تسجيل دخول الاعضاء

قم بتسجيل الدخول من خلال حسابات التواصل الاجتماعي
الدخول بحساب الفيسبوك
او
التسجيل بالموقع
دليل اسعار الموبايلات
اكسسوارات

بدور علي ايه؟ اكتب رقم موديل الموبايل الابدور عليه

زيارة الموقع الرسمي
هذا الموضوع مرتبط بـ أبل iPhone 6 Plus
للرجوع الي صفحة أبل iPhone 6 Plus الرئيسية اضغط هنا

تقييم شامل لل Iphone 6 plus

jecko
jecko
2015-02-07 (01:33:05AM)
انا هنقل هنا نفس تقييمي للأيفون 6 باعتبار ان الجهازين واحد في كل شئ ماعدا الحجم واداء البطاريه الافضل في الايفون 6 بلس

اولا هبدأ بمميزات الجهاز :-

- في البدايه اي حد هيمسك الايفون هيعرف يعني ايه جوده الخامات ، لما بستخدم الايفون بحس اني ماسك في ايدي موبايل نضيف خامات وشكل ، ومفيش طبعا خامات احسن من الالمنيوم اللي يعملوا بيها الموبايل ، وزجاج الكاميرا وزرار البصمه من زجاج الياقوت .

- اداء الجهاز مفيش بعد كده الصراحه ، في اجهزه تانيه في السوق سريعه وادائها كويس لكن مجربتش قبل كده جهاز بأداء الايفون 6 وال 6 بلس ، وبجانب اداء الجهاز كهارد وير ، سوفت وير ابل بيتميز بالعمليه والسلاسه وبيديلك كل اللي انت محتاجه مبيحطش حاجه ملهاش لازمه عشان متعملش زحمه على الفاضي وتتقل الجهاز .

- بالنسبه للكاميرا ، بدون مبالغه افضل كاميرا في سمارت فون هي كاميرا الايفون 6 و ال 6 بلس طبعا لأن الاتنين واحد ، انا قارنت بنفسي كاميرا الايفون 6 مع اعلى هاتف من شركه سامسونج ال note 4 واعلى هاتف من شركه سوني ال z3 واعلى هاتف من شركه اتش تي سي ال m8 ولقيت ان اقلهم جوده كاميرا الاتش تي سي واعلاهم الايفون 6 ،، لما عملت مقارنه بين الايفون 6 والنوت 4 ومع ان الايفون 8 ميجابيكسل فقط والنوت 16 يعني الضعف بالظبط !! ولكن فعلا المقارنه دي اثبتتلي ان جوده الصوره مش بعدد الميجابيكسل على قد ما هو بنوع وجوده العدسه المستخدمه ،، صور الايفون تحس انها صور طبيعيه جدا، والمنظر اللي هتصوره زي مانت شايفه بعينك هيبان قدامك على شاشه الايفون بنفس الالوان ، لكن كاميرا السامسونج هتلاقي الالوان مختلفه تحس انها مصفره كده والالوان مبالغ فيها ، ده ميمنعش ان كاميرا النوت حلوه ولكن الايفون احلى .

- الوان الشاشه اصبحت اكثر وضوحا وسطوعا ، ورزيليوشن الشاشه 401 بيكسل لكل بوصه وطبعا دي ميزه كويسه ولكن من رأيي ان فيش حد هيحتاج اصلا عدد بيكسلات اكتر من 300 بيكسل ، لان اكتر من 300 بيكسل في البوصه لا يرى بالعين المجرده يعني محتاج عدسه عشان تشوفه ، يبقى ايه لازمتها الشاشات اللي وصلت لاكتر من 500 بيكسل في البوصه ، دي من رأيي دعايا للهاتف ليس اكثر ،، وطبعا التاتش مش هتكلم عليه ( افضل تاتش في سمارت فون ) .

- صوت الاسبيكر من الحاجات اللي عجبتني جدا في الموبايل صوته انقى واعلى من الموديل السابق ومجسم بتسمع صوت ال bass اللي في الاغنيه ، يعتبر افضل صوت موبايل بعد الاتش تي سي طبعا .

- الجهاز طبعا كأداء في الالعاب ومعالجه الرسوميات قوي جدا مفيش حاجه اسمها لعبه تقيله ولعبه بتهنج الجهاز وكل الكلام ده .

- البصمه طبعا من اكتر المميزات اللي بيتميز بيها الايفون ، وسريعه جدا في الاستجابه ، ومفيش اي جهاز اخر من الاجهزه اللي حاولت تعملها عارفه تخليها بنفس الاداء اللي موجود في الايفون .

- البطاريه في الايفون 6 بلس اداءها اقوى من الايفون 6 وده طبعا راجع لحجم الجهاز اللي خلاهم يقدرو يحطوا بطاريه اكبر في الحجم .

