الحمد لله تم شراء هاتف ايفون 7 بلس 128 جيجا اسود مط
وده تقييمي للجهاز بعد استخدامي ليه حوالي ٢٠ يوم

المميزات :-
بالنسبه لخامات وشكل الجهاز طبعا كالمعتاد من شركة أبل انها اكتر شركات الهواتف اللي بتهتم بجودة الخامات من خامات داخليه وخارجيه

وكالعاده كل سنه أداء الايفون 7 وال 7 بلس أسرع اجهزة سمارت فون على مستوى العالم وبدون مبالغه وتقارير وريفيوهات جميع المواقع تشهد بذلك ، وللعلم ابل على مدار سنوات عديده فاتت كانت اسرع هاتف على مستوى العالم وهي بتستخدم معالج ثنائي النواه ورام ١ جيجا او ٢ جيجا العام الماضي فقط فمابالك بقى لما يكون المعالج الجديد رباعي النواه والرام ٣ جيجا لك ان تتخيل

الكاميرا تحفه وهي اقرب شئ للكاميرات المتخصصه واضافت ابل كاميرا اضافيه خلفيه لخاصيه الزوم البصري وفعلا بقدر اعمل زوم الى 2x بدون ما افقد شئ من جودة الصورة (شكرا ابل) والكاميرا فيها تحسن عن الموديل السابق بالرغم من ان الايفون 6s كاميرته ممتازه وتم زياده حجم البيكسل ، وهناك تحسن ملحوظ جدا في الكاميرا الاماميه وتم زياده عدد البيكسلات الى 7 ميجابيكسل لهواة التصوير السيلفي .

شاشة الجهاز جميله جدا والوانها ساطعه اكثر بقليل من الموديل السابق . ولو حد هيقولي في شاشات دلوقتي 2k و 4k فصدقوني دي كلها للدعايا فقط لأن شاشه الايفون 401 بيكسل في كل أنش ومفيش حد قبل كده اشتكى من قلة جودة الشاشه بالعكس دي من افضل الشاشات واكتر شاشه تظهر الصور على طبيعتها زي ما الانسان بيشوفها بعينه .

البصمة : سريعه سرعه غير عاديه وممكن وانت بتفتح الموبايل بالبصمه متلحقش تشوف ال lock screen . انا اول ما جبت الجهاز جربتها وهي عليها البلاستيك بتاعها وبرده اشتغلت . وفعلا افضل قارئ لبصمة الاصبع في سمارت فون على مستوى العالم

زرار الهوم الجديد : تطور جميل جدا في الجهاز وافضل بكتير من الزرار العادي اللي ممكن مع الاستخدام لفترت طويله يتقل او يبوظ وتحتاج تغيره لكن الزرار الجديد ده مش زرار اصلا ده قطعه ازاز زيها زي الشاشه وشغاله بخاصيه ال 3d touch ولما تيجي تدوس عليها الموبايل يهتز ويديك احساس كأنك دوست على زرار عادي وميزتها انها عمرها اطول بكتير من الزرار العادي

خاصية Taptic engine اسلوب جديد لنظام الاهتزاز وجعله متفاعل مع العديد من المهام في الهاتف

خاصية ال 3d touch بتختصر عليك حاجات كتير وفي برامج كتير جدا بدأت تستخدمها والعاب وهتلاقي نفسك اتعودت على استخدامها . فعلا ابل مش بتحط حاجه في الموبايل الا لما تبقى حاجه مفيدة للمستخدم مش مجرد اوبشن للدعايا فقط وغير مفيد في الاستخدام اليومي .

اصبحت هواتف ابل الجديده مقاومه للماء والغبار بمعيار ip 67 ودي خاصيه عمليه جدا ولكن من راي انها خاصيه للطوارئ فقط لو الجهاز مثلا وقع عليه مياه او ماشابه ذلك ولكن لا يعتمد على هذه الخاصيه في التصوير تحت الماء مثلا ، لأن ابل اعلنت ان ضمانها للجهاز لا يشمل الاعطال الناتجه عن المياه

اضافت ابل في هواتفها الجديده سماعتين سبيكر ستريو ، ومن وجهة نظري دي من اهم الاضافات في الهاتف ، صوتهم نقي جدا وعالي جدا وال bass قوي كسماعه موبايل

البطاريه اداءها ممتاز ، تكفي ليومين استخدام فوق المتوسط ، وتكفي ليوم كااامل استخدام مكثف


العيوب :-

الغاء منفذ السماعات ال 3.5mm

طول مدة الشحن اللي بتوصل من ٣ ساعات ونصف الى ٤ ساعات

حجم الهاتف كبير بالنسبه لحجم الشاشه فلا يوجد استغلال للمساحات الخارجيه بشكل جيد

بروز الكاميرا الخلفيه اصبح اكبر من السابق ، وذلك يتطلب العنايه في اختيار جرابات تكون مستواها اعلى من بروز الكاميرا للحفاظ عليها

واخيرا سعر الهاتف الحقيقه عالي جدا ، ولكن ده بقى حال كل الاجهزه حاليا


اتمنى يكون تقييمي للجهاز أفاد حضراتكم . واي استفسارات انا في الخدمه Jecko