تسجيل دخول الاعضاء

قم بتسجيل الدخول من خلال حسابات التواصل الاجتماعي
الدخول بحساب الفيسبوك
او
التسجيل بالموقع
دليل اسعار الموبايلات

بدور علي ايه؟ اكتب رقم موديل الموبايل الابدور عليه

زيارة الموقع الرسمي
هذا الموضوع مرتبط بـ الكاتيل POP 7
للرجوع الي صفحة الكاتيل POP 7 الرئيسية اضغط هنا

تقييم لجهاز الكاتيل POP 7 [بعد اسبوع]

bakar852911
bakar852911
2014-07-17 (12:52:16PM)
امبارح اشتريت الحمد لله الجهاز كويس جدااا
ا
** معلومه كل الفيديوهات اللى على اليوتيوب بتاعت النسخه الواى فاى مش النسخه اللى نازله مصر واى فاى ومكالمات **

الجهاز بيعمل مكالمات وبيركبله شريحه موبايل ميكرو
الجهاز 8 جيجا و 1 جيجا رام
محتويات العلبه التابلت + شاحن + كابل توصيل للكومبيوتر والشاحن + سماعات تحفه + كفر للجهاز
بس للاسف ملقتش الاسكرينه بتاعته فى المحل الجهاز جميل ولغاية دلوقتى مهنجش معايه خالص
نسخة اندرويد 4.2.2 ومحمل عليه تقريبا كل البرامج اللى حتحتاجها وبيسطب البرامج على الكارت او الذاكره الداخيله زى ما تحب
انا شايف ان عيبه الكاميرا الخلفيه ضعيفه والاماميه تكفى الغرض للمحادثات
احلى حاجه فيه انه مش ضخم ورفيع اجداا وخفيف اووى
وسعره 940 جنيه
انا جبته من محل الجندى فى شارع الهرم
وعلى فكره يا جماعه انتو ممكن تشتروه من الوكيل رزق الله سعره 950 جنيه بضمان وكل حاجه علشان الناس اللى عندها مشكله مع المحلات

بعد استخدام حوالى اسبوع
**********************
اولا اسخدامى مكالمات حوالى ساعه فى اليوم
فى البيت بفتح من الواى فاى وبره البيت من نت الشريحه تقريبا طول اليوم ماسكه فى ايدى شات ومكالمات
1 الجسم
من البلاستك . خفيف جداا. ورفيع اووى ولكن مش ضعيف بدى متماسك
2 الشاشه
------------------
كويسه جدااا مفيش بكسله ونقيه بس متقارنهاش بشاشة جلاكسى اس 5 مثلا زواية الرؤيه كويسه ولو فى حد قاعد جمبك رخم مش حيعرف يشوف انتا بتعمل ايه :)
فى الاضاءه العادية تشوف كويس جدااااا ولكن فى الشمس الزجاج الواقى على الشاشه بيعمل انعكاس جامد ومش حتعرف تشوف كويس بس عادى عندك الكفر تغطى بيه

3 السوفت وير
----------------------
اندرويد 4.2.2 معدل بواسطة الكاتيل لاضافات لمسات جماليه وضبط وتسريع وبعد استخدامى ليه فعلا الجهاز لغاية الان مهنجش معايه خالص ومعنديش معلومات حيتم تحديثه لنسخه 4.4 ولا لا
السيستم معموله روت لتنصيب البرامج سواء على الكارت او الذاكره الداخليه زى ما تحب
السيستم تقريبا عليه كل البرامج اللى ممكن تحتاجها زى الفيسبوك تويتر جوجل كروم ادوبى ريدر وفى كمان مجموعة برامج من الكاتيل منها برنامج تحفه لتوفير الطاقه

التخزين والرام والمعالج
------------------------
المساحة الاجماليه 8 جيجا متاح منها للمستخدم 5.3 جيجا وممكن تركب كارد ميمورى لغاية 32 جيجا
الرام 1 جيجا والصراحه كافيه جدااااا لكل البرامج اللى ممكن تشغلها فى نفس الوقت
المعالج ثنائى النواه 1.3 كورتيكس A7 الصراحه سريع ومش بيهنج نهائيا حتى الان

