07PM)
بتنزل الروم ببرنامج ايه
abdo20112
abdo20112
2015-07-10 (03:25:31PM)
بعمل رووت الاول و بعد كده ببرنامج من علي البلاي ستور بنزل الريكفري المعدل
بعدين بشوف الروم اللي انا عايز و احمله من XDA
و اثيته من الريكفري
بس بما انك لسه جايب الجهاز متعملش رووت و تضيع الضمان دلوقتي
fast07
fast07
2015-07-27 (02:56:38PM)
استاذ احمد
تقريرك رائع كنت حابب اسالك كام سؤال
لو استخدامى جيمز تقيله زى نوفا او مارفل شامبيونز او اسفلت + فيس بوك اجمالى مثلا ساعتين يوميا + شات بسيط + استخدام محدود للكاميرا
يبقى نوت 3 4جى ولا جى 3 من حيث البطاريه والاداء والسخونه

ولو قررت اجيبه lgg3 اجيبه منين فى القاهره وبكام ولو تعرف برده النسخه الشريحتين فين وبكام ضمان محلى
أحمد محمد
مشرف
أحمد محمد
2015-07-28 (12:47:33AM)
الجيمز بتسحب البطارية جامد
بس لو زي ما قلت ساعتين بس يبقا تمام مش هتواجه مشكلة
و عموما الجهاز مش بيطول في الشحن

بالنسبة لموضوع السخونة فكل الاجهزة بتسخن و خصوصا في الصيف

بالنسبة للشراء هو قليل شوية في السوق
إسأل في المحلات المشهورة زي ٨٨٨ و سيليكت بس مش عارف هتلاقي خطين ولا لأ
انا جهازي خطين بس ده جايلي من كوريا مش شاريه من مصر
تلك الخدمة مخصصة لاعضاء الموقع

التسجيل بالموقع

حتي تسطيع الاستفادة و المشاركة في الموقع يجب ان يكون لديك حساب علي موقعنا. خطوات بسيطة يمكننا من خلالها انشاء حساب علي موقعنا

انشاء حساب جديد سجل بحساب الفيس بوك