ثانيا بالنسبه للعيوب :-

- ابرز عيب انتشر على هذا الهاتف انه الجهاز قابل للتني ، ولكن كل الفيديوهات اللي منتشره ليه وبيحصل فيها الموضوع ده عن ناس بتمسك التليفون وتحاول تتنيه بقوه فبيتني ، ولكن محدش هيجيب موبايل بالسعر ده ويمسكه يتنيه . اللي بيفكر يشتري الجهاز ده يجيب معاه جراب قوي يحميه وينسى موضوع التني ده .

- بروز الكاميرا الخلفيه ، وده بسبب سمك الجهاز الرفيع جدا ، والكاميرا مكونه من 6 عدسات فوق بعض ،، ولكن تقدر تتغلب على العيب ده بالجراب ، بعد تركيب جراب بضهر سميك شويه هيمنع بروز الكاميرا .

وكتقييم عام ومن وجهة نظري الجهاز جيد جدا لمن يرغبون اجهزه بهذه الاحجام .
lordsamir
lordsamir
2015-02-07 (10:50:47PM)
باشا قبل ما تقول اعلى واجمد كاميرا فى سمارت فون جربت lumia 1020 او حتى Lumia 930 ?
jecko
مشرف
jecko
2015-02-08 (03:51:31AM)
بص انا في كلامي ده كله مجيبتش سيره النوكيا ومش بقارنها اصلا لأني مبحبش اجهزه الويندوز فون ، انا بتكلم على اجهزه اندرويد وحتى انا ذكرت فوق انا قارنت بأيه بالظبط ، اعتبر اني بتكلم عن نظام ابل والاندرويد فقط
وانا بسمع عن ان كاميرا النوكيا قويه جدا لكن انا مجربتهاش بنفسي وقليل لما حد بيطلب مني مقارنه الايفون مع جهاز ويندوز فون لأنها اجهزه مش منتشره وملهاش شعبيه كبيره
zazukie
zazukie
2015-02-14 (07:39:31AM)
مبروك عليك وربنا يباركلك فيه

بس انا عايز اعرف البطاريه بتقعد معاك قد ايه مش بالstand by لا ال Screen on time

عندي استفسار بخصوص حاجتين انت كاتبهم
الاول ان بعد ال300 مش بتشوفها بالعين ستيف قال كده بس مفيش اثبات ولا ده كلام علمي يعني مفيش دليل عليه و ناس كتير كذبته
تاني حاجه افضل تاتش ف سمارت فون اول مره اسمعها و عمري ما شوفت موقع متخصص بيقارن بين الايفون واي جهاز تاني قال كده
jecko
مشرف
jecko
2015-02-15 (01:46:31AM)
الله يبارك فيك يا باشا :)

انا اولا معايا الايفون 6 مش ال 6 بلس ، والبطاريه بتقعد معايا حوالي يومين استخدام متوسط او يوم من الاستخدام المكثف

وبالنسبه لرزيليوشن الشاشه ، انا فعلا قريت قبل كده ان اكتر من 300 بيكسل في البوصه متقدرش تلاحظه بالعين المجرده ، ولكن انا لما كتبت كده في تقييمي للجهاز مش لأني قريت قبل كده ولكن لأني جربت بنفسي ، وفعلا الجهاز لما تستخدمه مش هتحس ان انت محتاج عدد بيكسلات اكتر من كده في الشاشه

وبالنسبه للتاتش انا برده مقولتش افضل تاتش في سمارت فون عشان موقع متخصص كاتب كده ، انا قولت كده لأني جربت تقريبا اعلى الاجهزه اللي موجوده في السوق حاليا وكان بالنسبالي الايفون افضلهم ،،

وانا بفضل دايما اللي يقول تقييم عن جهاز معين يكون استخدمه بنفسه ، مبحبش انقل كلام مواقع اخرى بدون تجربه
0a7mad
0a7mad
2015-05-20 (08:43:00PM)
استاذ jecko تقدر تقولى سعر iphone 6 plus كام لكل مساحة

16
64
128
jecko
مشرف
jecko
2015-05-23 (12:00:27PM)
الاسعار بتتغير كل شويه ، فمن الافضل تتصل بأحد المعلنين في الموقع وتسأله بنفسك
rozena
rozena
2015-10-09 (11:44:42PM)
تقييم ممتاز كعادتك تسلم ايدك
تلك الخدمة مخصصة لاعضاء الموقع

التسجيل بالموقع

حتي تسطيع الاستفادة و المشاركة في الموقع يجب ان يكون لديك حساب علي موقعنا. خطوات بسيطة يمكننا من خلالها انشاء حساب علي موقعنا

انشاء حساب جديد سجل بحساب الفيس بوك