الصوت
--------------
السبيكر صوته واضح ونقى مش عالى اوووى زى الموبايلات الصينى ولا واطى زى السامسونج
السماعه مهمه جدااا لعمل المكالمات لان التابلت مفيهوش سماعه للمكالمات
لو جاتك مكالة ورديت عليها من غير السماعه حيفتح السبيكر اتوماتك والشارع كله يسمع معاك المكالمه

الشبكه
-------------
شريحه ميكرو يعنى لو معاك شريحه عادية حتحتاج تقصها بس مش بنفسك لازم واحد خبير يقصها علشان متبوظش الشريحه او تروح فرع شركة الموبايل اللى انتا تابع لها وتطلع شريحه ميكرو تقريبا بحوالى 20 جنيه
استقباله للشبكه قوى والصراحه عاجبنى الموضوع دا و 3 جى سريع على النت من الشريحه
استقباله للمكالمات الصوت واضح ونقى

الكاميرا
--------------
2 كاميرا اماميه 0.3 وخلفيه 2 ميجا لا يوجد فلاش
انا شايف ان دى نقطة ضعف التابلت دا
الصوره عادية جدااا لكن مش مبكسله بس مضلمه شوية ولو فى مكان مفيهوش اضاءه كويسه متصورش احسن
دا لينك لتصوير فيديو خارجى بالنهار اضغط هنا لزيارة الرابط
دا لينك لتصوير داخلى اضغط هنا لزيارة الرابط
ملاحظه دا مش تصويرى دا لينكات من اليوتيوب بس هى بتاعت البوب 7

البطارية
-------------------
البطارية الصراحه قويه
بطارية داخليه يعنى مش بتفك من الجهاز
من استخدامى الكتير للجهاز بشحنه مره فى اليوم
ومع وضع توفير الطاقه يقعد يوم ونص
---------------------------------------------------------------------
الخلاصه
احسن جهاز بالمواصفات دى بالسعر دا 940 جنيه فى المحلات و 950 فى الوكيل رزق الله
لكن لو ميزانيتك اكبر من المبلغ دا فى طبعا اجهزه تانيه بمواصفات اعلى
وانا تحت امركم فى اى اسئله واستفسارات
معلش طولت عليكم اتمنى اكون ادتكم فكره كويسه عن البوب 7
amrtarek
amrtarek
2014-07-19 (12:25:31AM)
يا ريت تقولى بيشغل فيديوهات HD ولا لا وشكرا على تعبك
bakar852911
bakar852911
2014-07-20 (01:47:54PM)
انا جربت فيديو 720P واشتغل تمام لكن للصراحه مجربتش 1080P حجربة وحقولك ان شاء الله
amrtarek
amrtarek
2014-07-21 (02:39:33AM)
متشكر جداا يا كبير :)
bakar852911
bakar852911
2014-07-22 (02:40:19PM)
العفو يا معلم :)
nadeen92
nadeen92
2014-07-23 (11:15:53PM)
لو سمحت انا عاوزه اعرف مين افضل في الالعاب والنت الموبايل ده ولا هواوي2 mediapad 7 youth
mob4me
مشرف
mob4me
2014-09-18 (05:25:25PM)
شكرا لك علي التقرير الممتاز ونتمني ان كل عضو يعمل تقرير بنفس المستوي علي شان نقدر نستفيد من تجربتة
akazzz
akazzz
2014-11-16 (12:23:19PM)
السلام عليكم
تم شراء الموبايل الاسبوع الفات
وتم عمل التحديث ايضا لكن بعد التحديث حصل مشكله
وهى ان الجهاو لما يفصل شحن خالص وتحط الشاحن بتاعه يفضل فاصل لمده 6 دقايق وبعد كده يبدا الشحن
وعملت اعاده ظبط مصنع بس برده نفس المشكله موجوده بس الجهاز بعد كده بيعمل بصورة طبيعيه تماما فاعمل ايه الحق اوديه الصيانه ولا فى حل تانى
تلك الخدمة مخصصة لاعضاء الموقع

التسجيل بالموقع

حتي تسطيع الاستفادة و المشاركة في الموقع يجب ان يكون لديك حساب علي موقعنا. خطوات بسيطة يمكننا من خلالها انشاء حساب علي موقعنا

انشاء حساب جديد سجل بحساب الفيس بوك